Ch 25 ~ 開始 Part 5(連載日期:2023/04/25)

俊軒於是再喺韻喬耳邊,好溫柔同細聲咁講「不過,你嘅潛意識喺度話緊畀我知,因為你心底裏鍾意我囉,所以你先會即刻走過嚟瑪麗醫院!」

韻喬聽到之後打咗一個冷震,明顯就係因為畀俊軒講中自己心裏面嘅諗法。「如果唔係嘅話,點解喺我同禮謙出事之後,你問都冇問過禮謙點就……」俊軒繼續講落去。
 
不過俊軒未講完,就畀面紅紅嘅韻喬打斷「你……你個衰人!依家邊個話……我鍾意你咖?你會唔會將自己睇得太重要呀,林俊軒?!」

俊軒輕輕一笑,然後再喺韻喬耳邊輕聲道「嗰個鍾意我,鍾意到知道我一出事,就要即刻由北角趕過嚟瑪麗醫院見我嘅嗰個人,佢個全名就叫做張。韻。喬!」



喺講完個喬字之後,俊軒就更進一步,輕輕吹咗韻喬耳仔一下,用嚟挑逗對方内心嘅情感。

面對俊軒如此猛烈嘅挑逗攻勢,韻喬成個人就更加怕醜,而塊面就比之前更加紅,當然都顯得韻喬更加美艷動人「你…..你講咩話?!我…我得鬼閒鍾意你呢個口花花嘅人呀!哼!」然後又一次打俊軒。

不過唔同嘅係,韻喬今次打嘅,係俊軒嘅心口。

俊軒雖然覺得心口好痛,但依然笑面迎人咁望住韻喬對眼,當然俊軒之後都係取笑韻喬啦「哈哈,依家有人呢,明明就係鍾意人地,但係又唔肯坦白同人地承認喎!嘿嘿嘿!」

一直畀俊軒玩嘅韻喬,聽到俊軒繼續講之後,又鼓起泡腮「衰人!咩邊個承認唔承認呀!?乜我塊面上面依家有寫住話“我有鍾意嘅人”,又或者咩“我依家好想拍拖”、“我好鍾意林俊軒”咩?下!?」



但就係呢個時候,一直收埋自己嘅天殷,見自己出場嘅時機都已經成熟,終於就慢慢出現喺韻喬同俊軒後面,然後就話「有啊!而且係邊個咁都仲要問!?嗰個人咪就係張韻喬你囉!」

韻喬喺一聽到天殷把聲之後,就成個人嚇一嚇,然後放開一直捉緊嘅俊軒,望去後面話「李天殷!點…點解你依家先出現呀?!」

天殷冇回答韻喬嘅質問,只係做口型同俊軒講「well done!」。
 
但係,當韻喬見到佢地兩個人之間嘅互動之後,自己先至恍然大悟,發現自己原來跌咗入一個圈套裏面,於是再次鼓起泡腮,好嬲咁話「喔!我知道啦!!其實你地兩個又好似上次咁,夾埋一齊嚟蝦我!係咪?!」

天殷同俊軒以笑默認,搞到韻喬非常無奈。



「完全冇啲咁嘅事啊,小喬!」今次出聲嘅,就係頭先坐近門口埋伏嘅禮謙。

韻喬自然都非常驚奇咁問「禮謙!?點解你會喺度咖?!你……唔係受咗傷,畀人送咗去伊麗莎白醫院咖咩!?」韻喬再一次好大聲咁問。
 
「哈哈,咁首先真係要多謝小喬你對小弟我嘅關心先啦!我就完全冇事嘅,如果真係要關心嘅話,就當然係關心咗你同小軒先啦!哈哈哈哈!」禮謙見到韻喬個愕然樣,好快就破防哈哈大笑,當然俊軒同天殷都有啦。
 
「咩事呀依家!?你地幾個到底特登走嚟醫院急症室度搗亂都不特止,仲要夾埋呃我話呢兩個男仔受傷,然後要我山長水遠過嚟,想點先呀你地幾個!?」韻喬依然好嬲咁同佢嘅三個好朋友講。
 
「小喬,你依家冷靜少少,聽我地講咗先。其實呢,今日我地嚟到呢度,就係要進行一個叫做“和我一起”嘅行動!經過咗前面咁多嘅鋪墊之後,依家就正正進入高潮嘅部分啦!」禮謙終於平心靜氣咁講出緣由。

(待續 ~)

IG link https://instagram.com/bear_big_big_writer
已有 0 人追稿