她的伴奏者: 5
「洗完喇」子瑜說
「咁妳沖涼先啦」子瑜眼神充滿恐懼看著我
「我練琴，唔得閒偷望妳」我補充
「哦…」
我自己都無搞錯，我竟然為左個八婆練琴…
陌生的樂曲，首先要了解它的背景。
Bach出生於巴洛克時期，歌曲風格自然是比較黯淡，伴奏比較單調。
由於功力深厚的me加上多重資料搜集，45分鐘內已經大概能慢速地彈遍整首歌。
但45分鐘過去子瑜仲用緊廁所。
「喂八婆出黎啊」我大叫
「屌你啦邊個八婆啊」即刻出黎
「妳啊，八婆」
「收皮啦」
「八婆」
一番唇槍舌劍後，似乎倆人都不想再糾纏。
「戇鳩…」我不禁笑了
「你戇鳩啲」她笑了
「食生果啦，我買左提子」我說
食生果嘅時候，老母打黎。
「仔，你同子瑜相處成點啊？」
「咪宜家咁。」我將電話遞給子瑜
「Auntie？我幾好啊，柏豪照顧得我幾好」
「咁就好了，唔使擔心我個仔，用盡佢啦」
究竟我係唔係親生㗎…
兩個女人密密斟，我就負責斟茶遞水。
「唉，傾完喇」子瑜伸一伸懶腰
「講完我壞話喇？」
「係啊，麻煩友」
唔知點解，我覺得我同子瑜之間開始有啲老夫老妻嘅感覺…
「訓覺啦，聽日就正式開始上堂喇」
「我未驚過，全能學霸」子瑜自豪地說
「妳讀咩elective啊？」我問
「History，Geog，Econ」
「少癲喎～，我讀Geog，Econ，文學」
「文學…勁」子瑜豎起大拇指
「歧視我？」
「估唔到啫」
「我同妳都有2個elective一樣喎」
「小心我輾壓你啊」她放話
「睇下點，訓喇，早唞」我說
「你都係」她說
相處長了，彼此的隔膜沒以前那麼明顯。
只是，我覺得她極力隱匿著自己的陰暗面。
第二天早上，終於沒有遲到了。
「八婆記得起身喎」
「梗係，我話過要輾壓你」子瑜雖然剛睡醒但銳氣不減
「眼屎都未撩好就想輾壓我，食早餐啦」
早餐你地expect啲咩？全餐就無可能㗎喇，粟米片放題就有。
「食完就換衫啦，差唔多夠鐘」我說
「哦」
「唔該今日唔好再走巴士喇」我說
結果，子瑜的合作下我們得以登上巴士。
回到學校，同學紛紛以羨慕的眼神看著我和子瑜。
「喂喂喂～你地又一齊嘅？」
「係咯係咯，有人見到你同班花一齊行喎」
「你地係唔係一齊左啊？」
「金童玉女，估唔到豪哥唔聲唔聲咁有料」
吓，WTF？
同學見我無咩反應直接show部電話俾我同子瑜睇。
WTF？點解會有人影到我同子瑜入快餐店㗎？
「唔係㗎唔係㗎，咁啱咋嘛」
「唔使狡辯喇，有人連你地一齊坐巴士返學都見到」
今次真係跳入黃河都洗唔清…
「同學，做乜無啦啦起哄啊，返埋位上堂喇」肥黃及時救場
唉，究竟邊個咁八卦啊。
「喂究竟係唔係真㗎？你地關係如何啊？」腎虧明非常期待地問
「我同你講，呢件事絕對要保密」我決定將事實告訴腎虧明
「吓吓吓？咁大件事？」
「你夠膽講出去我第一個打撚死你」子瑜插嘴說
「我發誓我唔會講出去，講左我呢世都唔會有女」腎虧明信誓旦旦地說
「我同佢同居緊。」我指著子瑜說
「吓～～～？」腎虧明嚇得跳起來
「屌你唔夠大聲啊？」我以迅雷不及掩耳的速度掩著他的口
「真㗎？你地點解同居嘅？」
我用左足足兩堂中文解釋成件事。
「哇，峰迴路轉，好睇過偶像劇」腎虧明摸頭嘆息
「消化吓，最緊要唔好同人講」
「咁我去廁所先」
我同子瑜差在未跌落地….
「er同學我地今日睇吓片然後做幾條DBQ啦」Geog條友hea到極點，唔係靠自學一早收左皮
「唉，佢究竟幾時肯做吓quiz改吓卷」我說
「又話學霸，靠自己啦」子瑜寫著筆記說
「我無妳咁勁啊」我說
「宜家知我咩料啦」子瑜趾高氣揚地說
「叮噹叮噹～」咁就一堂，都唔知做左乜
「轉X3喇，腎虧明呢？」
唔使講佢都係去廁所未返…
「Ching唔該晒幫我攞埋書喎」腎虧明用校服擦擦還是濕漉漉的手
「抹乾先掂我，上堂啦」
「同學我地今日有一個測驗溫返F4啲篇章」
「又quiz，今次玩完」
「定啦，Miss Wong應該唔會害我地」我氣定神閒地說
「咁又係，Miss Wong世一！」
腎虧明愛慕Miss Wong都唔係第一日嘅事…
「同學，唔好再歌頌Miss喇，收埋書notes我地宜家測驗」Miss Wong語笑嫣然地說
測驗唔係特別難，但寫到手殘。
「哇痴線，佢走去考蒹葭嘅押韻特色，好彩我有背」腎虧明舒一口氣
「一早話考中四啲嘢，有咩咁出奇」我問
「無你咁勁吖嘛大佬」
「各位同學今日嘅功課係作文，題目係近在咫尺的陌生，下星期交」
「又黎呢啲難到死嘅past paper問題」
「係咁㗎啦，鬼叫你揀呢科咩」
「唉，俾你累死咯就係」
小息，我坐喺位苦苦思考究竟作文寫咩好。
近在咫尺，陌生，可以話係一個好大嘅對比。既然會近在咫尺又點會陌生？
我好懷疑set題目嗰啲人都好變態…
突然走廊傳來陣陣長笛聲，應該是來自音樂室的。
「唔？」好少聽到小息有人練嘢
樂曲非常跳躍，而且吹起來十六分音符彈跳非常。
呢條友有料到喎，認識吓佢先。
我輕輕推門進去音樂室，發現子瑜正在演奏著。
咁又係嘅…得佢有資格借音樂室玩。