《愛在。貴族學園》: Ch 28 ~ 唯一 Part 5

Ch 28 ~ 唯一 Part 5（連載日期：2024/04/13）

「唉，就算講唔講都好，我同小軒咪得最多兩個禮拜嘅時間。過咗兩個禮拜之後咁又點呀？我咪又係變返一隻單身狗！然後再睇住佢同嘉惠…」然後韻喬雙眼就開始紅起嚟，淚水亦都開始慢慢滲出…
 
「如果……如果我當初真係早啲識得，面對呢份咁強烈嘅情感，我就唔會搞到依家咁，我就可以同小軒好幸福咁，以後都喺埋一齊，而唔係得嗰兩個禮拜呀！嗚…..嗚…..嗚…」最後韻喬都係忍唔住開始喺度喊。
 
喺韻喬除低身上所以衣物之後，佢就喺洗手間裏面打開花灑，不停用水沖向自己，連同面上嘅淚水，一同流過自己嘅身體「如果可以有能力改變事實嘅話，我真係唔想小軒同嘉惠訂婚！我希望小軒……會係我張韻喬將來嘅老公……我真係好蠢，好蠢！竟然會將自己鍾意嘅人，親手送畀一個要搞死自己嘅情敵！」
 
但係喺下一秒，「唔得唔得，我唔可以放負！正如我對小軒話過，為咗要等待奇跡出現，我一定會加油，由嘉惠身上搶返小軒返嚟。希望天父真係會聆聽到我嘅心聲啦！」





之後韻喬就繼續沖涼，但韻喬喺腦海裏面，一直諗起下晝開始，同俊軒嘅甜蜜感覺，嘴角就開始往上揚，露出甜甜嘅笑容(雖然就冇人可以睇到啦)。
 
沖完涼之後，其實有少少自戀傾向嘅韻喬，又再一次望住鏡入面嘅自己，欣賞下自己優美嘅體態。然後又再一次拎起電話，再一次影低一啲專屬俊軒同自己嘅相“嘻嘻，唔知小軒最後有冇機會，見到呢一個嘅我呢？”

“不過，我諗都係唔好咁快畀個衰人見到住先啦！”就喺韻喬準備send出去之前，韻喬最後決定都係暫時保持神秘感，唔好咁快寵壞俊軒住。喺欣賞完之後，韻喬就着起睡衣，然後就行出去廳度飲湯。

喺飲湯嘅時候，韻喬同時都不停咁喺度玩電話，佢一邊喺度睇今日同俊軒影嘅相嘅同時，一邊就同天殷喺電話裏面傾計，而韻喬都應天殷嘅要求，send咗幾張同俊軒嘅合照畀天殷睇。不過，天殷好快就後悔啦……

「5A李天殷：嘩！你地兩個！使唔使咁曬呀？       21:30」
「5A李天殷：你搞到我都好想拍拖、好想有男朋友錫呀         21:30」





韻喬見到之後噗嗤一笑，然後就回覆天殷話

「5A張韻喬：哈哈，你都一定好快有嘅            21:31」
「5A張韻喬：但係我都好多謝你幫我同小軒做咁多，我地先可以同對方互表心跡，然後先可以喺埋一齊               21:32」

當然天殷都有問，到底今日俊軒同自己做過啲咩，韻喬都有同天殷講返。

天殷聽完韻喬嘅形容之後，就覺得俊軒氹女都果然有一手，至少，今日都令韻喬過得非常滿意先。
 




至於喺另一邊廂，俊軒喺送完韻喬返屋企，離開福生大廈之後，就出返去英皇道截車，去金鐘太古廣場會合林太。

而因為韻喬就住喺北角嘅關係，外加上車都唔係太多，所以俊軒都唔使好耐就已經去到，基本上都冇時間去諗頭先同韻喬一齊嘅事。
 
「小軒你到啦？」「嗯，媽媽！咁夜叫我過嚟金鐘做咩呀？」俊軒一落的士，企喺一邊嘅林太，就同啱啱落車嘅俊軒問「今日同張小姐嘅約會如何呀？」
 
「一切都幾好呀媽媽，今日下晝我同小喬，一齊去咗銅鑼灣中央圖書館……」俊軒回應道「然後佢帶咗我去食大阪燒，而且要自己落手煎嗰種！幾得意呀！」俊軒講嘅同時將部電話遞咗畀林太睇。
 
「哈哈！睇嚟今日你同張小姐都玩得好開心喎！而且媽媽都係第一次見到你整嘢畀張小姐食。」

「嗯，都係嘅！」林太此時都微微一笑「不過啊仔啊，媽媽都有責任提醒你都應該要好好珍惜你同張小姐……」

（待續 ~）

IG link https://instagram.com/bear_big_big_writer 




Threads https://www.threads.net/@bear_big_big_writer