《愛在。貴族學園》: Ch 24 ~ 心碎 Part 2

Ch 24 ~ 心碎 Part 2（連載日期：2023/02/21）

禮謙聽到之後即刻白眼反上天，然後彈咗俊軒額頭一下話「咩呀！？好心你就飲水思源啦林二少！如果當初唔係我同天殷話你知，小喬其實鍾意你多過我嘅話，你會咁快知道咩？」
 
「不過老實啦小軒，我今次就真係有野要拜托你。」「嗯？有咩呀？」俊軒非常奇怪咁問。

「既然小喬最後選擇咗你，咁就拜托你代我將幸福交畀小喬同學，可以嗎？以後無論你地之間有咩風風雨雨，你地一定要記得兩個人都要一齊堅持落去！」講到呢度，大愛嘅禮謙都已經眼紅紅，好似好唔捨得失去韻喬一樣。
 
「加油呀兄弟！我都衷心祝福你地長長久久，但係我都要你唔好令我失望，而且都唔好浪費我同天殷同學嘅一番心機，知道嗎？」講完之後，禮謙又拍一拍俊軒膊頭以示鼓勵。





俊軒於是都好誠懇咁回應自己嘅死黨「多謝你嘅祝福啊謙謙，你就同我定啦，以後無論幾時都好，我都會一定會好好咁對小喬，絕對唔會令你地擔心同失望」禮謙喺點點頭之後，就自己一個去洗手間。

就喺禮謙打開班房度門嘅時候，韻喬咁啱都返到班房。禮謙同對方打個招呼之後，就繼續去洗手間。

至於韻喬，就見到俊軒同天殷喺度傾計，於是放低書包之後，就自動波走埋去兩個好朋友度「早晨呀，天殷、俊軒。」
 
「小喬早晨呀，睇嚟你今日精神唔錯喎！」天殷好開心咁講「嗯……還好啦！」但係韻喬好快就注意到，天殷用一個好怪嘅眼神望住自己，於是就問...

「殷殷呀！你頭先同俊軒喺度講緊咩講得咁高興呀？！同我開心share下啦！」韻喬同時都已經返到自己個位放低書包，再走去俊軒個位度。





天殷扮哂淡定咁話「哦，冇咩特別呀小喬！只不過係因為見到小軒佢，今日早咗咁多返嚟呀嘛，所以咪同佢傾下計咁囉！」韻喬於是就望向身邊俊軒，但係韻喬又突然之間記起，尋日同俊軒喺圖書館過電嘅事，所以眼神都有少少閃縮咁望向對方。

不過，韻喬都唔想天殷見到自己對住俊軒嘅眼神咁鬼鼠，所以佢就摸一摸自己個頭話「哦，原來係咁，哈哈！你唔講起我都唔覺，小軒今日早咗返嚟添！喂早晨呀小軒！做咩今日咁早返嘅？」

「早……早晨呀小喬，因為今日早咗醒呀嘛，所以咪……早少少返學囉！」俊軒答嘅時候，其實塊面都有少少紅，因為都係對住韻喬嘛。

不過韻喬就想盡快結束個話題，所以就話「哦！我都係返埋位食早餐先啦，一陣落堂再傾啦！」韻喬冇等俊軒答案就拖埋天殷返去自己個位度，食早餐之餘都準備一陣上堂啲嘢。

但呢個和諧嘅氣氛，好快就隨住嘉惠返到班房而停止……





嘉惠一行入班房，連書包都冇放低，就笑笑口咁走去俊軒個位度「早晨呀大家！咦早晨哦小軒，my love！」

果然嘉惠一返到嚟，就立即對俊軒展開攻勢，而韻喬同俊軒都意識到，今日麻煩嘅戰爭又要準備開始啦。

然而，俊軒對於嘉惠呢種行為感到非常討厭，於是好唔耐煩咁講「走開啦你黃嘉惠同學！唔好再癡到咁埋得唔得呀！仲有呀？你唔可以兼且冇資格叫我做小軒，只係得佢地三個先可以咁樣叫我咋！」

冇錯，俊軒將嘉惠曾經對韻喬講過嘅說話，完整咁還返畀嘉惠，韻喬聽到之後心裏面自然有啲暗爽。
 
但係俊軒喺講呢句話嘅時候，唔覺意大聲咗少少，搞到班房裏面其他同學，聽到之後都即刻望住俊軒同嘉惠，氣氛當然就非常尷尬，而且部分同學都開始議論紛紛...

（待續 ~）

IG link https://instagram.com/bear_big_big_writer