《愛在。貴族學園》: Ch 20 ~ 心聲 Part 6

Ch 20 ~ 心聲 Part 6（連載日期：2022/11/08）

韻喬喺着上睡衣同吹頭之後，就開始簡單咁打掃一下屋企，因為自己之前住咗喺醫院一排，一直都冇點清潔過嘅屋企。

同時張太都喺微信裏面同韻喬交帶咗，星期日會同張生幾點鐘坐高鐵返到香港西九龍站。
 
韻喬於是打掃完一輪，再睇一陣電視，紓解一下近日大上大落嘅情緒之後，佢就直接上床休息。

當然，今個周末嘅功課，韻喬決定全部都留番星期六先再做啦。





至於問天殷借嚟出席party嘅晚裝裙，韻喬都掛起咗先，等天殷得閒嘅時候，先再拎返畀對方。
 
不過，雖然韻喬同幾個後生仔，都已經喺床上面休息。但其實今晚嘅事情都仲未完結。咁因為喺劉家大宅嘅主人房裏面，今日第一次認識張韻喬嘅劉生劉太，竟然對於韻喬，有非常濃厚嘅興趣，而成為兩公婆之間嘅話題。
 
「老公啊，我有少少嘢想問下你！」喺床上敷面膜嘅劉太問「做咩呀，老婆？做咩咁夜仲唔訓呀，你唔攰咩？」

「還好啦，不過，唔知老公你頭先有冇覺得，林家二公子個女朋友，同後生嗰陣嘅我，好似好似樣咁？」劉太訓喺床上面問劉生。
 
劉生聽到劉太咁樣講，自然就覺得好奇怪「乜有咩老婆？！我就冇留意到啦，你講嗰個女仔叫咩名呀？」





「好似係叫……張韻喬小姐？」劉太喺用一用腦力記起韻喬個名之後，就答返喺身邊嘅劉生。

「張韻喬小姐……呢個名我都係第一次聽到。不過，我覺得都係你自己後生keep得好啫，老婆，你唔係同我講，你想同個15、16歲嘅妹妹仔爭呀嘛？」劉生講完之後就錫咗劉太一啖。
 
「老公你咗諗去邊呀？!我葉永雪絕對唔係要妒忌後生女，或者同人地爭呀老公，我keep得咁靚，邊使同人地啲小妹妹爭！」聽到老公咁講，劉太塊面自然有少少不悅「但係真係唔知點解，張小姐塊面個輪廓，真係好似我十幾歲嗰陣咁。」
 
「反而我地佳澄佢由細到大，我從來都唔覺得佢有似過我個輪廓。所以今晚我見完張小姐之後，我就覺得好奇怪。不過老公呀，我都係對你信任同坦白，我先決定即刻同你講……」
 
「老婆，我都知道你一直都好信任我。但聽完你咁樣講，你唔係會覺得……佳澄唔係……我地個親生女下話？！」劉生一邊思考劉太嘅說話，於是帶點質疑道「因為如果佳澄真係我地個親身女嘅話，至少都要似你或者似我掛…」
 




「我當然都唔希望有咁嘅事情發生啦老公，但係我都冇可能，會喺張小姐身上發現到會有我嘅影子咖喎。老公你真係唔覺得好奇怪咩？」劉太繼續道出自己對韻喬嘅觀點，以及對佳澄身份嘅質疑。
 
「咁可能佳澄佢自己一直都有一套自己打扮嘅風格呢，你唔好唔記得我地個千金大小姐佳澄，喺你一手培養之下，都係一個化妝高手嚟咖喎。而且大家嘅吸收都唔同啦，係咪？」劉生安慰劉太道。
 
「所以老婆，我都覺得你就唔好太過多心啦。不過，老公我明白你嘅意思，如果你真係唔放心嘅話，我諗下過一排得閒少少嘅時候，我再睇下要點做啦，包括同佳澄去驗血同DNA…」
 
「但係如果同佳澄去驗血同DNA嘅話，你覺得以後佳澄會點樣睇我地呢？」劉太諗諗下結果越諗越多嘢，搞到劉生都忍唔住。

「好啦老婆，你就真係唔好諗得太多住先啦，反正都唔一定係咁，可能都只係巧合呢，而且我地今日去呢個party都攰啦，早少少休息啦好冇？」
 
「嗯……咁好啦老公，不過呢件事，你記得記得唔好同任何人講住，包括佳澄同其他管家、工人之類，我唔想佢地喺度亂諗，同埋佳澄成績都已經一般，我都廢事再影響佢學業。」劉太有少少擔心咁講。
 
「同埋，我都想要啲時間，搞清楚曬成件事先，唔想之後搞錯任何事情。」

「得啦老婆，我知道點做啦！你都真係唔好太擔心啦，上天遲早都會將你心裏面嘅疑問解開…」劉生再一次安慰不安嘅劉太。





「嗯嗯！好啦老公，我地訓啦，晚安！」劉太講完之後，劉生就去熄燈，然後上床休息。

不過，唔知係咪因為太過多疑嘅關係，而且韻喬嘅身影，喺劉太腦内揮之不去，所以劉太成晚都訓得唔係太好，最後都係決定要管家幫手，冲杯熱牛奶飲完之後先訓得着。

（Ch 20 心聲 ~ 完）

IG link https://instagram.com/bear_big_big_writer