Ch 24 ~ 心碎 Part 9(連載日期:2023/03/17)

而喺考完試之後嘅個幾星期裏面,大家都開始備戰陸運會。過咗考試周之後,韻喬佢地幾個幾乎每日喺放學之後,都有去附近嘅黃竹坑運動場練跑,以及俊軒同韻喬分別參加嘅三級跳同跳遠項目。
 
參加咗短跑嘅韻喬、天殷同禮謙,都係重點訓練起跑時嘅爆發能力,以便自己可以一股作氣由頭帶到尾。

至於參加800同1500米長跑嘅俊軒,就主要鍛煉持久力、練氣以及後上嘅能力,等自己可以趁對手冇氣嘅時候,自然就可以有能力後來居上。
 
去到星期五嘅夜晚,韻喬佢地經過連日嘅訓練之後,大家都已經慢慢咁進入狀態,而且個人嘅時間都快過練習之前少少,基本上再訓練多少少,佢地要攞牌嘅話,都已經冇太大問題,但當然都要睇下夠唔夠Form 6同校隊嘅同學玩。



至於嘉惠,自從喺考完試嘅呢幾日,一直都想約俊軒一齊去“拍拖”,應該話想夾硬進入俊軒佢地嘅圈子,試圖破壞俊軒同韻喬,甚至佢地四個之間嘅關係。

但俊軒佢嘅意志非常堅定,每次都以練習爲為由回絕嘉惠,搞到嘉惠對韻喬嘅不滿都纍計加深。

同樣喺星期五當晚,俊軒同韻喬佢地練習完、喺返去林家大宅鎎時候,再一次收到嘉惠嘅訊息,今次俊軒終於都忍無可忍,直接喺Signal裏面話……

「5A林俊軒:黃嘉惠同學,我都同你講過好多次,我真係對你冇興趣           20:25」
「5A林俊軒:你就當係我林家二少爺求下你,唔好再搵我啦好嗎?        20:25」「5A林俊軒:我再同你講多次,黃嘉惠,喺我個心裏面,依家就只有一個人,佢就係張韻喬同學            20:26」
「5A林俊軒:我唔知道而且都唔想知道喺你依家心裏面,想對我或者小喬做啲咩。但係我都想勸下你,見好就收,放過我地幾個,唔該你           20:27」



不過,嘉惠就梗係唔會咁順攤去應承俊軒嘅要求,於是就回答話……

「5A黃嘉惠:軒軒,我都曾經話過,我一定會用盡一切辦法,令你同我喺埋一齊!!              20:29」
「5A黃嘉惠:我勸你就唔好敬酒唔飲飲罰酒,到我真係忍唔住嘅時候,你就唔好怪我地對你地幾個唔客氣!!        20:30」

俊軒睇完嘉惠嘅訊息之後,當然都係得啖笑,完全冇要去再答嘉惠嘅念頭,然後就去做自己嘢。

當然,俊軒都有同韻喬、天殷佢地傾計。至於練習方面,天殷就提出話畀大家輕鬆少少。所以就同韻喬講,星期六就唔練習。

但係,其實天殷同俊軒、禮謙兩個,暗自瞞住韻喬,約定星期六朝早出去練習,不過當然就唔會只係練習咁簡單啦。而兩個男仔好快都答應天殷出去嘅請求。



去到星期六嘅朝早,天殷約咗俊軒同禮謙出去黃竹坑練習。佢地除咗不停咁練習之外,三個人仲喺度商量星期日“整蠱”韻喬,應該話係將俊軒同韻喬拉埋嘅最後細節……
 
喺練習完之後,天殷佢地幾個就去香港仔附近食飯。雖然佢地幾個屋企都好有錢,但係好多時候,佢地都會喺街食啲比較平民嘅嘢,今日佢地就去普通餐廳食魚蛋粉...

「喂殷殷、小軒,你地諗住聽日我地大約幾點到會出去呀?」喺點完食物之後,禮謙先問另外兩個同伴。
 
「em……我就諗住朝早我地都係繼續練習,然後同今日一樣,都係過嚟香港仔呢邊食飯,食完之後先再實行我地嘅計劃?」身為男主角,點可以咩都靠人地,然後自己喺度做freerider,所以俊軒首先提議。
 
「都可以呀小軒,橫掂我地都唔知會搞到幾點喎,所以喺練習完之後,我地都係食咗嘢打定個底先會好啲哈哈!」天殷笑笑口咁講「希望韻喬到最後,真係可以面對自己對小軒你越來越濃烈嘅情感,唔會浪費我地一番心血啦。不過林俊軒,唔該你到時……」

(待續 ~)

IG link https://instagram.com/bear_big_big_writer
已有 0 人追稿