好,當大家知道咗Google Analytic係做乜之後,我就要講解下點樣加點擊數同人氣,呢度想講嘅係正路咁加,而唔係用不良手法。呢度嘅做法係基於GA嘅算法,喺一個無credential嘅環境正常咁瀏覽網頁,而乜係無credential呢,就係瀏覽網頁唔需要登入或者做任何認證,而正常瀏覽網頁就係指你用緊一個瀏覽器而唔係downloader或其他奇形怪狀工具。(事實上credential係有幾個層級,例如你用Chrome而你登入咗browser已經係一種credential,當你用acc login咗某小說網又係一種更深嘅credential,如果乜都無嘅話,IP就係最原始嘅credential。)

你作為一個普通人,自己就係一個天然嘅credit,利用你部智能電話,插一張電話卡,用一個App Store或Play Store download嘅正常browser,唔好用Ad block,唔好用Incognito mode(無痕模式),咁就已經係一個優良嘅credit。跟住你就可以打開你篇文章,逐章逐章正常㩒入去,你就可以幫自己加點擊數,就如同有任何一個讀者欣賞你篇佳作咁。

係,你需要嘅係正常,正常就係指一章一章咁睇,係咁㩒F5係無用嘅,而且要用網頁入面嘅連結嚟㩒,重要你係有scroll過個網頁,而唔係瘋狂跳下一頁,並且每一頁停留15秒以上。聽到係咪覺得好麻煩呢?其實唔麻煩,因為正常人就係咁睇網站,試幻想你喺一個網購網站,你都會先睇下幅圖,可能再click入去放大圖,再轆落去睇下價錢同有無貨,最後就係詳細介紹同用家評價,所以一定會消耗動作同一定嘅時間。假如你諗住可以將自己篇文每一章條hyperlink滙出成為一個Excel清單再自動下一行enter嚟加點擊,sorry,你只係喺度浪費緊自己嘅時間,電腦運算力,同電費。

當你有咗第一個加點擊嘅credit之後,你可能心諗,我重有部電腦喎,再有一部iPad喎,於是你就開晒三部嘢嚟一齊係咁㩒自己篇文,好似打碟咁每個device每隔廿秒就轆幾下click一下,忙完成朝之後可能發覺點擊數唔係加咗好多。對唔住,你可能已經唔小心將啲chrome login咗同一個Google Account,又或者三個device一齊共用緊你屋企嘅IP,擦點擊數呢家嘢,都係留返畀專業人士嚟啦。你要記住,Big Brother(Google)is watching you,佢比你更清楚你自己,而且佢好記仇乜都記得,加上佢好聰明(自作嗰隻)因為有AI系統運算。

咁小弟作為一個新類型人,又係瘋狂自戀嘅爛作者,當然就會24/7咁放幾部電話喺枱面,瘋狂咁同一時間翻睇自己嘅作品,proof read完再proof read,如果唔係點嚟十萬八萬點擊!如果你信嘅話。
講完點擊下章就講人氣。