關於我女朋友將我塞俾佢兩個好姊妹既事: 章四 那些年那些事那個該死的學生會
章四 那些年那些事那個該死的學生會
距離開學日嘅時間已經過咗一個星期。
喺呢個星期，我每日都沉浸喺同陸敏詩每晚嘅網絡對話中，亦對佢了解得更多。
而佢對我嘅態度，亦都漸漸變得熟絡起來。
一開始我哋都喺度彼此試探，傾吓返學日子嘅事，漸漸變成了解大家嘅過往或者興趣之類。
「雨下整夜 我的愛溢出就像雨水
窗台蝴蝶 像詩裡紛飛的美麗章節
我接著寫 把永遠愛妳寫進詩的結尾
妳是我唯一想要的了解」––《七里香》周杰倫
當然，手機又係另一回事啦。
安知命每晚都會sent SMS俾我，問埋一啲同陸敏詩一樣嘅問題。
當然，對於安知命呢個死港女，我嘅態度就冷淡得多喇，基本都鍾意答就答唔答就唔答嘅回覆。
畢竟喺當時我嘅意識入面，安知命係非常需要提防嘅。
「有你每晚會遇害 無人陪我更自在
有你怕會喝倒彩 開心竟變哀」––《唔該行開》趙頌茹
而作為我曖昧對象嘅陸敏詩，亦知道咗安知命嘅行為，又當我話佢知安知命係咁喪sent SMS俾我，佢即刻會變得好冷漠。
嗰陣時作為戀愛初哥嘅我，顯然覺得咁樣好好玩。所以每次講到一啲嘢感覺陸敏詩想要扯開話題嘅時候，我一定會以安知命嚟刺激吓陸敏詩。
只係當時嘅我都估唔到，後來會引起幾大嘅麻煩。
而隨住開學日嗰幾日半晝返學時間過去，學校亦漸漸回復返全日制返學時間。
不過，自從開學日「對食」過後，我同陸敏詩都冇再一齊食過飯。
因為父母嘅體貼，我又返返去每日雪櫃叉燒嘅日子。
然而喺學校度，形勢卻係峰迴路轉。
上緊堂嘅時候，如同我初中三年，我積極咁向周公學習。
但偶爾會俾沈懿芯拍醒，或者安知命會喺我隻手度畫畫，又或者喺我啲書上面畫咗一個又一個長頭髮女仔。
安知命對我嘅熱情舉動似乎引起咗唔少人嘅注意，而喺校內人際關係早已經負數嘅我，自然成為唔少人嘅話題。
當然，我並唔在意。畢竟無論負一負十負一百都係負，我又點會怕負一千呢﹖
「看吧 隨便看吧 看我 讓你很快樂嗎 落力望 盡情來八卦
看吧 由上至下 要繼續看左與加右嗎 望夠就出去造謠吧」––《你看我看你》謝霆鋒
而事實上，佢嘅舉動也像觸動了陸敏詩嘅逆麟。陸敏詩每次見到佢喺我身邊出現，就會走過嚟同我講一啲並唔重要嘅嘢。
或者，呢個就是佢一種宣示主權嘅方式。
當然，可能將來嘅IG女神們都有一眾粉絲護航，所以可以臉皮薄啲都冇相干。
但作為2004年嘅女神，安知命有一點係比較強嘅，就係臉皮夠厚。
喺一次小息，一個我想不到嘅衝突發生喇。
正當我由男廁行出嚟，就見到安知命同陸敏詩企埋一齊。
「點解我每次搵明知安你都喺附近架呢﹖」安知命話。
陸敏詩冇理佢，反而走過嚟話︰「我哋……落去行吓﹖」
我望咗一眼安知命，見她啤著我，仲愕然緊嗰陣，安知命已經嗌︰「明知安﹗」
我望咗佢哋一眼，有啲不知所措。
陸敏詩拉咗我嘅衣角一下，似乎想要拉我走。
安知命都看到佢呢下動作，即刻話︰「你拉住佢做咩呀﹖」
呢種場面，而家嘅我當然知道該表明態度。
不過當時嘅我，就淨係識得好似碌杉咁棟喺度。
忽然，背後一隻手搭住我話︰「喂明知安，傾兩句啦﹗」
我即刻擰轉頭一望，竟然係霍耀興。
佢一嘢拉咗我入男廁，即刻話︰「唔好出去﹗」
「點呀﹖」我以為佢要同我打交，立即提高警覺。
但係霍耀興笑住口咁話︰「上次開學你幫過我，呢舖我一定撐你。你唔好出去住，外面有沈懿芯幫你頂住。你而家出去只會令到場面更加尷尬。」
「佢﹖」我有啲愕然。
「上次你嘅仗義她都好感動。」霍耀興拍一拍我心口話︰「大家都係同學，以前大家都誤會你喇，以後我哋就是朋友，不如好好相處啦﹗」
我望住佢，苦笑咗一下。實在諗唔到，會以咁樣嘅形式喺呢間學校嘅第四年識到第一個朋友。
「喂老霍，外面OK喇﹗」呢個時候，隔離理科班嘅董晉跑入嚟男廁話。
「外面而家點呀﹖」我問。
董晉托一托眼鏡話︰「你阿……麻煩喇。」
「點呀﹖」我道︰「你唔好講啲唔講啲啦……」
「我都唔知你點諗嘅，一邊同陸敏詩每晚都喺度MSN，一邊同安知命每晚都喺度SMS……」董晉咁樣一講，我心頭不禁一震，睇嚟佢哋都將自己同我嘅經歷爆晒出嚟喇。
董晉又話︰「你條粉腸到底諗啲咩架﹖沈懿芯啱啱將安知命引開喇，你出去收拾殘局啦……」
我即刻衝出去，就見到陸敏詩企咗喺度，不停咁流眼淚。
呢一刻，我真係心痛到入心入肺。
我都唔知道點解會咁夠薑，忽然衝過去攬住咗陸敏詩話︰「對唔住呀你受委屈喇。」
「我害怕你心碎沒人幫你擦眼淚
別管那是非 只要我們感覺對
我害怕你心碎沒人幫你擦眼淚
別離開身邊 擁有你我的世界才能完美」––《暗號》周杰倫
呢個時候先發現自己草率已經太遲喇，我即刻鬆開後退，就發現陸敏詩呆咗咁望住我。
更大獲嘅係，剛才嘅事動靜雖然唔係咁大，但係同級嘅同學有唔少都走咗出嚟睇熱鬧。
而呢一刻，佢哋都望住我。
霍耀興跑出來話︰「拍硬檔，大家俾啲面我老霍，呢單嘢唔好爆出嚟。」
他嗰班黨羽亦都走晒出嚟安撫其他同學。
所幸霍耀興人緣本來就唔錯，大家亦都喺呢一刻拍晒心口話冇問題。
只係我並冇留意到這點，嗰一刻我個腦直頭空白一片望住陸敏詩。
而陸敏詩只係微微一笑，又搖一搖頭。
但我發現，她已經冇再喊喇。
小息過後嘅兩堂中史堂，我繼續沉醉於睡夢中。
而同之前唔同，安知命這兩堂並冇做過乜嘢，而沈懿芯亦都冇拍醒我。
我安祥地瞓覺，如同過往嘅日子中。
兩堂時間好快過去，跟住午膳鐘聲響起，我亦都起身準備食晏。
「明知安。」沈懿芯向住正準備離開課室嘅我話。
「做咩呀﹖」基於剛才嘅事，我對佢嘅態度亦都相對溫和。
「傾兩句﹖」沈懿芯話︰「搵個冇人嘅地方。」
我諗應該係講剛才嘅事，於是都直接答應，跟住沈懿芯去咗天台。
呢度平日係學生嘅禁地，平日我成日都嚟。但係跟住作為模範生嘅沈懿芯上嚟，始終令我有啲詫異。
沈懿芯似乎察覺咗我嘅諗法，笑住口話︰「你估唔到的嘢仲有好多﹗」
我跟住她行到天台，她坐喺地上面話︰「你覺得我點呀﹖」
「吓﹖」我愕然咁話。
「我話……你．覺．得．我．點．呀﹖」沈懿芯一個字一個一字咁跌出嚟，彷彿喺度迫緊我回答。
「乜嘢點呀﹖」我坐喺地上面，手法純熟咁喺褲袋拎包煙出嚟塞咗一枝入口度話︰「成績好品行好之類嗰啲啦……做咩呀﹖」
「我比較安知命同陸敏詩呢﹖」沈懿芯又問。
我愕然地擘大咗個口，口入面枝煙不自覺咁跌咗落地。
當時嗰一刻，我個腦又再一片空白。
這個係我由頭到尾都冇諗過嘅事，我執返飛煙擺入口度點著佢話︰「你唔覺得我哋之間有好遠嘅距離咩﹖」
「我曾經都係咁樣覺得。」沈懿芯話︰「不過而家冇咗呢個感覺lu，你唔係我哋想像中嗰種垃圾。相反，你好有頭腦而且好有理想，只是唔鍾意返學啫。」
「點解咁講﹖」我呼出一口煙話。
「當然不只咁簡單。」沈懿芯話︰「我秘密觀察咗你一個禮拜。」
「吓﹖」呢個確實有啲出乎我意料。
「包括你和陸敏詩食飯嗰一日。」沈懿芯話︰「即使你對感情嘅處理很單純。但呢幾天上堂我都一直觀察緊，你總係適當地同所有人保持距離，但明顯任何人嘅舉動你都有留意住。」
「所以呢﹖」其實我真係唔鍾意俾人咁樣睇透嘅感覺，亦都不禁皺起眉頭。
「我想你帶住陸敏詩和安知命加入我們嘅學生會內閣。」沈懿芯話︰「咁樣選舉我哋能夠有必勝把握，事成之後，我會話你知安知命嘅目的。」
我嘴角不自覺勾起一個詭異嘅微笑。
「否則你早就冷漠拒絕咗她，不至於發生今日嘅事啦﹖」沈懿芯微笑住話︰「唔好對我有戒心，真心講我對你好有興趣亦都想加入呢場爭奪戰。」
我聽住不禁皺一皺眉。
「至少唔係而家。」沈懿芯講講吓企咗起身話︰「咁樣……lunch後見。」