《愛在。貴族學園》: Ch 23 ~ 施壓 Part 5

Ch 23 ~ 施壓 Part 5（連載日期：2023/01/29）

「嘉惠，我唔知你爸爸媽媽平時喺屋企，係點樣教你待人接物嘅方式同態度，但係如果你繼續抱住咁樣嘅價值觀嘅話，其實都會出先好大嘅問題，而今次之所以出問題，就係因為你啲待人接物嘅態度，引致到你觸犯到校規…」陳校長非常認真咁斥責嘉惠所犯嘅事。
 
「而且你仲要喺課室裏面，當住其他同學面前打傷張同學，雖然張同學佢冇大礙，但係依家你畀其他同學投訴，就算校長我點樣同你爸爸熟絡都好，今次我都真係保唔到你。」
 
「所以呢，今次你好大機會會被學校嘅訓導主任處分，聽日返到學校之後，你嘅班主任Ms張，會畀機會你交代返成件事。至於學校對你嘅處罰，我要再同Ms張同埋訓導組開會之後再決定。叫返你爸爸嚟聽，記得off咗個speaker佢，Byebye嘉惠同學。」校長終於完全自己嘅訓話。

「校長再見……」嘉惠此時用一個可憐但又不服嘅眼神望住黃生，同時雙眼開始轉紅兼流淚。





「嘉惠，你返上房換衫洗個面先，我同校長仲有少少嘢想講！」

「哦，知道爸爸，失陪先！」嘉惠無奈咁聽黃生嘅說話，但心底裏面就更加唔鍾意韻喬。
 
之後陳校長就同黃生喺電話裏面，略略講咗少少韻喬喺學校嘅背景，包括幫學校攞到嘅校外獎項、個人嘅獎、助學金紀錄等等。

黃生喺聽到陳校長嘅形容，就覺得韻喬就係一個好優秀嘅學生，理應成為嘉惠好好嘅學習對象先真。

但至於其他人例如俊軒、天殷等目擊嘉惠欺凌嘅同學，陳校長就一概以保護舉報者為由，對黃生一字不提，只係話有其他同學，因為不齒嘉惠一直對韻喬嘅行為，而幫韻喬告發嘉惠。
 




「成件事大概就係咁啦，Richard。嗱大家都識咗咁多年，我都唔太想介入你地嘅家事太多。但係作為負責任嘅校長，我都好希望小嘉佢好清楚咁意識到，自己喺學校應該係咩身份，同埋對同學嘅態度。」陳校長道。
 
「我都明白你嘅出發點嘅，Charles。今日我好多謝你提點我同個女就真，而且如果我個女喺學校再發生咩事嘅話，你都可以即時同我講。一陣間我會抽時間再同個女傾下，再教下佢咖啦。唔該哂你先，今日要你專登打電話畀我！」黃生回應道。

「咁又唔好咁客氣啦Richard，我都係想幫你個女啫，不過真係要嘉惠佢承受一下後果咖啦。好啦！我仲有啲嘢要跟，之後再傾！」陳校長就準備收線「好！遲啲再傾！不過星期日我地都會喺球場見啦哈哈！Bye！」

「係喎，到時見！Bye！」陳校長講完之後就收線。
 
“真係呀！個皇帝女又會搞咁大壇嘢畀我嘆都有嘅…”黃生心裏面都對嘉惠嘅行為感到失望“不過，我覺得小嘉應該有嘢冇同校長講，一陣都係問下先”。所以黃生就用intercom，打電話叫嘉惠落嚟。





兩分鐘之後，嘉惠就已經落到嚟大廳，「坐啦！」黃生於是就好嚴厲咁，望向坐喺梳化上嘅嘉惠。

而換上居家服嘅嘉惠，塊面依然都見到頭先喊過嘅痕跡。黃生好快就非常認真咁講...

「黃嘉惠，可唔可以同我解釋一下，到底你喺新學校發生咩事？點解要喺學校打同學？又要咁樣同同學講嘢？」

（待續 ~）

IG link https://instagram.com/bear_big_big_writer