《時。噬》: 世界的真相

一路上我們完全沒有任何交流，只想快點回到去。

來到大廈的門前，從遠處已經見到裡面來回踱步的錄音機，他也察覺到我們回來了，死死的看著我們，我們兩個人，我大概已經知道他在想什麼。

還有十幾步之遙錄音機就預先打開了門，「快啲，快啲入嚟啦！」他再瞄了我們身後兩眼，「你兩個點可以畀肥…唔係，展龍自己一個行後邊，重要咁遠都未見佢。」

我們沒有說些什麼，只是輕輕搖了搖頭。

平日斯文的錄音機突然變得非常不同，「你兩個真係識講笑！點啊，佢匿咗喺邊邊啊，想玩我？得啦，你哋搞到我擔心喇，贏咗喇好未。叫展龍出嚟啦！」





南見狀只是伸手把門關上，錄音機開始意識到這不是一場玩笑。「上到去再話畀我聽到底發生咩事。」進去電梯後，他直接按了31樓。


「叮」電梯門打開，31樓這邊沒有上邊人來人往，更多的是空房間，每日放置著檯櫈，大概是主要用作會議室。

錄音機隨便帶我們走進了一間小房，我們三人坐下來之後只剩少許空間，那空間，容得下展龍。

「我對你哋唔住…我唔知道會變成咁，早知係咁，我唔會畀你哋出去，唔應該要你哋面對啲咁嘅事…」沒有人想要這樣的結果。

「佢有權知道。」南突然說了句我聽不懂的話。





「原本我諗住我哋嘅推測係錯，咁嘅話知道嘅人越少越好。」錄音機添上一句讓我腦袋快要燒掉。

「你哋到底講緊乜嘢？！」我開始按捺不住。

「重置囊，我哋喺商場入邊遇到重置囊。畀佢發現之後我哋逃走，但係展龍畀佢捉到。」除了那不明的名詞之外，南如實陳述。

錄音機聽後嘆了口氣「重置囊…真係，唔怪得上一隊出去嘅人無再返嚟…」

雖然我聽不懂，但我肯定了一件事，「即係你哋一早知？！由我見到便利店入邊無曬物資就知道，明明已經無理由要再入去！你哋一早知呢件事咁危險！點解重要畀展龍去！你兩個有份殺佢！」





「唔可以完全怪我哋，佢聽到有肉食就二話不說應承呢次任務。」我第一次感受到南的無情，不，是冷血。

錄音機示意南停止，「賢，我明白，今次事件對你嚟講好大打擊，對我哋兩個都係。但你要明白一樣嘢，呢個世道，越係有能力嘅，越係唔敢行出嚟，展龍嘅犧牲對我哋全部人嚟講都好重要。」

「重要？！我只係知佢死咗，樓下有邊個會知呢件事？就算知道又有幾多人在意？」我起身大力拍檯。

「你聽我講埋先，唔通你唔想知展龍係畀咩殺死？你唔想知呢個世界真正發生緊咩事？」難得地他今次不再是阻撓我了解世界的真相。

我坐了下來，他繼續說「重置囊，係我哋幫佢起嘅名。佢…我都唔知點樣形容畀你聽，只可以話唔屬於我哋世界嘅生物。」南突然拿出錄影機，害死展龍的另一源頭。「你影到？」

南默默打開錄到的影片，並向我們展示。「嗚…..嘎！」影片中向鏡頭撲來的是一隻怪物，不折不扣的怪物，與我在書上所認識的任何一種生物都不相似。

這怪胎沒有眼，臉上就是一張大嘴，一顆顆尖牙長在左右兩旁。連接身體的是大概成年人兩倍長的頸，在錄影的頭幾秒頸上突然無數瓣外皮層展開，隱約見到裡面是紫色的濃液。畫面到這裡就轉向了地板並一直搖擺著，南趕緊把影片關掉。





「係，無錯，好肯定呢隻就係重置囊。咁今次件事真係向住最壞嘅方向發展，一定要話畀晨曦聽。」錄音機喃喃自語。

「咁你哋叫解釋咗？我只係知道我見到隻怪物，你哋一早知道佢存在然後叫展龍去送死！」我無法接受。

「我哋爭你一個解釋。」錄音機開始講出些如果不是親眼看見肯定沒有人相信的話。「喺好耐以前，人類發展好蓬勃，科技更加係不斷突破。其中有一位科學家不斷研究出好多唔同造福人類嘅嘢，但係慢慢佢沉醉咗喺被萬人讚頌嘅榮譽感當中，佢覺得人一生得一百年左右唔夠。佢全心全意轉去研究點樣延長人嘅生命。但係當時嘅醫療科技，就算佢聯同世界上最頂尖嘅團隊，佢都知道自己喺死之前無辦法完成到呢個偉業。」

「所以佢整咗呢班怪物出嚟？」我打斷。

「唔完全係，我問你一個問題，人嘅死亡最主要係咩造成？」他以問題引導我思考。

「生老病死，一係老死，一係病死。」我不耐煩地答。

「啱一半，正確啲嚟講係時間，人老死係時間造成，病亦都係隨時間惡化。所以咁講，只要延長到自己所擁有嘅時間，就係永生。」他解釋。

錄音機稍作停頓「佢，成功咗，但係為人類招惹嚟咗一場末世。喺呢項科技慢慢發達，越嚟越多人擁有用唔盡嘅生命同時，呢啲…怪物…喺世界各地憑空出現，以人類為食。」





以人類為食，這幾字要講出口我相信對他來說不易，對於站立於食物鏈頂端的任何一個人來說都不易。

「你話憑空出現，點解咁肯定係關佢事？」我不理解。

「以前啲人有佢哋嘅方法求證過，我諗。」他的答案無菱兩可。

「咁點解啲怪物叫重置囊？」我不再深究，他說了算。

「唔係所有怪物都叫重置囊，佢哋有唔同種類，我寧願佢係其他都好過係重置囊…」什麼意思？「我哋唔可以用常人角度理解，但係我而家無咁多時間同你解釋原理。簡單直接啲講，重置囊會霸佔地盤，然後長期匿喺入邊，而佢係可以每隔一段時間重置自身一定範圍內嘅事物去某個時間點。」

「咁…！」我未開始已經被他打斷，「我知你諗乜，無可能。兩個原因，一，由重置囊所重置嘅所有嘢我哋都唔可以強行擾亂。呢個原因我預你一定會同我嘈，所以你聽埋第二先，呢班唔係野獸咁簡單，係有一定智慧，佢重置嘅時間點會揀返佢捉到獵物嗰刻，而你哋走甩咗係唔會被重置。」

簡單而言，展龍是沒法救出來了…嗎？「我哋拎齊架生入去，呢到樓上咁多人，佢智慧高極有限啦？！」





「賢，我好明白你心情，唔單止你失去咗一個同伴，我都無咗個學生。先唔講我哋有無咁多架生，我哋從來唔敢由重置囊手上搶返任何嘢。」

「點解？」

「因為無人知會發生咩事，我哋怕。」他不敢面對我。

「就係你一句怕？嗰條命嚟！如果你係畀人捉咗去食你想唔想人哋嚟救你啊？」我質疑他的想法。

「有時候，少數人嘅犧牲係可以換來多數人嘅安全。」這句話是出自南。

「你呢？要你嚟犧牲又肯唔肯？！」我終於忍不住。

他沉默了片刻，「如果有必要我唔介意，但似乎我生存嘅價值大過死咗去。」

「你咁講咩意思？！即係話展龍就抵死？」





「我無咁嘅意思，你唔好屈我！」他展現了憤怒的一面，「全日你都喺到嘈嚟嘈去，唔好以為我平時好玩得就覺得我可以畀你不斷呼呼喝喝！當你知道世界嘅全貌，我敢講你今日嘅說話一定會收返曬。」

「世界嘅全貌？」

錄音機把這場罵戰畫上終結。「夠喇，你兩個今日都經歷咗太多，攰喇，情緒都唔穩定。返房休息下先，雖然事態嚴重，不過你哋咁樣去見晨曦都無用。我會去做個簡單匯報先，等晨曦聽日再召見你哋。」

晚上我們並沒有分房，但卻一句話都未有講過。我一時間無法接受這個是我認識多年的死黨。是冷血嗎？我說不出他的轉變，總之就是整個人都不同了。

到底，他有多少秘密隱瞞住我，有多少不能見光的事情？我不敢再想。或許，是我敏感了，或許，我真的需要點休息。