回到家中,鬆開領呔,將校服按鈕解掉,大字型躺倒在床上休息,我回想起今日發生的事,中午巧遇同檯食飯,留堂一齊補默,放學去食下午茶,教佢玩皇室戰爭,之後一齊翻屋企,咁多事好似發緊夢一樣。

「點解今日好似發生得特別多事咁嘅。」我用手背放在自己額頭上面。

「唉,好攰瞓陣先。」眼看見鬧鐘時間五點九,說罷我便合上了雙眼小瞇。

.............

「醒喇,死仔,仲喺度瞓瞓瞓,唔洗食飯啊。」我啊媽喺度叫我。



「唔...依家幾點吖。」我半醒狀態捽緊眼角。

「八點半喇,仲瞓,衫又唔換,涼又唔沖,同你老竇一鬼樣,真係想激鬼死我先安樂。」

「唉,難得今日星期五,你唔好理我喇。」

「呀!你個死仔,我冇你咁好氣,快啲食埋飯去洗碗。」啊媽交代完就磅一聲關起房門。

「啊~哈~ 電話電話呢。」打著哈欠的我說。



「WTF未接來電34次。」電話裡頭顯示無數來電。

「佢地兩個搞乜鬼,打咁多次嚟。唔係喎.....等陣先,今日好似係...仆街今日係今個月第二次星期五,有世界boss啊。」我一想到快要錯過世界boss便急速從床上著地去開電腦。

註: 世界boss  係Jimmy打緊一隻電腦online game嘅boss,每兩個星期五夜晚八點九先會有一次的特殊活動,獎品極度豐富,搶到王又拎到幾率得0.04%晶片嘅可以當自己撿到現金大約一萬元,而依家我就嚟錯過時間。

「快啲開機啦。」我在電競椅上坐立不安。

開啟電腦輸入密碼後,趕緊打開遊戲,登入賬號,由於伺服器人數過多要等候,我在等待過程中先加入discord語音頻道。



「死人jim仲唔上線,就嚟打boos喇。」force激動地說。

「我都唔想架,五點幾諗住瞌一陣,一瞓醒哇頂你個肺就變咗八點半。」我解釋。

「得喇得喇大忙人,知你今日同女女食飯打機攰,唔得閒上線喇。」Andy已經知曉一切。

「喂,等陣你咩意思,講清楚啲。」force追問Andy。

「呢方面你問翻我地嘅大忙人林生啦。」這人是要徹底逼死我吧.......

「死人jim你解釋下好喎,唔係嘅話家法伺候。」force語氣沉重。家法伺候意指happy Corner,男人噩夢。

「唔係呢...唔係你地諗咁。」我試著解釋。

「唔洗講咁多,星期一直接將叛徒家法伺候。」force直接落斬殺令。



「唔好冷靜我講,我講喇。」我選擇求饒。

「罪人,依家就聽下你有咩辯詞,根據你嘅一言一語都將成為判斷你是否需要家法伺候。」force語氣非常沉重。

「嗱,事源係咁樣.......」我將今日放學所發生嘅所有事情一次性講完。

「嗯.. 無需審判,直接死刑。」聽完後的force語氣變得更加凌厲。

「吓,咁都要死刑,我咪話咗係咁啱好留堂補默遇到,之後佢話肚餓去食下午茶,我又咁啱肚餓喎,咪一齊去囉。」我對於自己被判死刑而感到無奈。

「罪人,等星期一再審判你,依家打boss先。」話咁快時間就嚟到八點九boss即將出現。

未完待續..............
已有 0 人追稿