序章  那些年那些事那個該死的開學禮
   「吱……」伴隨住機器啟動嘅尖銳聲音響起,滿帶動感嘅音樂亦都徐徐奏起。
  滿載住小朋友歡笑聲同遊人嘅嬉鬧聲,一堆名為「木馬」嘅海洋生物造型塑膠物背負起一個個遊玩客喺度迴旋住上下顛簸,大家都將呢舊大型機器稱為「迴旋木馬」。
  一對十零歲嘅小情侶依偎住坐喺馬車造型嘅「木馬」入面,男仔青澀嘅臉上寫滿咗不情願嘅表情,但都係伴隨住身邊嘅小女伴坐上呢舊「馬車」上面,然後望住身邊嗰位稚氣未除嘅小女伴掛滿一臉咁高興,自己都忍唔住笑咗出嚟。
  男仔微笑住攬實女仔嘅膊頭,同佢一齊投入其中。
  就好似嗰陣時嘅我哋。

 沿途如能叫你一早叫到沙啞 高呼一個密碼幾百萬名字裡誰是你誰讓我查 
只想你我幸運到令天地 害怕」––《兩個人的木馬》梁詠琪




   嗰一年,喺呢度,我哋就係咁樣開始。
  2004年,嗰一年,我中學四年級。
  一個唔鍾意返學嘅少年,考入咗文科班嘅第一日。
  喺會考存在嘅年代,大概大部份學校都總會有幾個中四轉學過嚟嘅學生。而呢啲學生往往就要努力地去融入新嘅環境認識陌生嘅同班同學們,喺新嘅歷險旅程裡尋找新嘅伙伴。
  畢竟,最少要同眼前呢堆茂利相處兩年,關係搞得太差真係唔係咁好。
  所幸,這啲都與我無關。
  反正我一直都唔係點努力融入班上面嘅任何圈子。既然唔想返學,大個之後亦都唔指望與這啲人有乜嘢交集。
  既然唔想好似佢哋咁樣係咁咪書,亦唔想好似他們一樣討論埋啲乜嘢膚淺話題,咁最好就係自己摺埋啦。

 「我太低調 便令世間太寂寥 


是嗎
我太高調 又冒犯你高貴教條 竟使你發燒」––《前前後後左左右右》謝霆鋒

   至少當時我係咁諗,畢竟嗰個年紀又有邊個知道自己將來會有懷念返學日子嘅一日呢﹖
  就喺我好似前面三年咁,入到課室第一時間就伏喺木枱上面準備同周公請個早安嘅時侯,班主任Miss鄭把聲已經由門外面傳入嚟喇。
  「點解會係佢㗎﹖」呢個係我當時嘅第一個諗法。
  Miss鄭係當時校內聞名嘅「殺手級」訓導,當時嘅我同她打交道嘅機會真係唔少。彼此睇唔順眼對方自然點睇都唔會順眼,積落嘅仇口亦自然唔會少得去邊啦。
  「點呀明知安,返學第一日就開始瞓嗱﹖」Miss鄭率先向我開炮。
  「返學第一日就瞓同第二日第三日先開始瞓有分別咩﹖」我抬頭反問一句,又再伏喺枱面。
  事後我先知道,呢個係佢對我嘅第一印象。
  至於呢個佢,就梗係唔係講Miss鄭啦﹗


  「而家各位同學坐好先,陣間重新分配位置。」Miss鄭嗰把近乎刺耳嘅聲音又再響起︰「依家先介紹新同學……」
  呢個時侯,響起咗一眾狼狗嘅吼叫聲……吖唔係,係一眾男同學嘅歡呼聲。
  基於雄性生物共鳴,我亦都抬起頭喇。
  兩個未見過嘅女同學就企咗喺Miss鄭身邊。
  「安靜……」Miss鄭隨便鎮壓吓一眾厹發情嘅吼叫,就話︰「呢位是陸敏詩。」

清晨下了一場雨 露水沾濕了小茉莉白色花瓣
 純潔又清晰地 聞著妳的呼吸」––《小茉莉》楊丞琳
 


  一個身型稍為有少少細粒,留住一個十幾年後以韓國為起點風靡全球嘅中髮髮型嘅女孩腼腆地點一點頭,俏麗嘅臉容加上當時稱為「老土」嘅髮型,再度引起狗公們發情嘅吼叫,迫得Miss鄭再度出聲鎮壓。
  而大家亦都相當配合,但我頗為肯定大家嘅配合並唔係因為Miss鄭嘅威壓而是因為另一位同學嘅外貌。
  十幾年後,我知道呢一款外型喺IG或者各大平台,大家都會稱呼為「女神」。
  而我印象中,大家都係咁樣稱呼她嘅。
  「呢位係安知命。」高妹,長直髮大眼睛,只要笑起上嚟你就會被吸引住嘅五官設計,足以令班上這班死人Kai子瘋狂。
  「大家好,我係安知命。」咁樣三個字,溫柔嘅聲音配上顛倒眾生嘅微笑,足以令Miss鄭嘅鎮壓失效。



 唯獨是天姿國色 不可一世 天生我高貴艷麗到底顛倒眾生
 吹灰不費 收你做我的迷」––《芳華絕代》梅艷芳、張國榮
 


  「嘈夠未呀﹖」見到我嘅老對手失威,我亦都冇話唔幫佢一把嘅,連忙就喝了一聲。
  作為被大家盛傳嘅不良學生,我的呼喝似乎係有用嘅。
  畢竟你唔怕俾人罰,咁你怕唔怕俾人揼吖﹖
  而我必須澄清,我唔係壞,我只係唔鍾意返學、唔鍾意跟死書蟲交流,而脾氣又咁啱差少少啫。
  Miss鄭望住我嘆咗啖氣,對佢兩個話︰「嗰邊有兩個空位,你們坐住嗰度先啦。」
  喺開學日嘅第一日,大家都係自己搵位坐,而大家亦自然會同自己圈子嘅人坐埋一堆。
  唔鍾意參與入去佢哋圈子裡面嘅我,自然就係喺班入面最角落頭嘅位置佔山為王,又咁啱冇人會坐去我附近,兩位新同學也自然坐咗過來。
  安知命一馬當先,後面跟著陸敏詩,令我一剎那錯覺就像看到古時侯啲千金大小姐帶住丫環出遊一樣。
  我懶理班上面啲狗公嘅妒忌目光,又再伏喺枱上面準備瞓返一覺,以免開學禮要喺站立中渡過。
  安知命好似戴住光環咁坐去我旁邊,似乎意識到邊個能夠幫她有限度隔絕狗公,等她保持適當距離「收兵」。
  陸敏詩就坐正我前面,同安知命互為犄角咁樣圍繞著我。


  「明知安﹗」Miss鄭又嗌我︰「唔好瞓喇你成日都瞓覺,同新同學認識一下,轉頭就開學禮喇。」
  「喂你個人咁樣嘅﹖」呢個係我當時第一個諗法。
  咁樣就可以禍水東引由我來擔起保護兩位新同學嘅職責,去擋隔發情狗公與妒忌惡女們嘅滋擾。
  我既唔想賣她的帳,也無謂直接伏低落佢嘅面,於是乎只好坐直個人,喺褲袋裡面拎返我保留到今天嘅松下MP3機聽歌。
  Miss鄭似乎滿意我嘅讓步,將我第一日就將違禁品帶返學校仲當她面直接用嘅事當睇唔到,自己用尖銳嘅聲線去打壓眾人嘅惡意投訴去同佢哋講會考這壇嘢到底有幾恐怖。  我索性將MP3機拎到手上面玩,望住屏幕上循迴著嘅「回到過去–周杰倫.mp3」喺度發吽呌。

 盞黃黃舊舊的燈 時間在旁悶不吭聲 寂寞下手毫無分寸 不懂得輕重之分
沉默支撐躍過陌生 靜靜看著凌晨黃昏 妳的身影 失去平衡 慢慢下沉」––《回到過去》周杰倫 


  「咦﹖你也鍾意周杰倫㗎﹖」安知命一手掹甩我一邊嘅耳機戴落自己耳仔度,然後熟練地托住個頭遮擋耳機垂落嚟嘅線,另一隻手伸出來微笑對我說︰「你好明知安,我叫安知命。」
  對於呢一種拉仇恨嘅行為,實在令我產生唔到乜嘢好感。我對住她笑一笑,然後同前面嘅陸敏詩說︰「你呢﹖你鍾意周杰倫嗎﹖」
  陸敏詩愕咗一愕,似乎意想不到我會同佢講嘢,傻更更咁將個頭擰咗過嚟,又大大力咁點咗好幾下頭,先至話︰「鍾意。」
  睇見佢可愛嘅表情,我都不禁失笑,剝低仲戴住嗰一邊嘅耳機遞俾她話︰「想聽嗎﹖」
  Miss鄭老遠咁啤咗我一眼,又再當做睇唔到。  陸敏詩又再呆咗一陣,就話︰「可以咩﹖不好啦……」然後又面紅紅把個頭擰返過去。
  呢個時侯,一直出力同我拉仇恨嘅安知命又再下一波攻勢,竟然哄過嚟我耳邊好似斟密計咁話︰「你唔想同我做朋友咩﹖」


  我啤咗佢一眼,就話︰「你真係喺度同我做朋友咩﹖」
  安知命「噗嗤」咁笑了一聲,亦都唔回應。
  我就當做佢係默認咗拎我做擋箭牌這回事喇,於是我話︰「你個人都幾有自信噃。」
  「係呀,我好有自信㗎。」她自豪咁笑笑,然後好自然咁搶咗我手中嗰個當時仲係新品嘅MP3機,搏命咁㩒掣瀏覽緊我嘅歌單。 
已有 0 人追稿