《我和她的故事》: 第五章：我和她不再是朋友
第五章：我和她不再是朋友...
就係咁淨返我哋兩個呆呆咁企係到，電話係我褲袋入面震咗一震，我拎起部電話，只見到呀杰sent 咗個咁嘅message比我。
「兄弟，唔好話我唔成全你呀，同人表白啦。」後面仲要加咗個emoji。
「痴線，咪玩啦......」呀杰果然係我兄弟，知道我心入面都真係咁諗......
「你塊面咁紅嘅？」佢突然開口，我都唔記得佢係我隔離添......我口裡說不，身體卻很誠實。
「冇，見到靚女姐......」我好自然咁拋低依句嘢......
今日嘅佢，着咗一件碎花裙，孭咗一個紫藍色嘅袋仔，成熟得嚟，又帶幾分稚氣。
「有咩，依度得我哋兩個咋喎！講緊我？」佢得戚咁講。
「唔知呢？」我答佢。
「哼，唔理你......」佢將佢美麗嘅面孔擰埋一面。
「Sorry呀，對唔住呀靚女。」我企係佢後面道歉。
「哼！」佢蠻不講理，無視我嘅道歉，成個港女咁向前行。
我唯有使出我嘅招數應對佢。
「最多請你食嘢啦......」 我故意提高聲線大聲咁講。
「好啊！食咩呀，其實你應該一早咁講喇，送咗個銀包比你，你起碼要請我食返幾餐飯啦，仲整到我隻手損晒......」佢個口連珠爆發，嘟起個嘴，眼睛水汪汪咁望住我，向住我撒嬌。
面對連環嘅勾魂攻擊，我最終敗陣......
「多謝喎，咁大方。」明明就係佢屈我請佢食飯......
「唔駛，你鍾意咪得囉。」望住一碟碟高貴嘅魚生，送過嚟我哋張枱到，我感覺到我銀包喺到喊緊。
正當我諗住拎起筷子食嘢嘅時候，
「喂呀，唔准食呀，等我影埋相先啦，你幫我影啦。」佢遞佢部電話比我。
我反一反白眼，攞咗佢部電話幫佢影。
影影下，部電話自動熄咗機，又要重新解鎖...... 「又嚟喇，好心就整個啲設定先影相啦。」我無奈咁講。 「你過嚟呀......」佢笑道。
我行埋佢心諗佢搞乜花臣，突然佢拎起我隻手，將我隻手指擺係指紋解鎖嘅果個位。突然將我拉埋佢身邊，我感覺到我心跳加速，並同時有咗生理反應，佢將我隻手指係指紋解鎖個位來回兩三次之後... 「咁咪得囉。」佢奸笑道。 「唔...」我尷尬回應道，我仲未反應到頭先發生咗咩事...
影多咗十分鐘之後，終於影完，我就好似工具人一樣，任佢魚肉。不過唔知點解，我唔識拒絕佢。
「唉，食到好飽呀。」我話，擺明就暗示佢唔好再嗌嘢食。
「係咩？我仲可以食埋甜品先喎。」佢一臉天真咁講，擺明就唔明我暗示。
「唔該要兩件芝士蛋糕！」佢舉手叫道。我心諗，佢都幾識照顧人，居然幫我嗌埋，（雖然用我啲錢）
隔咗一陣，侍應拎咗兩件芝士蛋糕過嚟，我伸手拎咗一件
「做咩呀你？」佢一臉詫異咁望住我。
「吓，攞蛋糕食囉。」我回答。
「要食就自己嗌啦！」佢就係皺起條眉望著我，佢嬲嘅時候都幾可愛。
「吓，你唔喺幫我嗌埋架咩。」我問。
「我自己食架，我要食兩件......」真陰毒，眼淚喺眼框裡打轉，求我比返佢食兩件，真係囉依個女人無辦法。 我唯有拎返比佢，同時拎部電話出嚟，諗住等佢食埋先。
「你慢慢食啦。」我講。
「唔。」佢答到。
見到電話呀杰問，點呀？進度如何？ 我Sent咗個反白眼嘅emoji比佢。
「走啦！我食完啦！」佢話，舉起V字嘅手勢。
「好呀，終於食完嚕。」我深呼吸咗一下。
「好啦，行啦！去摩天輪，好想去個邊影相。」佢又擺出可憐嘅表情。
「行啦，行啦，傻妹。」我用平時老豆嘅語氣同佢講。
行到中環嘅行人天橋嘅時候，出面太陽完全被人遮住咗，灰雲滿佈，就好似隨時都會落雨咁。
果然，當我哋離開咗行人天橋嘅時候，一粒一粒綠豆咁大粒嘅雨水晒落嚟，我諗都唔諗就喺我嗰「百寶袋」拎咗把遮出來。 我將把遮擺喺，我哋兩個之間，但係發覺佢瞇起隻眼，睇嚟係啲雨水，我唔忍心見到佢咁，我將把遮向佢挪移半個膊頭令佢可以見到前面，佢主動拖住我隻右手，身體傾向我。
我同佢有咗肌膚之親，感覺上就連關係都隨之升級。
唔通依場雨，係上天為我預備嘅？
「想和妳一起撐傘漫步雨中 默默牽手走過 」原來歌詞入面嘅故事都會成真......
旁人望過嚟，我哋就好似一對熱戀中嘅情侶，互相依靠對方，溫馨咁拖住手，喺浪漫嘅雨中漫步。我同佢唔通都可以有一個美好嘅結局？
行到摩天輪，落雨嘅情況好似慢慢變好，一絲嘅陽光奮力係灰雲中照落，摩天輪上。唔通依個係上天俾我嘅啟示？我同佢狼狽拎住把遮，咁行咗喺摩天輪下，匆匆忙忙咁喺嗰度買咗飛就上咗去。
「你左邊膊頭濕晒喎，Sorry呀，最衰都係我冇帶遮。」佢委屈咁講。
「唔緊要啦。」傻啦，你唔帶遮我仲開心啦。
「我幫你抹返。」佢說罷就喺佢個袋度拎張紙巾出嚟。
我呆呆咁坐係到，佢就好似女朋友照顧男朋友一樣，體貼咁幫我抹走身上嘅雨水。
突然，佢比地下嘅雨水滑倒，僕倒在我的身上，我哋兩目交投望住對方，我哋越靠越近，最終我哋錫咗對方。
佢嘅櫻桃小嘴十分紅潤，我錫佢嘅時候就好似，就好似......我唔識形容，總之錫到女神，係我一生人都冇諗過會發生嘅事。所以我決定咗一生人最瘋狂嘅事。
「咳咳，」我清一清喉嚨。
「欸...欸...我鍾意你，可唔可以做我女朋友。」我支支吾吾咁講。
「可...可以。」佢擰埋一面細聲靦腆咁講。
我和她不再是朋友，而是男女朋友.......