《愛在。貴族學園》: Ch 27 ~ 第一次約會 Part 2

Ch 27 ~ 第一次約會 Part 2（連載日期：2024/02/17）

食完之後，佢地再行咗一陣CitySuper，喺超級市場裏面睇下得意嘢。

本來俊軒都話想買少少嘢，不過韻喬就話呢度啲嘢貴，而且其他地方都有得賣之後而作罷。

行完超級市場，喺IFC商場裏面、拖住俊軒嘅韻喬喺睇過時間，就突然之間問「小軒呀，依家時間仲好早咋喎，下一站，我地去邊度好呀？」

天真嘅俊軒諗都冇諗就答韻喬話「喬喬我冇咩所謂呀，我覺得我可以喺你身邊陪住你，就已經夠啦！但係，今日就係有少少唔想去練跑咋嘛，而且，我地兩個今日都冇帶去練跑嘅野喺身。咁你有冇咩地方想去呀？」





不過，韻喬聽到俊軒發自己冇計劃之後，就有少少不滿咁話「搞錯呀你，要同女朋友去街都唔諗節目都有嘅！點做人男朋友咖你！不過呢……嘿嘿嘿……既然係咁，不如今次我話事……我依家同你去一個地方好冇呀？」
 
「好呀喬喬，不過你都要話我知去邊先喎！」俊軒好快就應承韻喬「行啦死人頭！有我帶住你咪得囉，婆婆媽媽！唔通你怕我走去賣你豬仔咩！？」韻喬有少少唔耐煩講。

「咁好啦！」於是，韻喬就帶住俊軒離開IFC，去到怡和大廈門口嘅巴士站。
 
「係呢小軒呀，今晚我地仲一唔一齊食飯呀？因為如果我地一齊食嘅話，我就要同媽咪講，叫佢唔使煮我飯喎。」

「我可以啊，不過你想食咩先？橫掂聽完頭先個電話之後，我都唔想返去住…」俊軒再一次提起頭先嘅事，但韻喬當刻冇咩反應。
 




「食咩呀？嗯…我都無所謂呀，呢個一陣先算啦！」韻喬回答道「不過小軒，我就有少少好奇，點解你唔使返去屋企，睇下發生咩事先咖咩？」

「小喬呀，我地頭先咪話咗，呢兩個禮拜好好相愛咖嘛？啲咁掃興嘅野就唔好提住先啦！」俊軒截住韻喬嘅提問，而同一時間韻喬就喺signal同張太話，今晚唔返屋企食飯。
 
「我Send咗啦男朋友，不如我地今晚食大阪燒好冇呀？之前我聽曉欣講話，呢間餐廳啲燒餅要自己燒，好似幾好玩咁！」韻喬好興奮咁拎住個電話，一邊同俊軒提議，而俊軒好快就點頭同意話「咁聽落都ok喎，不如就今晚去啦？咁你去訂位？」
 
「好呀！」於是韻喬就喺電話裏面訂好枱。訂完之後，韻喬就帶住俊軒，上咗一部去銅鑼灣嘅過海巴士「親愛的，到底你想帶我去銅鑼灣做咩呀？」俊軒用疑問嘅語氣問韻喬。
 
「哎呀你好長氣呀男朋友！一陣去到你咪知道咯！都唔知點解我男朋友會咁長氣都有咖！」韻喬又開始唔耐煩咁話。





上車之後，兩個人一路互相挨住對方坐，同時都影咗一堆合照，而俊軒都偷偷錫韻喬後頸，韻喬就露出甜蜜嘅笑容。
 
過咗二十分鐘之後，巴士就去到摩頓臺總站，韻喬就拖住俊軒行返出電車路「小喬呀，到底我地要去邊啫？做咩你要搞到咁神秘咁？」

「唉呀小軒呀，呢邊行啦，跟實我啦！總之就係你……應該話我地都鍾意嘅地方啦！」韻喬輕聲咁講，繼續拖住俊軒行。

而呢個時候，俊軒大概都估到韻喬要帶自己去邊「我同你都鍾意去嘅地方？嗯……小喬呀，唔通你想帶我去……？」

韻喬笑而不語，只係繼續拖住俊軒。而喺路上，都有唔少人望住韻喬同俊軒，因為都覺得佢地兩個好合襯。

直到佢地兩個行到中央圖書館，當韻喬推開圖書館嘅大門之後，俊軒就好似變咗一個小朋友咁，異常興奮起嚟。

俊軒仰頭望向中央圖書館嘅中庭，高興道「啊……呢度好多書呀…… 點算點算，我唔可以自控啦……小喬！你點知我想嚟呢度咖？同埋點解…你會知道我都鍾意圖書館嘅？邊個話你知咖？」
 
「因為...」





（待續 ~）

IG link https://instagram.com/bear_big_big_writer