[校園][純愛]《身旁的那一個》: 第四十八章

沖完涼呢，

我就將今日啲相send返畀愷晴

好彩佢都識解壓

你哋唔好笑呀，

我真係見過有女仔唔識解壓個file





愷晴:「唔該晒

我擺上去Qooza先」

之後我梗係乘勝追擊，

順手拎埋佢Qooza啦

愷晴:「你冇打開blog㗎」





我:「冇呀齋睇㗎咋」

愷晴:「下咁有咩好睇」

我:「睇下人啲八卦嘢囉」

我係唔會同佢講我睇完之後會記得個內容

之後睇返當事人面前講，





呢啲咁無聊嘅嘢

有咗佢Qooza之後我就開始睇啦

佢就唔係日日打嘅，

多數都係有特別嘢發生先打

例如陸運會呀旅行呀之前我哋出嚟唱k呀咁樣

我嗰陣冇特別為意

睇睇下嘅時候見到我個名，

「東仔呢個人真係好搞笑」





基本上呢句嘢我睇咗幾次

問心我又唔覺得自己好搞笑

又唔識講笑話

佢面對面同我講過依家打blog又打埋出嚟

同埋有句我又係好深印象，

去到依家我間唔中都會喺佢面前講返

就係我哋成班出嚟唱k嗰篇blog，





佢有句

「東仔好鍾意唱歌>.<

原來佢唱歌都好好聽^^」

問心我就唔覺得好聽嘅

不過有人讚就梗係爽啦係咪先

男仔有時真係好撚幼稚

feel到對方真心講啲讚美嘅說話，

就算個男人幾多歲，





都會覺得飄飄然

分別只會在於，

唔同年紀嘅男士對於讚美嘅說話有唔同嘅表達方法

大個可能內斂啲，

細個就唔會有咁多枷鎖

愷晴嘅Qooza大致上係咁，

話說Qooza其實係可以留言嘅





有account就得㗎喇

跟住我喺留言見到有個人，

佢個名叫做「Hiu Nam_C 」

一睇就知邊個啦

正當我諗住入去睇嘅時候，

就發生咗一件意料之外嘅事


嗰件事係咩呢，

就係佢set咗密碼

唔知你哋知唔知啦，

Qooza係有set密碼呢個功能

如果你冇密碼嘅話呢，

你就唔可以睇到佢嘅blog或者相簿

不過佢個icon就睇到嘅

佢張icon我就肯定係海洋公園入面影嘅，

單獨相嚟，

點解咁肯定

係因為張相我影嘅

發生咗一個月都唔夠梗係記得啦，

我心諗呀你咁秘密

打啲咩咁巴閉呀

試下撞密碼先，

我知佢幾時生日

0626丫嘛，

結果唔啱

跟住打埋個年份，

又係唔啱

算啦我試下打佢英文名，

都係唔得

跟住呢我就放棄咗，

即刻msn佢

我:「使唔使咁秘密呀set埋密碼」

佢條友真係冇嘢做，

即刻秒回

嵐嵐:「犀利喎咁都搵到」

我:「打上嚟又唔畀人睇」

嵐嵐:「邊個話畀你睇

自己打畀自己睇唔得㗎咩」

我:「梗係得啦個page你嘅」

嵐嵐:「唔使扮嘢喇肯定有撞密碼啦

唔得呢」

我:「梗係唔得啦

跟住我都放棄咗，

唔知你咩原因

可能你唔想畀人睇掛，

你見我都冇問你」

嵐嵐:「個密碼你一世都唔知

信唔信丫」

我:「梗係啦我係你心入面條蟲咩

咁q多組合點估到」

嵐嵐:「好難㗎，

你條變態佬係咪特登去搵」

我:「係愷晴叫我畀返啲相佢

佢話想擺上去Qooza，

跟住咪順手拎埋」

嵐嵐:「一定係順手啦」

我:「真係呃你做乜

跟住睇下睇下就見到你喺佢嗰度留comment，

咁就搵到啦」

嵐嵐:「原來係咁

犀利呀你哋一日千里」

我:「我覺得你張icon好好

影嗰個人一定好勁」

嵐嵐:「嗰個人梗係犀利啦

不過會唔會係部相機勁」

我:「都要影嗰個人好手勢嘅」

嵐嵐:「老實講真係幾靚所以我先揀做icon」

我:「肯定有好多兵讚你啦

唔好同佢哋講真相呀

如果唔係佢哋崩潰都似，

女神同咗另一個男仔去海洋公園玩」

嵐嵐:「第一我冇兵嘅

第二我寫嚟真係畀自己睇，

當係日記咁樣」

我:「真係好奇你寫乜嘢

咁撚神秘」

嵐嵐:「關你q事咩」

條友好撚串

之後就同佢一路喺度傾，

乜鬼無聊嘢都講下，

講下講下差唔多offline先見到愷晴原來覆咗我

下面有個橙色嘅提示，

係我睇唔到

之後梗係覆返佢，

我:「唔好意思頭先打緊機

原來你同我講咗嘢」

愷晴:「唔緊要呀你打啦我都差唔多瞓覺」

我:「我都係，

早唞.」

愷晴:「早唞.」