她的伴奏者: 15

風平浪靜過左幾日，眼見Miss Chan講落單嘢無下文，我同子瑜都放軟左手腳，點知先無練兩日，MissChan就無啦啦話班達官貴人聽日黎，嚇到我同子瑜功課都未做就練習，一練就到夜晚。

「差唔多啦，班高官都唔會聽得出細節有問題」我話，望下個鐘，已經八點。
「咁求其嘅你，失望」
「妳咪一樣，吐音改連音，震音無晒」
「我點都好過你咯，唔理你，叫外賣。」

相當不幸地，食緊外賣嗰陣我老母打黎。

「衰仔有無恰子瑜啊？」




「梗係無，佢不知生活幾愉快」
「你仲講大話？食外賣？你自己嗰陣就煮飯，依家就要女仔陪你捱外賣？」
「今日係咁啱…」
「唔係啊auntie，今日係呢個星期第三餐外賣喇」屌你周子瑜
「周柏豪，等我返到香港睇下我同老豆點炮製你」

收線了。

「周子瑜！屌妳！」我好無奈
「邊個叫你成日恰我？自己攞黎嘅」子瑜仲要呢個時候離檯，擺明唔想執手尾




「周子瑜！返黎執嘢！」我叫住佢，佢已經衝坐入房
「我唔執我唔執喎」

子瑜一路跑上張床，我一路追入去，無為意地下個拖板，就kick一kick，成個仆落張床度，即係子瑜上。

子瑜望住我，好彩我隻手啱啱好平衡到，但呢個狀態真係好難熬。我不得不承認，我唔係好想結束呢個情況，因為我確實對子瑜心動了。

「望夠未啊周柏豪…」今次佢講嘅語氣唔再係屌嘅語氣，反而係有啲怕醜同無奈。
「sor…sorry，我無心…」





嗰晚，我成兩點幾先訓得著，淨係「床咚」子瑜一下已經夠我心臟噗噗跳左成晚，思春上腦。

結果，第二朝起身嗰陣已經八點，其實大可以寫封家長信告假一日，奈何今日班達官貴人大駕光臨，我地做細嘅邊有得say no。

「唷，你都唔知醒？」子瑜啱啱喺廁所出黎，仲係睡公主狀態
「係啊，慢慢啦」

子瑜企喺廳中間，咬住條髮箍綁頭髮，唔好引誘我啦。

「呃…食咩早餐？」我意圖冷靜自己
「無所謂啦，前晚係唔係買左啲麵包？」
「係啊，咁我整啦」

望一望電話，已經收到幾個Miss Chan嘅miss call，打返過去就聽到Miss Chan咆哮。





「搞咩啊周柏豪？你同周子瑜又會一齊no show？」
「呃…喺屋企食緊早餐」我話
「班高官9點就會到㗎喇，我諗10點就會睇你地，快啲返黎tune音啦」

求其食埋個早餐，坐的士返學校，仲要記一次遲到，唉。

見到校長恭恭敬敬個樣都覺得嘔心，仲要煲到個音樂室幾好幾好，但夏天連開冷氣排練都唔得。無驚無險表演完，返落去上堂，即刻俾人圍。

「你地又會一齊遲到嘅？」
「我地係去表演唔係遲到」
「知你地乜事啦。」

又是有驚無險的一天。話說班達官貴人來了之後話會撥款俾學校發展音樂，擴建音樂室喎，又話應該搞啲咩一人一樂器。

我同子瑜真係得啖笑，不過都好，起碼今次表演叫做幫到學校。而張遲到紙？都係要硬食，唉。





返到屋企，今晚為左慶功煮西餐，仲專登買左支利賓納玻璃樽裝。

「哇張大廚整咩地獄料理啊？」
「妳就地獄料理，咁多野講又唔幫手。」
「得啦，我幫手切嘢。」
「妳個樣咁兇狠切咩都掂啦」

我個烏鴉嘴真係唔應該講咁多。

「啊！」
「咩事。」我即刻望過去，原來子瑜切親手指。
「哎呀，你痛唔痛啊？乜咁唔小心㗎？」
「仲好講，唔係你叫我幫手我會整親？」睇住眼前呢個萬人迷因為整親而差啲喊，對眼水汪汪都幾靚。
「對唔住啊，最多以後唔使妳入廚房，我幫妳消毒先。」





我輕輕扶住子瑜行去客廳，再搵啲消毒藥水同膠布出黎。

「論論盡盡咁，上次跌碗今次切親。小心痛啊。」我幫佢上啲藥水。
「啊…」
「痛？」
「梗係痛啦…不過點解你好似咁熟手嘅？」子瑜問
「我老豆老母成日出差，好細個已經自己照顧自己，呢啲嘢都係熟能生巧啫。好喇，包紮好喇。」我抬頭一望，子瑜都望緊我。

我地之間嘅距離只有唔夠一個拳頭。我感覺到我塊面已經出賣左我自己，我抑制自己嘅心情，慢慢起身。

「妳休息下啦，我煮埋飯先。」

入到廚房，我即刻冚自己兩巴先。周柏豪，你照下鏡啦，你又唔靚仔又成個毒撚咁，識彈鋼琴又點啊？點高攀得起周子瑜啊？依家只不過係合作關係，唔好諗咁多！清醒完，我繼續煮飯。





我好懶，兩塊牛扒就咁撻落隻碟度就算。

「哇你有無再懶啲啊…」
「屋企食唔使擺盤啦。妳切唔切到啊，使唔使切埋俾妳？」
「最好啦…」

結果，子瑜就相當滿足，我就又洗碗又切肉。