[校園][純愛]《身旁的那一個》: 第二十三章

上咗車之後好快就去到目的地

沿途賓仔條友係咁打眼色

我心諗你條友自己都有組員

唔好咁撚猴擒啦

咪講咗燒嘢食先





大家都知啦燒嘢食要起爐

原本呀賓仔摩拳擦掌

準備表演一下身手

點知呢我哋有個組員係童軍隊

起爐呢啲野自然難唔到佢





賓仔冇辦法啦先輸一場

跟住坐低佢哋燒嘢食我就倒嘢飲

嵐嵐:「自私精淨係倒畀自己」

我:「你幫我燒豬扒牛扒雞扒雞翼我就倒畀你」

嵐嵐:「傻仔嚟嘅





咁辛苦燒完梗係自己食」

我:「棉花糖都得啩掛」

嵐嵐:「冇得傾」

我:「食屎狗自私狗」

愷晴:「我燒畀你啦」

我:「都係你好夠闊綽

好我就倒畀你」

愷晴:「唔使啦我都未飲晒」





Betty:「乜咁主動嘅」

愷晴:「咁我不嬲都唔係食好多

咪幫手燒下囉

燒下其實都好玩㗎」

佢咁靚女我費事鬧佢啦

我心諗唔係掛燒下都過癮

個爐好撚熱喎





算啦算啦佢咁幫手唔好鬧佢

嵐嵐:「益咗你啦東爺」

嗰個笑容極其賤格

我:「有靚女燒呀梗係益我

人靚心善

你就」

嵐嵐:「咩呀你想講咩呀

燒烤叉冇眼呀睇住呀」





我知佢條友做得出

算啦保命要緊

我:「冇嘢喇冇嘢喇」

愷晴:「咁簡單你哋講到咁

痴線㗎」

我:「唔好理佢燒嘢食我哋」

組員a:「東爺你就威水啦左右逢源





平時就同嵐嵐

依家就同愷晴」

我:「我平時從來都冇同佢有啲乜嘢

愷晴就依家大家一齊燒嘢食啫

都冇特別」

嵐嵐:「冇錯呀組員a

我平時都同佢冇嘢」

我:「我先冇啲咁黑心嘅朋友

燒嘢食都唔幫」

嵐嵐:「我都冇啲咁黑心嘅朋友

倒嘢飲都唔幫」

愷晴:「陣間幫你倒

再幫你燒」

嵐嵐+我:「都係愷晴你好」

嗰下真係神同步

我好記得

因為當場已經有人講，

Teresa:「夾到咁都話冇嘢」
當大家食得七七八八

好多人都出去玩

有啲帶咗個西瓜波過嚟

有啲就帶咗uno啤牌嗰啲

我就好懶乜都冇帶

淨係坐喺度

呢個時候嗰條仆街賓仔又打緊眼色

跟住我鬼鬼鼠鼠扮晒野行過去

叫佢等多陣啦

我哋呢邊冇人嗰陣咪過嚟囉

果然我嗰兩個男組員就走咗

愷晴同埋Betty唔知去咗邊

所以當場得我，嵐嵐同埋Teresa

有幾個位吉咗出嚟

跟住賓仔就過咗嚟

賓仔:「hello可唔可以過嚟燒嘢食呀」

我:「我ok呀你問佢哋

反正大把嘢燒唔晒」

跟住佢兩個都話冇問題

問心講嵐嵐佢就其實幾大方

雖然阿水都知道賓仔過嚟嘅目的係乜

好明顯就係醉翁之意不在酒

之不過如果係燒嘢食嘅話咁梗係歡迎啦

所以佢哋都冇乜意見

跟住我就發覺賓仔呢個人點解溝唔到女

第一真係好煩

我係女人都頂唔順

係咁問嵐嵐

食唔食雞翼牛扒棉花糖，

總之食唔食後面就會加任何食物

嵐嵐去到後尾都頂唔順，

嵐嵐:「你要燒就燒畀自己食

我唔食呀」

跟住唔使講，

毒撚梗係詢問處上身

去邊度買嘢食呀

用咗幾多錢呀

同邊個去買呀，

點樣解凍呀

痴撚線一落到嚟就冇停過

我都頂唔順真係想叫佢收皮

不過費事啦驚佢爆我大鑊

誰不知呢個粉皮無啦啦對住我講，

賓仔:「東哥你又水我

又話幫你拎嘢就可以同嵐嵐一齊燒嘢食」

呢個時候我都劣緊

再加埋呢個時候嵐嵐望住我

當下我個腦袋得一句，

我真係畀賓仔你玩撚死.