[校園][純愛]《身旁的那一個》: 第一百章

第二日收工，

我就出發去旺角嗰間餐廳啦

去緊嗰陣呀，

愷晴姐仲要喺signal潤鳩我

愷晴:「尷唔尷尬呀撞返佢」





我:「有咩尷尬啫

舊朋友咁耐冇見你諗咗去邊」

愷晴:「係就最好啦」

我冇記錯嘅話，

我係從來冇同愷晴講過我同鍾小姐嗰啲嘢





佢依家咁講得，

即係話佢可能知多少

咁有機會係鍾小姐同佢講

佢知幾多就真係唔知

我都係純粹推測





不過可以證明多少少

就係佢兩個應該從來都冇斷過聯絡

即使大家身處唔同地方都好

甚至乎我有時碌story，

我都見到佢兩個夾唔中會約出嚟食飯

連埋Teresa同Becky四個

呢幾年我同愷晴唔係成日出嚟食飯

因為有段時間，





佢係有男朋友

佢當時嘅男朋友係冇乜安全感嗰啲人

既然係咁我都識做

後尾散咗

我先同返佢兩個單獨食飯

有時佢要買嗰啲濕鳩電子嘢

router嗰啲呢





佢又唔識就會搵我呢條毒撚幫手

有時食飯佢都會講起鍾小姐，

最近嗰次故事入面都有提及

就係佢同我講鍾小姐拍咗拖

老實講我又唔係怕講起佢

唔會好似電視電影嗰啲人咁樣，

一講起某某就方寸大亂

之後腦袋一片空白





我就真係冇呢啲情況嘅，

純粹係我搭唔到嘴

因為呢一刻，

我對佢嘅了解僅至於Instagram

除咗呢樣就冇喇，

所以愷晴每次講起嗰陣，

我都唔知講啲乜好





有一兩次佢都有問過我

唔掛住佢咩，

唔想見返佢呀，

我都係答隨緣啦呢啲廢話

你當我畀咗個選擇權鍾小姐啦

我始終覺得如果佢想見嘅話，

佢會直接搵我又或者約埋愷晴

三個一齊出嚟㗎喇，

既然佢冇咁做，

咁我覺得我可以做嘅，

就係尊重返佢嘅選擇

搭緊車嗰陣我都諗緊，

陣間見到應該會點呢

算啦再諗落去都冇頭緒㗎啦，

有啲嘢要嚟就嚟.


架巴士去到旺角就落車啦

間嘢喺歐美廣場嗰頭

見仲有少少時間，

於是去咗朗豪坊嘆下冷氣

兜咗個圈時間差唔多

就向住目的地進發喇，

去到間餐廳樓下準備搭𨋢上去嗰陣

我見到個group有人講野

原來好多人都到咗

主席問我喺邊，

我就話上緊嚟喇

同一時間愷晴都喺個group出聲

條友仔依家學壞咗成日抽水

以前怕怕醜醜陰聲細氣嗰個已經唔喺度啦

愷晴:「大人物爭你呀咁耐㗎」

我:「我係大人物就唔使ot啦愷晴姐」

費事畀其他人知我一早到咗但冇即刻去啦

求其話ot算數，

但係佢咁講，

即係話其他人已經到齊

跟住就莫名其妙緊張起嚟

我夠膽講，

我呢個面皮咁厚，

唔知醜嘅人，

都唔知幾耐冇試過緊張

考oral嗰陣冇，

入到u識一班新嘅人亦冇，

出到嚟做嘢第一日返工都冇

估唔到因為今日撞返舊朋友就會咁

但經過咗咁多嘅歷練，

其中一個得著就係掩飾

我諗其他人應該睇唔出我最真實嘅情感，

可能我真係比較保守啦

唔係太鍾意赤裸裸咁面對其他人

即使係屋企人我都會有所保留，

更何況係朋友呢

講下講下架𨋢都到咗，

於是我就入去

等架𨋢升到我要去嘅嗰層

搭𨋢呢啲嘢要幾耐丫，

兩三分鐘乜都出到去啦

一出到去就係間餐廳，

我喺出面望入去嗰陣

已經見到一班好耐冇見嘅朋友

嗰陣廿幾個人四十幾對眼

全部目光都擺晒落我呢個薯仔嗰度

第一眼望落去已經見到幾個冇開名嘅舊朋友，

唔止咁少，

仲有準新郎新娘

主席

愷晴

賓仔

Betty

Teresa

班主任Miss Cheung

同埋一個接近十年冇見嘅人，

就係鍾曉嵐.