[校園][純愛]《身旁的那一個》: 第二十五章

老實講

以前細個可能真係唔識諗

我當時嘅諗法係，

嵐嵐呢個人真係太小器

有咩好嬲呢究竟





佢喺呢件事上面都冇損失

最後大家都有得飲

我又唔使拎嘢

根本就三贏局面

無啦啦發脾氣真係唔知做乜





講明先呢個係我當時嘅諗法

不過算啦，

我又真係唔想搞到大家關係咁

問心我覺得佢應該好快冇事

最多都係嬲一陣嘅啫





但係Teresa講嘅嘢都唔係冇道理

返到嚟面阻阻氣氛好撚尷尬

都係拎住薄荷糖行過去搵佢啦

行一陣跟住就見到佢同Teresa

Teresa見到我行過去就行開咗

打晒眼色咁樣

預咗畀嵐嵐佢鬧㗎喇

算啦算啦唔緊要啦





男人有個天職就係要承擔責任

我:「唔好意思呀嵐嵐

今次係我衰係我問題

應承你冇下次」

嵐嵐:「你明知我唔想畀假希望賓仔

仲要藉我過橋」

我:「我又係衰嘅淨係諗自己





下次我會自己拎返㗎喇」

嵐嵐:「邊個拎都唔係問題

問題係你用我個名搵佢

跟住佢以為真係我叫佢幫手，

最慘我就真係冇咁做，

咁樣咪好似搞到我收兵」

我:「都係我衰破壞你嘅聲譽

明明你就唔係啲咁嘅人





係我賤」

嵐嵐:「你賤都唔係第一日嘅事㗎啦」

我:「傻傻哋嘅真係

不嬲都好人咩叫唔係第一日嘅事

今次件事令我學識咗一啲嘢」

嵐嵐:「學識咩」

我:「以後要搵個信任嘅人幫手





如果唔係又畀人爆大鑊」

嵐嵐:「唉你真係冇得救」

我:「我不嬲都話做衰嘢唔緊要

最緊要係唔好畀人見到唔好畀人知道」

嵐嵐:「點解我會同咁冇品嘅你熟㗎」

我:「傻豬嚟嘅

我對住你有品咪得囉」

嵐嵐:「頭先嗰啲咁都叫有品呀」

我:「我知衰㗎喇下次唔會」

嵐嵐:「聽住先囉」

我:「你睇我幾撚有誠意

薄荷糖都拎過嚟」

嵐嵐:「又係咁

估到你啦」

我:「做咩」

嵐嵐:「以前有次咪又係咁嘅

最後你都係送咗盒薄荷糖畀我」

我:「屌我記得喇

你哋啲女人真係小器

咁撚耐嘅嘢都記咁耐」

嵐嵐:「對住你特別小器

我都唔想」

嗰次係咩事呢

數下手指都起碼係中一中二嘅事

話說嗰次佢叫我幫手去教員室拎嘢

我唔記得咩啦總之叫我幫手

平時佢唔會咁

因為嗰日佢唔得閒

好似話放學約咗家姐唔知去邊度

所以就叫我幫手拎嘢

仲話好趕急

一定要今日拎

點知放咗學我掛住喺班同人玩飛行棋

結果就唔記得咗

第二日佢知道咗之後

又係好嬲勁黑面

後尾我喺衫袋拎咗盒薄荷糖出嚟送畀佢

全新未開過嘅

跟住佢就冇嘢喎

好撚奇怪啲女人真係

肯定有精神分裂

無啦啦嬲無啦啦又冇事

嵐嵐:「冇啲新意喎成日都薄荷糖」

我:「我成身最值錢就係呢樣

咁都唔要冇辦法啦」

嵐嵐:「少少成本都唔肯用點溝女呀」

我:「痴線我而家又唔係溝你」

嵐嵐:「我梗係知你唔係追我

咁但係對住愷晴你都係咁就死得啦

係喎你有冇add佢msn」

我:「哎呀我出門之前唔記得咗」

嵐嵐:「唔係啩你係咪玩我呀東哥

我仲諗住你第一時間即係add添」

我:「我尋晚唔記得咗

熄咗電腦瞓覺先記得

點知今朝起身又係唔記得

好啦好啦返去add」

嵐嵐:「講真我唔係吹水

我feel到佢都對你有啲好感」

我:「點解咁講呀」

嵐嵐:「有時我哋幾個圍埋傾計，

佢講起你都話你好搞笑呀呢樣嗰樣

頭先你見唔到咩佢話肯幫你燒嘢食」

我:「唔係啩

頭先我就見唔到佢呀

我淨係見到你呀好撚獨食淨係幫自己燒」

嵐嵐:「我叫咗你出街要帶埋個腦

唔好成日戇居居咁樣㗎嘛

頭先唔係我咁樣講，

佢點會話幫你燒」

我:「馬後炮」

嵐嵐:「講你又唔信

走啦返去啦」

我:「喂整粒嚟丫

同埋陣間請你食蛋糕啦

唔好話冇新意呀」

嵐嵐:「咁又唔拘喎

多謝東哥」

我:「笑返咪幾好

雖然我堅持你西面靚啲」

嵐嵐:「食屎啦你

唔想同你講嘢呀

好煩呀」

細個就係咁，

冰釋前嫌可以好簡單，

一件蛋糕一盒薄荷糖，

已經足夠.