[校園][純愛]《身旁的那一個》: 第七十四章
有咗女朋友之後生活點過
你依家上連登問呢條問題，
肯定有人留言瘋狂扑嘢
當然我唔懷疑有情侶真係咁
香港好多嘢玩咩係咪先，
特別我哋嗰陣都係讀書階段
消費能力冇而家咁高，
你話如果有免費地方嘅
瘋狂扑嘢其實都算正常
除非真係好有錢啦，
如果唔係真係冇乜地方好去
嚟嚟去去都係行街睇戲食飯，
間唔中去下戶外地方咁樣囉
我個情況就唔係咁嘅，
我都係做咗愷晴男朋友先知
原來佢係好q懶
一至五返學要早起身，
對佢嚟講，
呢個係一個相當消耗體力嘅行為
所以放假嗰陣朝早唔會搵到佢
最快都要十一點先彈出，
可能你哋會心諗，
咁佢咪又瞓夜瞓
咁又唔係喎，
原來佢一向都有睡眠嘅問題
有時夜晚會失眠，
試過好多方法都解決唔到，
最大問題係佢對聲音敏感程度好高
可能有時佢屋企人朝早執屋又或者去廁所，
咁嘅程度已經足以整醒佢
話說佢有講過屋企唔大不過亦都唔算好細，
有啲人閂咗房門其實已經聽唔到出面咩聲，
不過佢就唔得
佢話佢知道佢係麻煩嘅
所以都冇怪屋企人，
就係因為種種原因，
所以放假佢更加唔會早起身
禮拜六日又盡量喺屋企，
佢話費事出街返到嚟又攰
咁啱我嘅性格唔係好活潑
生活習慣咁多年嚟都偏向喺屋企
所以對我嚟講，
女朋友唔係好鍾意出街就唔係一個問題
同埋嗰陣我哋返學日日都見呢
變咗禮拜六日唔使夾硬出嚟見面，
佢話其實佢可以出嚟嘅
如果我想嘅話，
不過問題其實我都唔係好想哈哈
有得揀都係留喺屋企
同埋另一方面我又唔想我女朋友勉強自己
既然我知佢咁多年放假都鍾意喺屋企，
拍咗拖之後，
呢方面就梗係就佢啦
我咁多年都覺得
拍拖唔等於要放棄自己
有啲行為習慣咗嘅話，
咪由佢繼續
你話嗰啲習慣會對伴侶不忠誠咁就話唔好做啫
如果唔係我覺得係冇問題嘅，
可能有啲人會覺得
拍拖一定要咁咁咁，
要做某啲活動先至證明到係拍拖，
唔做嘅話就唔得喇
再衰啲嘅就係情緒勒索
搞錯呀你係我男/女朋友都唔陪
呢啲我就最憎
拍拖唔等於成個人畀咗你伴侶㗎嘛，
我嘅睇法就係咁囉.可能你哋會問，
屌咁我哋當年拍拖嗰陣究竟做啲咩呀
你哋冇扑嘢又唔鍾意去街
冇呀，
其實係咪就係傾電話囉
有時我都唔明點解啲女仔咁q鍾意講電話
講下我哋個情況先，
佢知我放假有嘢做嘅
而佢本身都會溫書
其實我哋仲有唔夠三個月就會考，
所以我哋唔係全日都講電話，
佢本身個人就冇乜興趣
溫完書就冇嘢做㗎喇，
晏晝夜晚都會講電話
而我自己就唔鍾意屋企有人嗰陣講電話嘅
除非夜晚啦佢哋瞓晒覺，
晏晝嘅話，
如果佢得閒而佢又知道我做晒我啲嘢
咁就開始講電話啦
正如我上面所講，
有時可能講到佢老母返嚟，
又或者我有嘢做咁就唔講囉
咁我晏晝屋企有人又點算呢，
冇呀，
我落街喺屋企行下順便同佢講電話㗎咋
問心講句我覺得佢係體貼嘅
佢有時都話唔想我咁麻煩，
係我話唔麻煩唔驚講啦咁樣，
始終女朋友的而且確係要陪嘅
就算有嘢做都好啦，
我咪唯有盡快做晒我要做嘅嘢
騰出個時間同佢講電話囉，
跟住佢就好滿足㗎啦
仲有一點，
就係我唔同佢講電話都會為我帶嚟啲啲咁多嘅麻煩
我唔係話佢會發脾氣嗰啲麻煩，
佢唔會嬲呢啲嘢嘅，
知道我有嘢做唔得閒講嘅咁佢一定會接受，
我講緊嘅麻煩係覆WhatsApp
做咗佢男朋友之後其中一樣轉變最大，
就係覆WhatsApp呢個問題
我記得我哋拍拖嗰期，
係由佢起身一路同佢WhatsApp
覆到佢又或者我瞓覺，
我個人就好撚多嘢講
所以諗話題嗰方面對我嚟講就冇問題，
同埋我知道佢真係幾鍾意我
所以佢都會諗啲話題等我哋傾，
唔知大家有冇同感，
就係唔可以同女人講道理
如果你同佢講我唔想覆得咁密
咁佢就發爛渣喇
九成都講埋啲悔氣說話，
好多都係咁嘅，
我就未試過同佢講不過我驚佢係咁
所以我咁多年都冇當面同佢講
咁你話你唔使沖涼㗎咩
又或者你唔使做嘢咩，
點都有個空檔㗎，
係呀你冇講錯
呢啲時間真係空檔，
不過我哋當時傾計個模式係乜都講嘅
例如我食飯我咪同佢講我食飯
我沖涼我就會同佢講沖涼，
調返轉佢做乜都係，
呢個唔係我要求又或者佢要求
係我自己做先，
嗰陣鳩噏話諗住畀安全感佢
所以我哋嗰陣就有呢個文化，
事實上我都覺得係需要畀安全感身邊嗰個嘅
不過我唔覺得要咁密啫
講緊係幾密呢，
例如佢send WhatsApp畀我，
如果我冇同佢講我做緊嘢，
過咗五分鐘之後佢就會搵多我一次
佢唔會係咁轟炸嘅，
不過佢會WhatsApp多我一次囉，
大佬我都係人我都想放鬆下
所以有時我都會偷返自己啲時間，
例如我沖涼食飯，
我會特登遲啲先WhatsApp佢我食完/沖完喇，
偷得幾個字都幾個字啦
呢個都係我其中一個主動講電話嘅原因，
講電話唔使係咁WhatsApp丫嘛
同埋我同佢講電話，
又真係好少會dead air
因為我條仆街好多嘢講，
佢又會乜都同我講，
每次起碼都會講個零兩個鐘
呢個就係我同佢嘅相處模式喇.