[校園][純愛]《身旁的那一個》: 第七十一章

話說單野係咁嘅呢

有一日miss叫咗五個同學留堂，

我係其中一個

跟住就嵐嵐

跟住有Davis





仲有兩個不知名粉腸

唔使理佢哋叫咩名喇反正都唔重要，

我嗰陣心諗咩事呢

唔通係我抄嵐嵐功課

所以我同佢都有份畀人留堂?





我心諗冇理由呀我抄得咁有技巧

點會畀人發現

不過除咗呢樣又好似搵唔到其他原因

喺度苦無頭緒都冇意義，

倒不如直接開口問miss





我:「miss我衰咩呀喺度畀你留堂嘅」

miss:「你老友話你電腦勁呀嘛

咪叫埋你囉」

我爭啲講邊撚個我老友

好彩收得返個撚字

miss:「嵐嵐呀

我本身預咗佢㗎喇，

跟住嗰陣唔夠人





我問佢知唔知仲有邊個同學電腦叻，

佢推薦你咁我咪叫埋你」

跟住我望住遠處嘅嵐嵐

笑口噬噬面目可憎

懶得戚個衰樣

我好脾氣同埋唔打女人咋

如果唔係衝埋去扭甩佢個頭





跟住就叫我哋五個坐低啦

佢首先分享咗個idea，

問下我哋有冇啲咩特別嘅電腦skill可以做到佢講嘅嘢

跟住粉腸a就話用powerpoint

粉腸b佢話佢識用photoshop

最後miss就決定用呢啲software

可能整個powerpoint，

又或者畫圖跟住就print啲唔知乜鳩出嚟





送畀即將離校嘅嗰位學生

個方向大致係咁，

講明先我電腦係唔勁

呢啲軟件都只係屬於識用呢個階段

談不上好勁，

硬件就更加垃圾

我真係多謝你呀嵐嵐.






我記得嗰陣我哋學校12月尾先放聖誕假

聖誕假前最後一個上課日就會搞聖誕聯歡會

miss12月頭同我哋五個講，

佢話畀半個月時間我哋

亦都會參與埋討論

例如我哋做緊嗰陣遇到嘅問題又或者其他嘅意見，

佢都會一齊傾

咁多年佢都話我哋呢班幾好

所以都特別上心，

衰啲講我當呢份係project嘅啫

佢叫我咪做囉，

咁當然我都唔會hea到出面

唔知嵐嵐係咪因為佢自己遲啲都要走嘅關係，

所以我feel到佢今次都比平時更加肉緊

落手落腳做咗好多嘢

要記住喎，

嗰陣我哋唔係唔使做㗎喎

我哋本身又要讀書溫書補習呢樣嗰樣，

嵐嵐都算係咁

一個人分到咁多個身做唔同嘅嘢

有一日我哋喺學校搞到六點先走，

應該係歷來第一次咁夜走

天黑先離開學校，

佢走嗰陣都好特別感慨，

講咗好多嘢，

嵐嵐:「我冇同miss講考埋會考就走呀」

我:「我係你我都唔講」

嵐嵐:「點解嘅

不辭而別好咩」

我:「你咪又係冇講」

嵐嵐:「我係未講囉好冇

仲有半年使唔使咁快，

我點都會通知miss」

我:「不辭而別雖然有啲自私

但係講出嚟嘅原因對我嚟講又唔係好接受，

第一你知我呢啲撚樣都係毒撚低調開

講出嚟如果大家重視我呢條柒頭

乘機開party我又真係唔鍾意，

萬一佢哋唔重視我呢條友又瘀皮，

走咪走囉關我撚事呀

我點樣呢係咪先

或者我學你臨走先講，

不過唔會啦我呢啲撚樣都係喺香港讀

成績好唔好都好」

嵐嵐:「死要面」

我:「老老實實有個問題，

我一路都想認真問下你

咁啱又係關於讀書」

嵐嵐:「做咩呀」

我:「其實當年點解會揀理科

我知你中三嗰年兩邊都高分，

不過文科應該再高啲，

唔好咁撚老套話屋企人逼呀

我雖然同伯母同埋你家姐唔熟，

不過都知啲啲嘢

一向都唔會逼你.」

嵐嵐:「呢個問題好難答喎

唔知點答你」

我:「又扮嘢」

嵐嵐:「有機會丫，

有機會我會同你講嘅」

我:「其實我八卦啫

因為我唔覺得你對phy chem bio好撚有興趣

你又唔似我冇得揀

你知我文科好撚廢」

嵐嵐:「我講得出就會同你講㗎喇

有邊次呃過呀東哥你」

我:「唔好走數呀」

嵐嵐:「幾時走過你數」