[校園][純愛]《身旁的那一個》: 第四十二章

我哋都玩到七七八八

跟住睇一睇時間都八點幾，

就決定離開海洋公園去食夜晚嗰餐喇

臨走嗰陣經過禮品店，

就梗係入去睇下啦





原本呢就冇諗住買嘢嘅，

點知見到好多公仔都好得意

梗係拎上手望一望

嵐嵐:「喂講樣嘢畀你聽」

我:「乜春」





嵐嵐:「就係你玩公仔嗰陣真係好似細路仔

個眼神呀.」

我:「講咗畀你聽你唔信

我真係好鍾意玩公仔

不過平時費事同人講啦」





嵐嵐:「係喎雞仔狗仔馬仔點呀

喺屋企乖唔乖有冇食嘢」

唔好意思呀要咁多位讀者睇啲咁無聊嘅嘢，

簡單講返雞仔狗仔馬仔其實係我嘅公仔，

我當咗佢哋係人咁樣喺屋企生活

會食嘢會講嘢會讀書

除咗老母之外，

嵐嵐係唯一一個知道佢哋存在嘅人





以前我都唔知有冇講過喇

唔知點解我對住嵐嵐就會乜都講，

好舒服好自然我就講左出嚟

佢唔介意不特止仲會同我一齊玩

屌根本佢都係無聊友

我:「佢哋好舒服呀喺屋企乜都唔做休息緊」

嵐嵐:「好搞笑呀佢哋





係喎你使唔使喺度買隻同伴畀佢哋」

跟住我喺度睇啦，

見到有隻企鵝公仔好得意

仆佢個街又肥又矮

真係好過癮

於是我就拎住佢係咁望係咁摸

嵐嵐:「隻企鵝咁得意嘅」

我:「哈哈肚腩好撚大」





嵐嵐:「巫澤軒

我送呢隻畀你」

我:「唔使啦

你自己唔要」

嵐嵐:「我都唔鍾意玩公仔嘅

我見你咁鍾意喎咪請你囉

當係今日你陪我玩嘅酬勞」





我:「嘩好撚大面喎嵐姐

畀酬勞我」

嵐嵐:「係呀，

我呢啲人好均真」

我:「唔使啦我自己買啦」

嵐嵐:「我諗住當呢隻企鵝係你嘅生日禮物喎

難得你咁鍾意

你知送嘢畀你幾鬼煩

成日喺度鬧人送埋啲嘢唔等使」


話說嗰陣就4月中，

我自己就4月25號生日嘅

唔講真係唔覺咁快又到生日

你知我啦呢啲毒撚不嬲對生日都唔係好著緊

咁多年都冇乜點樣特別慶祝

係嵐嵐keep住年年都送嘢畀我

試過送mouse啦，

我亦都收過佢畀我嘅筆袋，銀包同埋洗面用嘅精華

有時條友會好撚闊佬請我食飯

海狗呢啲仆街就唔得啦

冇本心

我:「好啦我都要還禮

今年送嘢畀你」

嵐嵐:「好醒喎我請咗你咁多年，

今年先話請返我」

我:「唔好咁講我有請你食飯嘅

同埋我問你你話唔要

我先唔請啫」

嵐嵐:「我知啦講下笑啫

今年我肯定你一定鍾意份禮物

因為呢隻我都覺得幾得意」

我:「多謝」

嵐嵐就六月尾出世嘅，

6月26號好容易記，

老老實實送禮物我真係覺得好難

唔係好熟嘅我唔會送

最主要都係孤寒啦

又孤寒又難諗

吃力不討好嘅嘢梗係唔好預我

嗰陣我話就話就會回禮，

不過其實都唔知送咩

算啦仲有兩個月

慢慢諗都未遲，

之後佢埋咗單我哋就走，

佢話玩咗成日有啲攰

諗住返去我哋嗰區食飯就算數，

我去到依家先爆料，

實不相瞞其實我哋係觀塘區嘅

咁當然觀塘區梗係計埋九龍灣牛頭角秀茂坪藍田油塘呢幾個地方㗎啦，

再深入啲就唔講喇

留返咁多位自己想像下

純粹安全啲啫費事講咁詳細啦，

況且唔影響故事情節，

講開又講

嵐嵐身上面有陣味好撚香

大家唔好諗咸濕嘢

正常玩咗咁耐，

我自己一向都唔鍾意同其他人接觸得咁埋

始終喺戶外玩咗一日，

出汗都真係好正常

我自己就一定係噴足嘢先出門

費事臭親人啦係咪先

嗰日我同佢上巴士一齊坐，

玩咗成日大家坐到咁埋，

佢啲衫都仲係有佢平時嗰陣香水味

聞落去好舒服完全唔似出去玩完咁樣，

我唔係變態呀咁我唔係特登索丫嘛，

坐到咁埋好自然會聞到

我:「老老實實有樣嘢要讚你嘅」

嵐嵐:「靚女同埋好人

性格好」

我:「收皮啦

係你隻香水

好q香」

嵐嵐:「死變態佬喺度聞」

我:「你都戇鳩嘅

我讚得你香就梗係唔覺意聞到都覺得香啦」

嵐嵐:「呢隻我用咗好耐㗎喎」

我:「我知道呀起碼幾年」

嵐嵐:「其實我都覺得好香

所以先keep住用」

我:「陣味好撚舒服唔會聞到好焗」

各位想知邊種味好焗呢，

去k11就知道所謂何事

我:「今年就送呢碌香水畀你

係咁買」

嵐嵐:「冇誠意」

我:「下咁點先有誠意」

嵐嵐:「慢慢諗啦仲有兩個月」

我:「你哋啲女人真係麻鬼煩」

嵐嵐:「呢啲唔訓練下你遲啲點同愷晴拍拖

到時唔好唔記得我就得，

半個軍師」

我:「痴線點會」