[校園][純愛]《身旁的那一個》: 第六章

第二日返到去

啲無聊嘢唔講啦

老老實實我開會都係發夢

人哋問乜就話係呀係呀咁樣囉

淨係記得唔知邊日係deadline





總之嗰日之前要做晒壁報

因為校長會親自過嚟睇乜乜物物

放心啦佢哋會記得㗎喇

我呢啲打醬油嘅人出現就得

去到最後終於捱過咗





真係走得可以食飯，

跟住見到嵐嵐同埋愷晴走過嚟

嵐嵐:「我同愷晴講咗喇佢話ok呀」

愷晴:「唔好意思呀東仔你有冇咩唔食㗎

你同我講丫，





如果唔食嘅話我再諗」

我:「我乜都得呀冇所謂

你話事啦」

嵐嵐:「平時唔係呢句㗎喎」

我:「我對住你先咁講啫

費事嚇親愷晴啦哈哈哈」

愷晴:「下咩呀」

我:「冇呀冇呀





你話事啦我冇所謂呀」

愷晴:「你真係好搞笑」

平時呢我就成日講屎唔臭都食嘅

不過對住愷晴就費事啦

始終又唔係話真係好熟

啱啱識費事亂講嘢，

唔係話驚扣唔扣分呢啲戇鳩問題





而係真係唔係好熟

盡可能都唔會講到咁放

講下講下又見到好鍾意嵐嵐嗰條粉腸賓仔過嚟

可能佢哋聽到我一齊食飯

賓仔:「嵐b可唔可以一齊食飯」

嵐:「唔好亂咁叫同你唔係好熟.」

賓仔:「嵐嵐咁可唔可以同你哋一齊食

我得㗎我乜都可以食呀」





我望住愷晴好似有啲不知所措

個樣唔知點咁樣

我又覺得呢條戇鳩仔好好玩

梗係撚下佢

我:「賓狗好心你檢討下自己啦

你女神依家同我食呀

你恨唔到㗎喇屎忽鬼」





賓仔:「你個仆街一腳踏兩船」

我:「所以話你真係唔好成日坐住個腦

一齊食飯就一腳踏兩船」

賓仔:「仆街啦你

算啦下次我先搵嵐嵐」

嵐嵐:「唔使下次啦，

依家同你講定唔使啦」

呢個賓仔都算聽話

嵐嵐講完之後佢即刻頭耷耷咁走

愷晴:「佢真係好鍾意你呀嵐嵐」

嵐嵐:「都冇辦法㗎

唔鍾意佢費事畀啲無謂嘅signal佢」

我:「係囉不如諗下佢啦

可能你一世人淨係呢個咁死心塌地嘅人㗎咋

錯過咗就冇㗎喇」

嵐嵐:「收皮啦你」

講人哋就識講，

自己就唔識做.

最後愷晴揀咗間餐廳

平平哋嗰啲西餐咁囉

可能佢唔鍾意去茶餐廳嗰啲環境掛

咁我就冇問呀

話明係佢話事

佢揀完就食啦仲咁多嘢講咩

我同嵐嵐熟啲一齊食得多

所以都知大家鍾意食啲乜

例如佢唔食蟹柳同南瓜就會畀我

我唔食青瓜同紅蘿蔔就會畀佢

當然啦大家都識做嘅

一定係未食之前先會畀人，

食過一啖就唔會咁做

佢條仆街都姿整同埋有基本衛生意識嘅

愷晴:「你哋真係好friend

大家鍾意食乜唔鍾意食乜都知」

嵐嵐:「我中一就識呢條友

唔係好friend嘅識少少咁啦」

我:「係呀愷晴

我都係中一就識你隔離嗰條友

知道佢有咩食有咩唔食啦」

講下我哋個坐位先

嗰日我哋三個人坐四人台

我對面係愷晴

愷晴隔離就係嵐嵐

我嘅隔離就係擺大家嘅書包

入到去坐嗰陣嵐嵐即刻將佢書包擺喺我隔離

跟住愷晴同埋我就跟住佢擺，

後尾先知原來呢個舉動係特登

唔係求其搵個位擺落去

愷晴:「我以前好少同你傾計呀東仔

估唔到原來你咁搞笑」

我:「唔係啩我都冇做啲乜」

愷晴:「有啲人係咁㗎

佢做啲嘢唔係搞笑，

又或者唔係特登想搞笑，

不過做出嚟就好好笑」

嵐嵐:「係呀係呀佢條友就係咁」

我:「咁就多謝你賞面囉愷晴姐」

愷晴:「唔使姐前姐後喇

叫我愷晴咪得」

我:「講起上嚟都係多得你隔離嗰個

如果唔係應該唔會識到你」

嵐嵐:「冇名你叫呀東哥」

愷晴:「係囉我都估唔到嵐嵐會揀理科

不過唔係嘅佢兩樣都叻

乜都掂」

嵐嵐:「咁我上年理科高分啲吖嘛

同埋問過屋企人佢哋建議理科喎」

愷晴:「係咩你理科高分啲咩」

嵐嵐:「係呀」

愷晴:「可能我記錯咗我以為你文科高分啲.」

我:「你會問屋企人

真定假呀」

嵐嵐:「似你咩咁無聊成日呃人」

基本上嗰餐飯大家都傾得好開心，

唔係話咩氣氛都唔錯

嵐嵐條友仔幾識帶動氣氛

因為在場佢唯一一個聯繫兩邊嘅人

有啲人呢啲位處理得唔好就會各自各玩

咁自然就冇下次啦，

嵐嵐算係幾得體

我都唔想讚佢不過真係幾勁

跟住嵐嵐無啦啦佢收到個電話

佢一路聽一路依依哦哦

收線之後我哋問佢咩事

嵐嵐:「媽咪囉

唔記得帶鎖匙

家姐又返緊part-time

唔好意思呀我走先」

愷晴:「唔使唔好意思呀你返去先啦

你嗰邊緊急咁多」

跟住嵐嵐放低佢個餐嘅錢之後

就對住個單眼笑住走

之後我就恍然大悟，

你條友真係醒目

錫晒你