我嘅初戀: 第一次見面（3）

我地叫嘅嘢食終於黎左啦。平時我都冇相機食先嘅習慣，所以啲嘢食一黎到，我地都即刻食嘢。果然肚餓嘅時候，食咩都覺得好好味。

係我地食嘢嘅過程中，我地都好似平時係Oxx同Whatsxxx到咁傾計，但唔知點解，我feel唔到同之前見面嘅男仔咁，有一種尷尬嘅感覺，覺得呢個男仔真係好talkative，過程中亦冇冷場。

食食下嘅時候，佢突然問我：「我地第一次見面就食呢啲，你唔介意啊可？」哇.... 佢呢句意思係咪以為我係港女？我覺得第一次見面就食泰國嘢已經好好。自己除左茶餐廳之外，覺得其他餐廳都好好味，就算見面食三哥米線都覺得好正。唔係話茶餐廳啲嘢難食，只係平時係茶餐廳叫嘅嘢食，屋企人都整到，而且仲好味好多，咁點解仲要特登出街食茶餐廳呢？如果第一次見面就食貴嘢嘅話，我反而會唔舒服添啊。

我自己好細食，平時係三哥食一碗米線，小米完之後都食唔曬。所以我食飽果陣，檯面上都仲剩好多嘢食，要拜託Gorden幫手清曬。Gorden笑笑口感話：「哇，仲剩咁多嘢食，如果每次同你出街都咁食法，我咪好容易變到幸福肥？你唔好養肥我啊。」唔知點解，我覺得呢句說話應該要出自男女朋友嘅關係想講得出，我依家都只係食唔曬啲嘢，唔想浪費，先麻煩你幫手清姐，如果你都食唔曬嘅...咁...可以打包咯😂😂😂😂😂 所以我都冇比反應佢。

我地餐飯大概食左一個鐘左右。冇計啦，我本身好肚餓，但好肚餓反而會食得更少嘢，所以我地餐飯好快就食完了。Gorden係都話要請我食飯，但我覺得第一次見面，點都係AA制好啲嘅，所以佢都放棄掙扎，我地最後都係AA制。因為見時間仲早，所以我地就係紅磡附近行下。由於我地兩個都好少黎呢度，所以見到路就行，一直漫無目的咁散步，就當幫助腸道消化啦。



行行下嘅時候，我特登問佢關於佢年紀嘅問題：「Gorden阿，我想問你，你今年係咪真係21歲？」Gorden一路笑一路答我：「係啊，咪講左我第一次用果個app，一開始貪得意，求其打左個年紀，以為有得改，點知冇得改咯。係啊，我今年真係已經21歲啦，同你同年㗎。」但我都仲係唔係好相信，都再問多一次：「但年紀呢啲都可以打錯㗎咩？」佢依然都係用呢個笑笑口嘅語氣答我。

見仲有時間，我都想多啲關於佢嘅嘢，例如佢之前係外國邊度讀書、幾時過去等等。Gorden話：「我中六果陣過去澳洲㗎，不過上年因為疫情，所以先翻左香港讀書，依家係Shitty讀緊書咯，今年同你一樣都係year 3啊。」Oh，原來佢去左澳洲，不過香港人好多都係，留學一係就去加拿大、一係澳洲。不過去得留學，屋企都應該係有錢。因為自己屋企好窮，連讀香港嘅大學都比較有困難，平時自己嘅生活圈子，我嘅朋友都係同我差唔多家庭背景，所以話題先會差唔多。但如果係有錢人嘅話，佢哋嘅衣著、生活方式等都唔一樣，我都驚之後同Gorden繼續相處落去，大家嘅Gap會差得越黎越遠。

不過係大家傾緊其他嘢嘅時候，Gorden突然講左一句說話：「Michelle，有冇人同你講過，你把聲真係好好聽？」我感覺到自己塊面有少少熱，點解呢個男仔可以咁直接講呢啲嘢嘅？佢係咪撩女高手黎㗎？一啲都唔怕羞嘅。我聽到呢句說話嘅時候，真係笑左出聲，完全唔識比反應，所以只係笑一笑就算，同埋同佢講左聲多謝。

時間已經黎到夜晚10點了，因為今日我出左成日街，所以好攰，而且啲舖頭都關曬門了，冇乜嘢可以行，所以我決定要翻屋企休息。Gorden本身話想同我搭車翻屋企，我又唔想麻煩人地，因為都係第一次見面，又未係好熟，而且大家搭地鐵嘅方向都唔一樣，所以同佢講，大家係地鐵站分開就算啦，不過佢都依然好堅持咁要睇住我上車先肯走。

結束左我同佢嘅第一次見面，當我望住手上佢送比我嘅朱古力，我覺得呢個男仔都幾搞笑，成日無啦啦拋直線球，又好主動咁買嘢氹女仔、請女仔食飯等等。佢同我之前係交友app所約過嘅男仔全部都唔一樣，覺得佢都幾特別。不過我對佢講嘅嘢都仲有好多疑問，例如佢嘅歲數、讀書背景等等。所以如果有機會，我都希望我地有第二次嘅見。