我曾以為今日所發生的事是都只是一場夢,直至我老媽再次把我叫醒,我才知道這並不是夢。

「宏仔,唔好再訓啦,大件事呀。」我老媽又再一次打斷我的睡眠。

我睜開雙眼,眼前是她皺著眉頭,神情荒荒張張。我見狀便問道︰「咩事呀媽子。」

「你快啲出去睇電視。」

我坐起來,順著她意,走出大廳,看著電視中的特首正在發言,她道︰「今日下午既公告大家都應該已經收到,相信大家都了解紙牌計畫架啦,如果唔了解既話我相信人工智能都可以解答你地既疑問架啦,呢次既發言目的主要係希望市民可以合作,適應呢個新既計畫,唔好作無謂既反抗,我明白一時三刻要改變係難既,不過公道咁講我自己都係參與者,我都要重新適應,而我相信未來各位都將會接納同習慣新既計畫。要講既都差唔多講好,輪到問答環節。」





一個台下的記者舉起手,問道︰「想問下點解咁重要既事竟然事先無同市民交代既?」

特首回道︰「因為呢個涉及高度機密,係未發佈計畫內容之前唔可以洩漏半點風聲,所以我地冇向市民交代。」

那記者沒有追問,接著又到另一個記者舉手發問道︰「我都睇過呢個計畫,想問係呢個計畫底下,企業管理人同企業既關係係咪已經分割開?簡單啲咁問,原本係有錢既人係咪唔再需要賺取經驗值?」

特首回道︰「唔可以咁講,實際上企業既創辦人都仍然係有必要做任務,雖然佢地既數值的而且確係高,但係係呢個計畫入面仍然存在一個階級係度,簡單啲講一個有錢人假設數值為梅花10,但係數值為紅心10既人面前,佢依然必須遵從紅心10既人既指示。」

當特首說到這裡時,只見台下群情激憤,議論紛紛,一陣子後一個女記者又道︰「遵從係乜意思?係咪姐係數值高既人要數值低既人去死,個個人都必須要死?」





特首失聲微笑,道︰「當然唔係啦,我地並冇咁唔人道,一切會奪去他人生命既命令係不被允許,同時違抗合理命令都係不被允許,我地設立左一個專門既執法部門去阻止呢啲事情發生,大家唔洗擔心。」

一個記者又舉手發問︰「到底點解會有呢個計畫?」

特首回道︰「相信大家都明白,不論以前定係依家,好多人所做既事往往同成果係不成正比,有錢人坐係度就月賺百萬,但真正落手用力既人,卻只得幾萬蚊既收入,窮人越窮,富者越富,呢個計畫目的就係改變呢個情況,我地要令所有人付出既血汗係可以得到應得既成果,比窮人都有翻身既機會…」

「鈴鈴…」屋外此時突然傳來門鐘聲,我喊老媽去開門,她照我說話打開門,門一打開,幾個身穿西裝,戴著墨鏡的男人出現在門後,他們道︰「請問葉智宏係咪度?」

我媽看著我,然後又望回那幾個男人,又向幾個男人問︰「請問咩事?」





他們道︰「根據紙牌計畫,葉智宏既數值並冇權限居住公屋,我地過泥係帶走佢架。」

我媽聽完大驚,道︰「咩話?你地要帶走我個仔呀?唔得,唔可以,佢個名係公屋度架喎!」

他們繼續道︰「好抱歉,但政策改變,依家佢唔可以再住係呢度,葉智宏先生,請你跟我地走。」

我老媽擋住他們,道︰「唔得,你要帶就帶走埋我!」

「你有權限居住公屋,我地冇必要帶走你,你再阻止我地既話,我地將會向你發出拘捕令,請唔好令我地難做。」

我一聽見,馬上大喊︰「得啦得啦,我跟你地走,唔好拉我老母落水。」

那幾個人再沒有闖進來的舉動,只揚手到門外,輕描淡寫道出一句︰「請。」

我深吸一口氣,走到他們面前,我老媽則拉著我的手肘,道︰「宏仔唔好去呀。」





我拍拍老媽的手背,安慰她道︰「我很快會回來。」

當初我以為只是弄些東西,以為不會離開太久,只是沒想到,我一走出這個家門,一走便是五年。






 
已有 0 人追稿