關於我女朋友將我塞俾佢兩個好姊妹既事: 章二 那些年那些事那次該死的選班長
章二 那些年那些事那次該死的選班長
重新編位自然有人歡喜有人愁。
安知命一直伏喺我膊頭度笑，間接令到整個分配顯得更加刺激。
畢竟明明可以置身事外食花生嘅我而家被她拉埋落水，我喺心裡面都唔知道鬧咗安知命幾多次喇。
「喂喂……」我望住伏喺我膊頭嘅安知命話：「你都夠晒皮啦吓話？」
「Sorrysorry……」安知命坐返直個身，但係就一直遮住個嘴喪笑。
場面繼續驚險刺激，Miss鄭貌似不規則咁安排座位，但仍然可以睇得出一定規律，男女人數雖然唔平均又以女仔佔大多數，然而男生旁邊嘅同學始終都是女仔，換言之，坐我斜角位置嘅如無意外都會係男仔。
「你！第三排第三個！你！第二排最後！」
明顯地，大家都知道心目中嗰塊「風水寶地」要留到壓軸，於是越係去到後面俾人嗌名嗰啲人慘叫聲越係淒厲。
到最後，就剩返霍耀興、沈懿芯同另外兩條友。
望住最後兩個男仔互相敵視嘅眼神，班上面嘅其他人已經好難忍得到笑。
「喂！」安知命問話：「不如賭吓最後係邊個坐呢度？」
「點賭法先？」我問。
「如果我贏咗，你借部MP3機俾我一日。」安知命話：「到聽日再還返俾你。」
「如果我贏咗呢？」我問返佢。
「我陪你去玩一天，去邊都得。」安知命好自信咁話。
「唔得！」陸敏詩忽然擰轉過頭過嚟話。
「為什麼你在意誰陪我逛街 為什麼你擔心誰對我放電
你說你對我 比別人多一些 卻又不說是多哪一些」––《戀人未滿》S.H.E.
睇見我同安知命愕然嘅表情，陸詩敏面都紅晒咁話：「呢……個唔對等喇，對他太好喇……換個對等啲嘅……」
安知命「噗嗤」一聲笑咗出嚟就話：「一係……你去陪他？」
陸敏詩冇想過咁樣俾人將咗一軍，即係耍手擰頭話：「唔使喇……」即刻將個頭擰返過去。
「咁樣啦……」我話：「如果我贏咗，你就唔好將啲火力再辣晒埋我度喇……」
安知命笑住咁話：「乜你咁驚我咩？」隨意擺出一副委屈嘅表情就話：「如果我同其他同學講你恰我，即使係你都會好麻煩㗎可？」
「你咁就過份咗啦吓話？」我話。
「咁啦……如果你贏咗，我為你辦一件事，現在諗唔到都冇所謂。」安知命話：「之後再告我知都得，反正唔過份的話我都可以。」
「好啦……」我話：「咁你覺得係邊個？」
安知命指咗一指霍耀興就話：「我估係嗰個肥佬。」
我話：「我估唔會係男嘅。」
就喺呢個時候，仲企喺度嘅就只剩返霍耀興和沈懿芯。
霍耀興一副勝利者嘅嘴臉，似乎坐過嚟呢邊已經係實食冇黐牙嘅事。
安知命伸隻手出嚟話：「攞嚟。」
副班主任王老師似乎亦都睇得出中間有古怪，開始留意住我哋呢個方向。
「霍耀興！」Miss鄭指住一個座位就話：「你坐近門口啦…」
「咩話？」霍耀興嘅表情好似食咗一噸烏蠅咁樣：「點解呀？」
「咩點解呀？」Miss鄭話：「到底由幾時開始老師編位都要跟你們解釋呢？」
「睇嚟今晚可以聽一陣歌先瞓。」我望著安知命隻手話。
呢個時侯，沈懿芯已經攞住自己嘅書簿坐咗過來。
近距離觀察，老實講，沈懿芯生得都真係幾靚，雖然比唔上安知命靚得咁鬼驚天動地，但至少喺陸詩敏旁邊絕對一啲都唔輸蝕。
沈懿芯擰過嚟同我講話：「明知安，我唔知道你嘅態度係點嘅。但希望之後嘅日子你唔好騷擾到我上堂，否則我一定會向老師投訴。」
「週遭有一些人 沒事就喜歡放屁 覺得認為有錢 人生才會有意義不想回答問題
就說我是個笨蛋 才遲到十五分鐘 跟大家說我懶惰」–––《放屁》張震嶽
「你冇病吓話？」我啤咗她一眼話：「我都是今日先算正式認識你而依家係我哋第一次對話。你點解就覺得自己有咁大吸引力值得要我花時間騷擾？」
沈懿芯俾我咁樣窒咗幾句，當下顯得理虧，「哼」咗一聲又擰返過去。
陸敏詩望望身邊嘅沈懿芯，又望望我，對呢個突如其來嘅衝突顯得有啲手足無措；反而安知命就好似食花生放題咁，嘴角早已失守。
Miss鄭把好拆嘅聲又再次傳出嚟：「跟住落喛要選班長喇，沈懿芯！」
沈懿芯抬頭望一望Miss鄭，只係聽見Miss鄭又話：「你嚟做女班長。」
「老師，唔係選班長咩？」霍耀興就問。
「係！由我選！」Miss鄭話。
霍耀興「嘖」了一聲，話：「搞埋啲小圈子選舉。」
「你說咩呀？」Miss鄭立即暴跳如雷就話：「攞本學生手冊出嚟！扣操行分兩分！」
霍耀興好唔憤氣就話：「好！我俾你！」 而呢一刻，大概我呢一世仔都會記得呢一幕。
我莫名地憤怒，即刻企咗起身，掹咗我嗰本連名都未填上去嘅學生手冊出嚟就話：「扣埋我啦咁！」
Miss鄭大概冇諗過我會咁樣跳出來將自己捲入呢壇嘢入面，擘大對眼掘住我話：「做乜嘢啫你？」
我指著霍耀興話：「我唔妥呢條友，亦認為沈懿芯足以勝任，如果有選舉我一定會支持佢。」我一路講一路走到去Miss鄭面前，用力將學生手冊丟上教師枱上面話：「要扣操行分缺點小過大過停課甚至退學隨便你，反正如果一個班長係咁樣當選，我唔同意。」
「我唔同意！」「我都唔同意！」 平日同霍耀興來往甚密嘅幾個男仔亦都紛紛站晒起身。
「我很樂意為同學服務，但我以呢種方式當選的話，請容許我拒絕。」沈懿芯亦都企起身話：「而為了堅持呢個原則，我都樂於接受學校處分。」
跟住落嚟又有幾個女生企咗起身，就連陸敏詩也站埋起身，但係就成個人一路係咁震。
一直喺旁邊嘅王老師忽然開口話：「各位同學冷靜啲先……」
然而大家望咗佢一眼，佢又安靜了。
「我諗老師嘅意思其實係想試試我們喺面對強壓下係咪仲能夠堅持原則係嗎？」安知命忽然開口，望著Miss鄭好大聲咁話：「我講得啱唔啱呀？老師？」
自帶光環嘅安知命咁樣一開口，熾熱嘅氣氛忽然安靜咗落嚟。
當時我都實在好奇點解安知命會為Miss鄭解圍，畢竟以我對Miss鄭嘅認識，呢種唯我獨尊嘅事佢做得唔少而且樂在其中。
而後續自然就是舉行咗班長選舉，然後由沈懿芯高票當選。
但係呢一刻，唯恐天下不亂嘅安知命又企起身話：「只有一個人擔任班長的話似乎太折磨人喇，我提議選多一個同學擔任分擔工作，大家覺得點呀？」
班上又係一片歡呼，安知命又話：「若然大家都同意，咁大家又有乜嘢建議人選呢？」
安知命這麼一講，班入面又提出咗好幾個建議人選。而呼聲最高嘅，自然就係霍耀興啦。
我就真係唔想捲入去呢件事，所以唔出聲望住安知命帶動氣氛。
點知，安知命又話：「咁樣，如果我提議明知安呢？」
「我屌！」而家先發現俾佢咁樣跣我，我忍唔住當堂爆粗。
Miss鄭即刻喝我：「講咩呀你？」
安知命好淡定咁話：「老師，明知安佢自己都講佢要做喇，如果各位同學都願意同我一樣支持佢的話，請投佢一票啦……」
呢個時侯，我睇見霍耀興嘅眼神充滿對我嘅感激同信任，我心入面忍唔住講咗句舐嘢，又聽見他都咁講：「單單就剛才明同學仗義執言一事，我相信明同學一定能夠做好呢個位置。如果是明同學，我願意退位讓賢，全力支持明知安。」
那一刻，我心中想法只有四個字：「屌你鹵味。」