男友出軌，我決定送26頂綠帽比佢: B : 007 ！機關槍 ! (5)

「到底係唔係你做既？」我盯住陳子俊，努力用平靜既語氣問佢。

「如果我話唔係，你會唔會信？」陳子俊既眼神閃過一絲亮光。

「唔信。」

「屌，咁你又問。」佢眼中既光驟然黯淡。

「我信唔信係一回事，你認唔認又係另一回事。」講講下有啲炆，補多句加強氣勢：「不過有人敢做唔敢認。」





陳子俊突然一拳打落推幣機。

我嚇到跳起身，個心都離一離。噹啷一聲，十幾個金幣跌出黎。

「係我做既，咁又點呀？」

我冷笑出聲：「你終於肯認啦咩？」

「係，相係我偷影既，條女係我搵返黎勾引丁家岐。你滿意啦？」佢好似俾我㷫著咗，成個人豁哂出去。





「你好賤呀！」我咬牙切齒咁話。

激死，一鬧架我就詞窮，個腦輕哂機，淨係諗到一個單詞。

「你又唔係第一日識我。」佢擺擺手，表示無所謂。

今晚，我徹底見識到，咩叫面皮厚過樹皮，咩叫人無恥則無敵。

「點啊？係唔係好後悔，無拎部手機出黎，錄低我講過既野？」





「我無你咁識玩手段。」我好不屑咁話。

「唔好扮啦，你頭先先借完我黎過橋，想激丁家岐，你估我唔知咩。」

被人篤爆咗。

「我邊有。」

死撐咗唔到三秒，鼻頭一酸，眼眶一紅。

陳子俊見我眼淚係咁流，唉咗一聲，俾咗張紙巾我，「你仲係咁鬼死易喊。」

「但係你要知道一野樣。我無拎枝槍出黎，指住佢個頭，逼佢就範。」

我無得反駁。





煙酒、遊戲、毒品、性愛......世界上有千百種誘惑，沉淪抑或拒絕，選擇從來都係自己做既，唔怪得人，亦唔怨得人。

「佢又話中意清純聽話既女仔？」我仲係喊緊，諗起果個妖艷賤貨，感到十分沮喪頹廢。

陳子俊坐係我隔離：「其實係男仔心目中，只有三種女仔，一種係屌得，另一種係唔屌得。」

「咁仲有一種呢？」

「仲有一種係人妖。」

「呢個笑話好爛。」

「但係你笑緊喎。」





「咁我唔笑咯。」

「講到邊呢？屌唔記得。呀係，屌得同唔屌得。我地男仔分得好清楚。有啲係玩完就算，有啲係可以帶出街介紹俾人識。」

「男仔可以同時中意幾個人？」

「係架。」

同時中意幾個人，咁咪姐係邊個都唔中意？既然如此，點解丁家岐唔同我分手？

「但係最重要既只得一個。」陳子俊又話。

哦。

丁家岐都講過類似既說話。





佢話心裡只得我一個，對妖艷賤貨只係一時鬼迷心竅。

咁問題啦。

我係佢心目中既地位，會唔會有朝一日被人取代，唔再係最重要果個？

「丁家岐無你想像中咁好，我唔想你傻傻地俾佢呃。你係個好女仔，你值得一個全心全意對你既人，」

我覺得陳子俊有野未講完。

因為佢結尾既語氣係一個逗號，而唔係句號。

「其實我中意咗你好耐啦。」





佢既語氣越係平淡，帶俾我既震撼就越大，好似催淚彈咁原地爆開。

陳子俊繼續講埋落去。

「我之前覺得我襯唔起你。

所以我好努力向上爬，你知道我英文屎到爆，口語程度仲停留係How do you go to school? I go to school by bus既程度。我每晚溫習到三點，因為只有成績達標，我先可以去競選學生會；

因為你中意，我就走去學彈結他，參加sing con；

班際籃球比賽，我次次都打得落力過人，擦傷過跌傷過拗過柴；

做咁多野，就係想企係高處，等你見到我。

丁家岐做到既野，我都做得到，我甚至可以做得比佢好一百倍！」

女仔唔多唔少，都有啲慕強心態。丁家岐的而且確係好優秀，籃球冠軍、結他好手、內閣副會長......我承認，如果無呢啲閃光點，我都唔會留意到佢。

但係撇除呢啲光環，我中意佢，係因為佢係丁家岐。就算全世界都離棄佢，就算佢真係犯錯傷害到我，我都係會企係佢果邊。

「你要同丁家岐爭我？」

呢句話一講出口，我覺得自己好有做綠茶婊既潛質。

「係。」陳子俊語氣好堅定，唔知仲以為佢下一秒就要上戰場打仗。

「咁你有無諗過，你其實唔係中意我，你只係唔想輸俾丁家岐。」

佢靜咗。

我知道佢性格受軟唔受硬，語氣不自覺變得溫柔，好似哄緊細路仔：

「我相信你唔需要搞小動作，憑實力都可以贏，就好似細個打架一樣，你係超級無敵爆炸勁既特務，可以一個打十個。

你放過丁家岐啦。」

「你仲係句句都離唔開丁家岐。」佢好無奈咁話。

「胡凱婷，如果當初我同你表白......」陳子俊繼續不死心追問。

我乾脆俐落打斷佢，「我未必唔會接受你。」

未必唔會，姐係可能會，可能唔會。

呢種假設性問題既答案係咩，無人會知道。

人都係貪心既，過住一種生活，又嚮往另一種生活。永遠唔心息，永遠想要更多。

平凡如我，當然不能免俗。

我都會諗，如果當初真係揀咗陳子俊，就唔需要承受十級心碎同背叛。

不過諗還諗，我個腦已經夠哂亂七八糟，係呢一刻，請唔好再為我增添煩惱。

中意一個人，已經搞到我要生要死；所以我更加唔明，同時中意幾個人，係咩玩法。

「今晚到此為止，Bye啦。」