男友出軌，我決定送26頂綠帽比佢: Secret風波 （上）
上Secret?出咗事？丁家岐？我即刻睡意全消，神經緊繃，進入高度戒備狀態。
「你自己上去睇下啦！」阿瑩支支吾咁答我，無再多講就收咗線。
我有種不祥既預感。
Secret係食花生睇戲既地方，任何人都可以匿名投稿，邊個女神係公廁去咗開房，邊個狗公周圍溝人女朋友，邊個老師同學生有不尋常關係，邊個係胸圍度塞隻襪扮大波......
總之唔理真假，八卦越勁爆，就越多留言同讚好。第二朝，有人成功上位，有人身敗名裂。真相，Who cares？
我click咗幾次先入到去，證明真係多人到扑街。
平時大家習慣潛水，除咗中意出風頭果幾個，其他人都唔會點講野。今鋪一個炸彈，將所有人炸哂出黎。
首先映入眼簾既係一篇千字文。
「丁XX，這麼多年
很想問你一句：
你有沒有愛過我 哪怕只是一秒鐘？」
丁呢個姓本來就罕見，成間學校數埋都唔夠三個。而有本事成為話題既人，睇怕都只得丁家岐一個。
「在床上 壓在我身上的時候
你說 總有一天
我會成為你明正言順的女朋友
但是 現在還不是時候
我問 那我要等到什麼時候
你的回答 是一個巴掌
然後掐著我的脖子
粗暴地在我身上進進出出
你說這是對我的懲罰
因為我問了不該問的問題
在我快要窒息的時候
才拔出來 射在我臉上
溫存過後 出了房間
你冷漠得像個陌生人
沒再多看我一眼
要是在路上迎面碰到
你甚至吝嗇於給我一個招呼
我就像那被隨意扔到地上的避孕套
被你用完即棄
是我太天真 才會一次次地相信你的謊言
相信你會為我改變
相信我會是你最後一個女孩
相信你會像我愛你那般愛著我
我愛你
轟轟烈烈
我愛你
如同飲鴆止渴甘之如飴
我愛你
如同大夢一場
愛到最後 我的心已是千瘡百孔
我累了
只能到此為止
是時候結束了
再見 」
成三百幾個like，留言多到摺埋哂，每一條留言既結尾，都用咗大量感嘆號，睇得出大家既感情都好強烈。
「有女唔食罪大惡極！條女自己送上門 on 9正臭雞」
「原來丁XX有sm傾向，咁佢女朋友咪日日俾佢屌到喊？」
「扑你個街！！！成間學校既女 可以食得落口既 都差唔多俾你食哂 咪掂我女朋友呀！！！！！！」
「樓上扮咩，你都無女朋友！」
「@Haley Lai 你男神」
「球場上你係陽光大男孩，台上你係風度翩翩的領袖生。原來真實既你係披著羊皮的狼！！！！！！到處亂搞，你令我太失望啦！從今日起，你唔再係我男神！我要同你撇清關係！」
「有一次落club見到丁XX，佢主動行埋黎，話同我一間學校，要請我飲酒。飲咗幾杯，佢攬住我條腰，下面不斷頂過來，又同我濕吻。有啲醉醉地，咪一齊入房瞓咯。
利申：後來我先知道，原來佢有女朋友......」
有一刻我以為自己睇緊紙言既甜故0_0。
就係大家傾得火滾時，有人靜靜雞出咗另一個post，標題叫做「丁X岐的五十度陰影」。
「籃球學會會長，侯選內閣「雲霄」副會長丁X岐，曾經同友人講過，偏愛清純乖巧既女仔，因為佢地唔會反抗，容易控制，方便調教同臣服。
另一邊廂，丁X岐係萬聖節當日，現身蘭桂坊偷食，與一打扮性感既女仔（非女朋友）激情擁吻。有圖為證！ 」
我隻手停低咗。心上既傷口未結疤，仲滴緊血，又俾人捅多一刀。
奇怪既係，今次我居然無太大感覺。可能崩潰到一個程度，會開啟心理防禦模式，一切都變得無所謂，再大既風波都同我無關。
我就好似個事不關己既旁觀者，審視呢一場鬧劇。
我繼續睇落去。
總共有四張相片。
第一張，女仔既大腿勾住丁家岐既後背。
第二張，丁家岐隻手係個女仔身上游離，兩人的眉梢眼角處盡現情慾。
第三張，拉扯之間，女仔既黑色吊帶跌落至手臂，露出半個酥胸。
第四張，丁家岐將頭埋係佢既胸脯上，女仔昂起頭，肉緊得咬實嘴唇。
每一張都咁不堪入目。
我終於明白，點解阿瑩係電話唔願意多講，而要我自己去睇。換轉係我，都唔會講得出口。
「有人身穿白色襯衫，內心其實骯髒下流。抱歉打破你地既幻想，但係世上真係無太多童話。咁多位女仔，咪再傻傻上當啦！
P.S.過500個like有片睇！！！」
like既數目每分每秒都增加緊。
出post既人，好可能呢一世都未試過咁受歡迎。
前面係慘遭拋棄既受害者，後面係出於正義、手握實錘既知情者。前後呼應，互相補足細節，一場桃色糾紛基本成型。
究竟係邊兩個人同丁家岐有深仇大恨，要串通一氣爆佢大獲，將佢置諸死地，永無翻生之日？
呢個post隨時會俾人刪，我cap低啲相同文字，可能之後會用得著。
雖然丁家岐做過對唔住我既事，但真係有事發生起上黎，我第一下反應都係擔心，第二下係心疼，而唔係幸災樂禍，覺得抵佢死自己攞黎。
無計，女仔天生既母性作崇。
唔知佢宜家點呢？我突然之間好心急，好想即刻搵到佢。
但佢關咗機。
我二話不說，下個站跳落車，橫掂今晚應該瞓唔著，不如逐個地方搵。
我就唔信搵唔到佢。