《愛在。貴族學園》: Ch 27 ~ 第一次約會 Part 4

Ch 27 ~ 第一次約會 Part 4（連載日期：2024/03/05）

「幾時有喎？」「我話有就有啦！」

喺兩口子繼續反駁嘅時候，餐廳職員就帶佢地入去就坐。喺坐低之後，侍應生就好簡單咁，同佢地兩個講解整各種燒餅嘅方法。

雖然聽落就好簡單，但係喺席間，兩人當喺反轉個大阪燒嘅時候，就有少少雞手鴨腳啦……

「喂呀林俊軒呀！未夠時間呀！你反番轉佢先啦！」「散啦，砌好少少啦喬喬！」「加多少少油啦！」「個醬唔係依家落呀！你仲要落咁多！！」佢地喺整餅嘅時候都搞出唔少笑料。





不過，佢地都好享受個過程，而且成品都同個示範嘅圖分別唔大。

之所以佢地會享受，係因為喺整燒餅嘅過程之中，就好似親手煮野食畀對方一樣，而且仲要係第一次整。

當然，同下晝喺Lady M嘅時候一樣，佢地兩個都有餵對方食嘢。
 
「小軒，好唔好食呀個文字燒？」韻喬一邊餵，一邊好溫柔咁問俊軒。

「好食呀！因為我可以感受到，有你份心機喺個燒餅裏面囉！」然後俊軒就用手指點一點韻喬個鼻。
 




韻喬聽到之後再一次瞪大隻眼，面都紅埋咁喺度抗議話「你你你你個死人頭！又喺度講埋呢啲嘢，正一口花花！」

「但係你個樣話畀我知你好似好鍾意聽喎！」俊軒反駁已經笑到停唔到嘅韻喬，但係韻喬都自然駁上駁「冇呀！一路都係你唔正經咋嘛！」
 
「唔係口花花呢小喬，我就覺得因為你平時都有煮開嘢食，所以手勢先會咁純熟咋嘛，而且咁先會好食。唔信你自己睇下隔離枱啦…..」於是俊軒就指住隔離檯嘅一對情侶，因為俊軒見到佢地將個燒餅反轉嗰陣成個散曬。
 
不過韻喬好似唔太buy俊軒嘅俊軒，於是又喺度話「你好mean囉林俊軒！你頭先咪又係整到雞手鴨腳咁，你都唔係好過人地好多咋，仲要唔記得set timer，搞到個餅底燶曬！」韻喬講嘅時候仲指住俊軒整燶嘅燒餅同俊軒抱怨。
 
俊軒聽到之後自然無言以對，而且確實韻喬嘅燒餅，都整得比俊軒好睇「係啦，我知錯啦，以後我會學煮嘢食咖啦！當然係煮畀我嘅喬喬啦！」





「你又口甜舌滑啦林俊軒！不過你咁就乖啦，難得你個衰人肯咁上進，為咗我去學嘢！」韻喬一邊講一邊掩住半邊嘴狂笑。

之後兩人都繼續食嘢，同時又繼續講學校啲人嘅是非，講到非常高興，基本上可以話係兩個人由冤家變成情侶嘅過程之中，暫時食得最開心嘅一餐飯。

當然，佢地都有睇過佢地啲相，俊軒慢慢發現自從韻喬出院之後，對方同自己嘅合照，大家笑嘅次數都多咗。
 
「小軒呀，時間都應該差唔多啦，我地要返去啦，不如埋單走囉？」韻喬睇表之後就同俊軒講。

「下！好早咋喎，小喬，而且……我今日仲未對夠你呢！」俊軒嘟起嘴同韻喬講。
 
「喂呀！聽日我地仲要返學咖，到時候你咪可以對住我成日囉！而且聽日我地唔係仲有quiz咩？你今晚唔使溫書呀？你覺得你自己已經識哂啦林生？下？！」韻喬好隨手咁彈咗俊軒嘅額頭一下。
 
「怕咩呀！我地呢種學霸呀，一陣就溫完啦，都唔會使用好多時間咋嘛，我留返多啲時間，陪我嘅小喬唔好咩？」

「嘻嘻，算你醒目啦男朋友！」俊軒一有機會就氹韻喬開心，當然韻喬聽到都好開心，知道俊軒都唔係唔知自己想點。之後俊軒就去埋單。




 
喺離開餐廳之後「小軒呀，其實少少時間都仲有嘅，不如我地落去樓下line friends store度行下？」韻喬提議道「我想同熊大同……我身邊呢個口花花……嘅男朋友影張相……紀念下我地拍拖嘅第一日咁！」韻喬講嘅時候又一次怕醜起嚟。
 
「可以呀喬喬，其實頭先喺上嚟之前，我都見到佢好受情侶歡迎咁，啲人喺度排哂隊咁影。既然小喬你鍾意嘅話，咁我地就去影啦！」俊軒仲笑意盈盈同韻喬講。

「好嘢！多謝小軒！嘻嘻！」韻喬於是非常開心咁，就帶住俊軒去到二樓嘅line friends store。

（待續 ~）

IG link https://instagram.com/bear_big_big_writer