《愛在。貴族學園》: Ch 35 ~ 陸運會之四 Part 2

Ch 35 ~ 陸運會之四 Part 2（連載日期：2026/06/21）

「早晨啊謙謙！」「咦，小喬早晨啊！你點咗名報到未啊？」因為韻喬基本上就係一個大頭蝦嘅關係，所以禮謙都先提醒韻喬要先點名...

「啊！你唔提我都差啲唔記得咗添！我真係成日都咁大頭蝦嘅哈哈！」之後韻喬就先搵老師點名。
 
點完名之後，韻喬就主動再同禮謙傾計，但韻喬發現禮謙嘅表情好唔自然，於是就採取主動，關心一下禮謙喺自己選擇俊軒之後嘅情緒...

「話說呢，呢幾日你過得幾好吖嘛？」「幾好啊，而且我都期待咗呢兩日好耐啦，都係多得你畀我地幾個嘅大挑戰咋，小喬！」禮謙回應道。
 




「我唔係問你呢樣啊程禮謙！」韻喬反一反白眼咁講「我係問緊你，會唔會見到我同小軒一齊咗之後，你會唔開心啊！始終你之前都係鍾意我，我怕我同你嘅死黨一齊，你會唔開心啊。」
 
禮謙感覺韻喬睇穿自己内心，聽到韻喬咁講之後成個呆一呆，然後又再微笑道「冇事啊小喬，其實我之前都同小軒講過，我要佢代替我去愛你，要畀到幸福你，我就已經心滿意足啦！」
 
「暫時我見小軒佢呢幾日都對你唔錯，而且你地都過得好開心，你嘅眼神都話畀我地知，你地過得好開心同幸福，咁我諗我都應該唔洗太擔心你咖啦……」禮謙繼續講。
 
「No No No！」但係，韻喬一下子打斷禮謙嘅話，然後用另外一個方法去問...

「我想知道嘅係，你畀人搶走咗一個自己鍾意好耐嘅人，你唔會覺得唔開心，或者唔會覺得可惜，又或者心裏面少一忽肉嘅咩？」
 




禮謙先抽一口氣，然後同韻喬好坦白咁分享自己嘅想法「即咁講，小喬。如果你問我，我話完全冇唔開心、冇任何感覺嘅話，你都唔會信啦，係咪？」​

「或者，如果我話完全冇嘅話，都應該代表其實我根本唔夠愛你，因為畀人搶走自己心愛嘅嘢，我居然都仲可以咁豁達咁面對…」

「不過小喬啊，到依家其實我真係冇事，因為我知道小軒喺經歷過咁多事之後，真係真係對你好。所以我依家都希望，你地兩個可以好好生活落去，我仲等緊幾年之後飲你地嗰餐呢！」
 
「嘩！你真係使唔使講到咁遠啊？」韻喬冇禮謙咁好氣講「我同小軒先一齊咗幾日咋喎，而且話就話之前我喺班房應承咗小軒求婚啫，不過我點知小軒以後會唔會點啊？所以我都係應承住先咋！」
 
「你啊，今次追唔到我都唔好唔開心啊，如果真係有下一個目標嘅話，倒不如就好似依家你200米比賽咁，出盡全力去追啦。」韻喬再一次勸勉禮謙





「不過到時喺你出pool之後，你一定要帶個女仔畀我地見啊，知唔知道？」韻喬講完之後，禮謙就點點頭。
 
不過韻喬講完之後，都仲未走返去佢嘅位置，而禮謙都注意到韻喬仲喺度，於是就問「呃…小喬啊，你係咪仲有嘢想同我講？」

「程禮謙，你心裏面其實對殷殷嘅感覺係點？」韻喬呢條爆炸性嘅問題差少少令禮謙招架唔住

「點……點解你會咁問我啊，小喬？」

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer