[校園][純愛]《身旁的那一個》: 第二十八章

第二日

我哋幾個就參加咗呢個義工足球團

講下有咩人先

有我啦，嵐嵐，愷晴

跟住就係未來嘅新郎哥新娘Davis同埋Manus





佢哋呢個時候我冇記錯好似係曖昧階段

好肯定嘅係未正式一齊

正正因為佢兩個喺度曖昧緊

所以佢兩個成日會一齊唔知去邊度

變咗我哋呢邊三個人成日都會一齊相處





唔好阻人發達啦係咪先

嗰日我哋約咗喺目的地等

事關我呢個人其實好麻煩

有好多嘢都唔係咁鍾意

例如搭巴士呢啲呢多數都鍾意自己一個





如果佢兩個唔識路呢我就唔會咁嘅

真係唔識嘅話咁點都要帶佢哋去啦

結果嵐嵐識路

同埋我知道佢兩個去之前

首先要返去學校拎啲嘢先

跟住先去球場

於是我就借頭借路鳩吹幾句

話嗰日我唔喺屋企出發





叫佢哋去球場等

唔知你哋明唔明呀一個人搭車其實好爽

以前唔係依家咁有smartphone

可能打下機呀睇下書咁樣囉

再唔係其實戇居居坐喺度乜都唔做都好正

當然我都明白未必好多人都有同感

所以每次都會鳩吹一啲藉口出嚟





屌呢啲唔係重點

講返嗰次先，

嗰陣我早少少去到

冇幾耐就坐喺度買咗檸檬茶飲

球場嗰啲保安知道今日有活動

問咗我兩句就放咗我入去坐

跟住就坐喺度睇人踢波

因為其實嗰個場係一路都有人踢緊波





你知啦球場嗰啲係book場制，

咁咪坐喺度睇下囉

跟住見到有兩條友行緊入嚟

就係佢兩個啦，

嵐嵐:「自私精一個飲檸檬茶」

我:「都戇鳩嘅

你都未嚟點買畀你」





嵐嵐:「而家嚟咗喇咁係咪有呀」

我:「貪心到你

檸檬茶都要呃」

愷晴:「嵐嵐一係我去買

預埋你」

我:「唔使啦我去啦你兩個淑女坐喺度

應該就叫呢條友去買嘅

又係佢發姣話要飲

不過算我呢啲gentleman梗係識做」

嵐嵐:「呢條友呢條友

去啦」

我:「咁撚串陣間我喺入面加料」

嵐嵐:「無聊鬼你咪又係得個講」

我:「畀你發現咗」

愷晴:「服咗你哋」


跟住買完返嚟

嵐嵐:「畀返錢你」

愷晴:「係喎」

我:「唔使啦

你兩個咁撚靚呀

我請你哋係我嘅榮幸」

愷晴:「誇張」

嵐嵐:「算你識講嘢」

我:「仲有呢盒」

跟住我就拎咗盒薄荷糖出嚟，

嵐嵐:「我要一粒」

跟住我就好自然畀一盒佢

呢樣佢就真係有品，

唔會食咗一盒跟住畀返個吉盒我」

愷晴:「嘩原來你都鍾意食薄荷糖架」

我:「係呀好食架

又唔驚口臭」

愷晴:「嵐嵐又係好鍾意食成日都買」

我:「佢條撚樣抄我」

嵐嵐:「咁就叫抄你

你係邊個呀叻仔

我嚟之前都想買定

點知我知有你喺度一定有得食

所以就唔買啦哈哈」

我:「食啦食啦」

愷晴:「點解你成日都買嘅」

我:「老母買落」

愷晴:「係咪呀」

我:「呃你做乜

我咁鬼懶就唔好搞啦

好彩佢識做」

嵐嵐:「同佢熟咗就會知道有好多搞笑野」

愷晴:「真係」

講下講下Davis同埋Manus都嚟咗

我哋五個吹左陣水就見到miss，

跟住講幾句就開始啦，

話說尋晚畀海狗係咁講

搞到我都想問下嵐嵐鍾意邊個，

等我快啲有答案塞住海狗把口

唔好成日都講我個名

不過咁多人都係算啦，

總有機會嘅.