[校園][純愛]《身旁的那一個》: 第五十二章

我記得跟住落嚟嗰個禮拜

我同嵐嵐有三日要返學校，

就係準備呢個乜鬼嘢天才表演

明明唔使返㗎嘛

我記得嗰三日，





十點去到四點

就係對住嵐嵐同埋miss

不過主要都係嵐嵐

因為我要同佢夾，

miss想我哋對多啲稿喎





愷晴都有問我咩事

我都係照直同佢講

嵐嵐:「呢個係我講完之後到你講

Fit晒」

我:「ok冇問題」





嵐嵐:「點解你好似唔使抄嘢嘅」

我:「入晒個腦啦

會記得㗎喇到時知道點講」

嵐嵐:「咁又係嘅你條友死淨把口

我見你次次present都可以講一堆嘢出嚟，

仲要成日都好成績

都痴線」

我:「你睇下你哋啲女人幾記仇





咁都記得」

嵐嵐:「明明讚緊你呀死人頭

話人記仇」

喺度講返先

其實我覺得自己唔係一個好嘅team player

同人夾呢方面其實唔算好好

我同佢夾到嵐嵐只係因為熟，





又或者佢係一個本身係呢個好好嘅team player

所以連我呢條粉腸都夾到

大家圍埋一齊討論一件事嗰陣，

其實我好少會畀意見

有時自己有嘢想講，

我都選擇收埋

唔係話驚人哋嬲，

佢哋亦都冇禁止我講





純粹係我冇講，

好奇怪呢

我都唔知點解會咁，

同嵐嵐共事咗四年去到呢刻暫時都冇出過大頭佛

其實我覺得應該歸功於佢而唔係我

我好多時都好煩

有自知之明嘅，





miss其實冇講錯

我真係要搵一個好熟好了解我嘅人一齊做嘢

今次應該冇搵錯人嘅.


去到晏晝嗰陣，

好簡單一定係我同佢食啦

嵐嵐:「有蟹柳唔食

畀你」

我:「謝謝」

嵐嵐:「拿拿臨搞掂就算啦」

我:「梗係啦，

miss都痴線無啦啦叫我哋做司儀」

嵐嵐:「其實我覺得應該幾好玩」

我:「其實係嘅

不過有既定對白，

有框架喺度好難玩得好盡興」

嵐嵐:「咁冇計啦喺學校做丫嘛

一定有啲嘢唔講得㗎啦」

我:「知唔知今年邊啲人玩」

嵐嵐:「咁真係唔知喎

不過我今朝撞到Oliver，

佢好似返嚟話練唱歌

講起上嚟我都想問你」

我:「嘩佢唱歌

好睇喎

到時佢唱之前幫佢打氣先」

嵐嵐:「警告你呀巫澤軒唔好玩嘢

我知你想點」

我:「痴撚線未講都知」

嵐嵐:「係

玩第二個都唔理你，

玩我自己梗係唔得」

咁撚醒竟然知我想玩埋你

算啦得個諗字

唔玩得，

我:「你想問我咩呀」

嵐嵐:「咁我今朝見到佢啦

咁冇嘢嘅咪打招呼囉，

跟住佢問我點解喺度我就照直講啦

佢話佢返嚟練唱歌

下個禮拜比賽，

之後問我一齊食lunch好唔好

咁我嗰陣冇問你，

我就推咗佢

我咪話聽日睇下點先囉，

今日唔得啦咁樣」

我:「我冇所謂呀ok呀

一齊食飯都好

我都想問佢」

嵐嵐:「你想問佢咩呀」

我:「我想問佢點解年頭唱歌比賽唔玩

依家又走嚟唱歌」

嵐嵐:「好到時你問下佢囉

其實我今日都想問」

跟住我哋就喺度笑

唔知有咩咁好笑㗎喎，

不過就係兩條友喺度笑

傻咗，

嵐嵐:「痴線唔好笑呀食嘢呀」

我:「屌」

講真嘅同佢一齊係好舒服，

我都唔止一次咁講啦

同埋有樣嘢我好欣賞佢，

講明先呢樣嘢我冇當面講

費事佢認屎認屁，

就係佢好尊重同佢一齊做嗰件事嘅拍檔

好似頭先個情況咁，

有人約佢食飯

跟住因為佢冇問過我o唔ok

就推咗對方，

我唔知你哋身邊有冇啲朋友，

好撚鍾意叫埋一班人入嚟

而事前係冇通知過你哋本人

呢啲行為我覺得係好唔尊重

你哋可以話我小事化大嘅，

咁我都唔否認哈哈哈

但我真係覺得你叫邊個都唔緊要

事前要通知聲囉，

呢樣嘢我有同嵐嵐講過

咁我都好感激佢真係有聽，

好尊重我呢條蛋散

呢個係真心說話嚟嘅，

不過我嗰陣諗，

聽日會唔會做左電燈膽呢

唔理喇等我聽日睇下佢哋咩情況先

唔知你哋有冇同感，

睇人溝女係好好玩

諗起都有啲爽.