《我既人生竟然由一張紙牌A搞到重新開始？》: 第十五章 低數值的悲歌

我們就在公園執行任務，我和廣伯的工作比較容易，所以上手也較快，阿正起初則被那個洗地儀器弄得頭昏腦脹，足足費了近一小時才能打開那儀器，若不是有人工智能的幫忙，恐怕阿正要花一日時間來研究怎樣打開那儀器。

我以鉗子把公園的垃圾夾進垃圾車中，廣伯則掃除落葉，大家各自分工明確，埋頭就做到中午。

我抹了抹汗，向眾人道︰「廣伯、阿正，係時候食晏啦。」

阿正癱坐到地上，大呼︰「呀！終於食飯啦！」

廣伯也不再掃除落葉，放下掃帚，向我問道︰「食咩？」





我回道︰「唔知附近有咩食，我地擺低啲野入間房先，之後再去隔離街兜個圈。」

眾人點頭，開始把清潔用具推進起初換制服的那個房間。

進入房間後，阿正又開口，道︰「好辛苦呀，唔想做啦！」

廣伯回道︰「頂埋半日啦，之後返去訓教。」

我也插嘴，道︰「佢分派比我地既任務都係勞力既野，唔知係用咩準則派任務…」





廣伯道︰「可能就返我地能力分都唔奇，我地又冇專業資格，舒服既工就算派到比我地都未必做到。」

我點點頭，繼續道︰「咁我地一世就只可以做呢份工？」

廣伯聳聳肩，搖頭表示，道︰「唔知呀。」

阿正此時又插嘴，道︰「唔好再講啦，我好肚餓呀，快啲搵野食仲好啦！」

我和廣伯一笑置之，便一起走出房間，往鄰街尋找餐廳。





很快我們便來到街頭，到處找了找，找到一間拉麵店，外觀頗為乾淨，餐牌也很豐富，問了眾人後也決定在這裡進餐。

我們在店外呼喚店員，一個年輕男生穿著制服出來，道︰「歡迎光臨，請問三位客人展示你地既數值。」

我們一聽便覺得哪裡怪怪的，我和廣伯對望，只見他也是臉色凝重，猶豫該不該展示數值。

然而阿正卻毫不猶豫把自己的數值展出，那紅紅的方塊A就原形畢露地呈現出來。

那年輕的店員也只是微微一笑，道︰「唔好意思，因為新政策既關係，本店只允許梅花5以上數值既客人用餐，造成你地不便唔好意思，請你地離開。」

阿正臉色一變，大喊了一聱︰「下！」

我見阿正彷彿要發惱，馬上叫廣伯一起拉走他，這樣才避免一場衝突。

我們又走到一處空地，阿正氣呼呼地說︰「有冇搞錯！點解冇得食架！」





廣伯稍稍安撫一下他，又開口道︰「冇辦法啦，個新政策係咁都冇辦法，不如諗下我地仲有咩可以食仲好啦。」

我馬上開口，回道︰「唉，我地數值最低仲有咩可以食？去便利店買個飯團食算啦。」

阿正垂頭喪氣，失落地道︰「唉！都好呀，有飯團好過冇。」

於是我們一同往便利店走去。