【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 18
時間回到早上，鍾隨心與他吵架後。
她被李彤帶到學校圖書館，坐在兩人當初相遇的最後一行書架，嗅著幽幽清香的香薰蠟燭，伴隨著寧靜的音樂，她的心似乎亦平靜了少許。
聽著時鐘滴答響，思緒放空如一尊石像，就這樣呆坐到了午息時間。
李彤匆匆回來，略帶興奮的揮動手中的通靈紙「咁樣我哋就可以溝通到啦!」
鍾隨心看著通靈紙，將手指放在想說的字上「剛 才 謝 謝 你」
李彤似乎有些茫然，看著她表情的鍾隨心疑惑側過頭，李彤尷尬的咳嗽了一聲，從校裙袋中拿出在小賣部借的豉油碟「咁樣溝通好似同我想像中有啲唔同…」
隨後李彤立刻在附近找尋紙和筆，態度像個準備做私人訪問的記者，再鍾隨心面前盤膝而坐。
「話說你識得劉世檜㗎?你係佢啲靈界朋友?」
鍾隨心看著通靈紙，在茫茫字海拼砌出回應「算 是」
可是與他的關係究竟算是什麼，感覺超越了朋友之間的關係，認識卻不深厚，算是同居友人…嗎
「曖昧對象…如果我不是鬼的話…」看見眼前揮著手的李彤，鍾隨心把思緒拉回現實。
李彤說著 「我先係問…你哋頭先做咩嘈交嘅?」
鍾隨心耐心地找出當中的字，慢慢將它拼砌成一句句子。
「在我身旁，會變不幸，惡病纏身。我是故意，想離開他。」
鍾隨心抱膝而坐，李彤親切的問著她接下來的打算。
我也不知道，也許尋找，自己的記憶。
李彤在紙張一直記下她的回覆「係喎，講起上嚟，你叫乜嘢名? 定係呢啲嘢唔可以問你?」
「鍾 隨 心」
看見這個名字，李彤瞬間睜大了雙眼，像是聽見什麼不可置信的詞匯，再三確認自己聽到的回答「 …鍾隨心?」
這個名字她言猶在耳，最近的晚上經常會發類似的惡夢，李彤將那個夢境描述給鍾隨心，鍾隨心震驚，似乎與當初觸碰燈籠時自己所見的記憶十分相似。
倒臥在沙灘的場景，腹部染紅的少女，不斷呼喚自己名字的男聲，鍾隨心看著眼前的李彤，思索著是不是因為之前曾經附身過在她身上的影響，讓她能看見自己的記憶。
「講起呢個夢，有一樣嘢我唔知應唔應該講…每次我都會見到劉世檜。」聽到劉世檜三個字，鍾隨心更加專注了。
「我，見到係佢殺咗你…但係每次夢境入面，佢都好似有啲唔同，應該話係好蒙糊嘅形象，雖然見唔到個樣，但係唔知點解好肯定嗰個係劉世檜。」
「但係同時又會有一把聲好緊張咁呼喚你，嗰把聲都係劉世檜。」李彤支支吾吾，連他自己也不敢肯定這是夢還是記憶。
鍾隨心不自覺揞著嘴。
「我有諗過，你會唔會係我哋碟仙召喚嘅女鬼…但係… 」
「…嗰次喺圖書館外面，聽住佢講嘢，我就諗你哋係唔係…有啲特別嘅關係，例如情侶…」
鍾隨心連忙搖搖手表示他們不是情侶。
李彤輕輕一笑「我嘅意思係，佢點樣睇都唔似兇手…我頭先講嘅嘢，聽下就好。」
「其實我好羨慕你，就算死咗都有人咁在乎你，仲會有人關心你同你溝通。」見氣氛似乎有些沉重李彤連忙轉著話題。
赫然間腳步聲靠近，坐在地上的李彤抬頭一看，余程天站在他的背後。
「你頭先做咩自己喺度講緊嘢嘅?」
李彤下意識收起了那張通靈紙「冇呀，我讀緊書嘅內容咋嘛。」
余程天手上拿著一盒筆「哦…呢啲係我哋班級唔要嘅筆，啱啱試咗全部都用到，我哋學生會用唔到咁多，就諗住畀你哋圖書館。」
說罷了他又拿出幾包餅乾給她「見你頭先直接入咗嚟圖書館…你應該未食飯，諗住入嚟畀啲嘢你填下肚。」放下之後他轉身就走。
李彤悄悄對鍾隨心說「 等我一陣，做番啲正經嘢先。」
說罷李彤盤點著捐贈的筆，並把他們分類，在當中鍾隨心看見一支筆非常眼熟，不自覺伸手捉去「係之前嗰個鬍鬚大叔…」鍾隨心拿著那支科學毛筆想著
專心盤點著的李彤此時疑惑地說「點解少咗支嘅…1 2 3 4」
鍾隨心驚訝地看著手上的毛筆，隨後緩緩把它放下。
「哦，原來喺度。」 李彤正想拿起
鍾隨心再次捉起那支筆，在李彤的視角，那支筆在驟眼間消失了，就像自己的眼花看錯，與此同時鍾隨心手上多出了若隱若現的一支筆。
兩人驚訝對望，開始反覆嘗試，鍾隨心試著捉起其他的筆，但似乎唯獨是這一支筆如此獨特。
李彤拿起紙張「不如你試下…寫唔寫到字?」
鍾隨心輕輕打開筆蓋，緊張地把筆靠近紙張…
「成功咗…」李彤驚訝地拿起紙張，墨水筆跡由淺到深，慢慢顯現在紙上，遠離自己視線再看的話，彷彿是一瞬間浮現出來…
她拿起紙張連忙跑到圖書館的另一邊，隨便找了一位同學詢問「…我見到呀。」
她們難以置信看著手上的那支筆。「你係咪要進化成為筆仙啦?」
「=.=」鍾隨心在紙上畫著
鍾隨心拿起筆寫著「話說，其實你也有人關心著你。」 畫了一個笑臉
李彤似乎更加愁緒，重新坐了起來「…你係講，余程天?」
「原來你知道，O.o」
「點會唔知，我冇咁遲鈍…」
「但係就係咁樣我先煩。」
「點解?」鍾隨心寫著
「其實…我，係個好自私嘅人。」
「其實我過嚟關心你…都係有啲私心。」李彤看了一眼鍾隨心。
李彤拿出放在身後的通靈實錄「我一直都試過好多方法，試下可唔可以同鬼溝通。」
「聽講余程天識得請碟仙，我先專登搵佢…點知佢會鍾意我，我本身就對佢冇意思。」
「咁樣都唔係好自私啫。」紙上再浮現一句
「…我原本係想通靈搵我嫲嫲，幾個月前佢癌症過身。」李彤娓娓道来…
「我記得佢死之前嗰晚，我一直溫緊書，佢要去廁所，我就扶住佢，嗰刻我感覺佢唔似一個人，嗰種感覺好奇怪，完全毫無生機，佢成個人用唔到力，扶喺我肩膊嗰一刻，特別沉重。」
「明明平日佢係最錫我嗰個，但係佢去世之前嗰幾日，經常亂發脾氣，扶佢坐喺廁所嗰一刻，我心裏面竟然諗住，好麻煩。」
「我好清楚記得，喺佢雙目無光嘅瞳孔，我望到自己嗰個一臉嫌棄嘅表情。」
「咁樣都唔算自私?」李彤聲音有些沙啞
「嗰一刻，我唔記得佢對我有幾咁好，第二日我後悔嗰陣，已經冇機會同佢講對唔住。」
李彤捉緊手上那本書。「佢個刻明明先係最需要人陪…」
「就算之後揾余程天，我都係有目的性，經常借啲意關心下佢，但係都唔係出自真心。」
「佢鍾意嘅只係佢心目中嘅我，我而家淨係可以扮唔知慢慢遠離佢。」
「我目的都只係想睇下佢會唔會幫到我，通靈到我嫲嫲出嚟。」
鍾隨心默默在紙上寫着「劉世檜講過，只有生前有好大遺憾嘅人，先會做遊魂野鬼，可能你嫲嫲已經飲咗孟婆湯，去咗安心投胎。」
李彤有些黯然失色「咁我係唔係冇機會，同佢道歉?」
鍾隨心望向窗外，概嘆一息在紙上寫着「人總會有遺憾，是無可避免的事。」
「但我相信，總有機會! 即使自己忘記，想做嘅嘢，一定會刻印喺靈魂深處，可能之後輪迴轉世你會再好好報答返佢!」
「你會咁諗，代表你也想補償他們。」
「所以另一個，我應該知道，你可以怎麼補償。」鍾隨心站起來，指着圖書館另一方。
李彤隨那方向看去，剛剛被老師責罵完的錢凱婷正在抄寫着校規。