Ch 22 ~ 心動 Part 2 (連載日期:2022/12/23)

而喺呢一刹那,韻喬就只可以感覺到,自己個心喺度不停咁亂跳,同時身體都突然變得非常灼熱。

而韻喬自己都記得,呢種感覺都係喺之前對住,或者諗起俊軒嘅時候,先至會突然間出現。

至於俊軒,佢都感受到佢同韻喬嘅身體之間,產生咗一段異常高壓嘅電流,然後兩者嘅眼睛,無言咁互相交換住對方嘅電流。
 
兩個人一直都凝望住對方,然後佢地嘅身體就好似兩塊磁鐵咁,一步一步咁慢慢互相吸引而靠近,而兩者都開始感受到,對方急速嘅呼吸同強烈嘅心跳。而呢種呼吸同心跳,都隨住兩人互相靠近,而逐漸咁同步起嚟。
 


但係同一時間,原本正喺度好努力咁做緊功課嘅天殷,喺聽到韻喬嘅呼叫聲之後,就開始嘗試喺圖書館裏面搵韻喬,睇下自己個好姐妹到底發生乜事。
 
點知天殷佢行咗兩行書架之後,就親眼見到韻喬同俊軒兩個塊面哄到好埋、互相對看嘅情景。

當然,韻喬同俊軒都因為沉醉喺兩人之間嘅激烈交流,而注意唔到天殷嘅存在,所以先會繼續哄到咁埋。
 
天殷見到咁樣嘅情況,本來覺得眼前嘅景象,應該由得佢地繼續,但係天殷自己又覺得,如果唔阻止俊軒同韻喬嘅話,恐怕佢地兩個會被感情埋沒理智,之後一定會發生更加誇張嘅事。

所以天殷最後都決定要阻止俊軒同韻喬繼續落去,於是就輕輕腳步咁慢慢行過去,然後就問佢地「(喂,林俊軒、張韻喬,你地兩個依家喺度做緊咩呀?兩個無啦啦都發夢望住對方都有嘅!?有咩好望呀到底?)」



就係因為天殷突如其來嘅呢一句問句,俊軒同韻喬就意識到,佢地兩個已經被天殷嘅說話拉返返嚟現實,於是就即刻縮開,然後就好尷尬咁答番天殷「(我……我呀冇……冇……冇咩呀!)」

天殷見兩個人答到咁嘅樣,就梗係唔信俊軒同韻喬所講真係冇嘢啦,於是就古古惑惑咁,再望住佢地兩個問「(你地兩個真係冇嘢?明明頭先我見到你地兩個個樣,好似有啲古怪咁喎!?)」

韻喬首先非常緊張咁,想撇清同俊軒嘅關係,於是就好急咁話「(冇啦殷殷,就係頭先我想拎書嘅時候唔小心,整跌咗書架上面一啲書。然後小軒聽到我把聲之後,就即刻跑過嚟救咗我咋嘛!)」

然後韻喬都打個眼色畀俊軒,希望俊軒可以出口等天殷唔好再繼續問落去。

俊軒收到韻喬嘅意思,自然都即刻同天殷解話話「(係囉係囉,就係頭先小喬想跳高拎本書嘅時候,唔覺意整跌埋其他書落嚟啫,都冇咩特別嘢嘅,而且好在小喬佢都冇整親到,天殷你就唔好諗太多啦!)」
 


天殷心底裏當然深信,俊軒同韻喬之間嘅愛情,已經有慢慢萌芽嘅跡象,於是就繼續乘勝追擊兩位男女主角「(哦!咁喬喬你冇嘢就好啦。不過呢,如果你地兩個真係認清心意,然後要開始嘅話,我都唔會介意咖!應該話我都樂見其成就真。加油啊林俊軒你!)」
 
講完之後,天殷就微笑住咁,拍一拍俊軒同韻喬兩個嘅膊頭,然後就行返自己個位度繼續溫習。

俊軒同韻喬對於被天殷撞破頭先嘅事感到非常尷尬,而韻喬都繼續面紅紅咁,於是佢地都冇再講過嘢,默默咁將整跌落嚟嘅書,放番上書架上面。而韻喬之後就自己一個,去借走咗想借嘅書。
 
三個人之後都冇點再有太多交流,一直都係做自己嘢多,直到大概差唔多5點45分嘅時候,因為學校夠鐘要閂門嘅關係,佢地就被逼要離開學校。

喺離開之前,俊軒趁天殷自己去洗手間嘅時候就問韻喬「小喬呀,依家放工時間好難搭巴士咖,不如……我送你返屋企啦,好嗎?」

(待續 ~)

IG link https://instagram.com/bear_big_big_writer
已有 0 人追稿