男友出軌，我決定送26頂綠帽比佢: 學生會競選（中）

「二零二一至二零二二年度學生會選舉正式開始！」

有人歡呼，有人吶喊，有人揮動旗幟，有人拍手跺腳。

詩韻去咗做helper，阿瑩、魚蛋同人調咗位，過黎一左一右陪我坐。

「政綱介紹環節，每個內閣有8分鐘時間，有請1號候選內閣焰王。」

未輪到丁家岐講野，阿瑩細細聲問我：「點解你要幫佢掩飾？」





呢個問題問得好，因為我都唔知點解。

幫佢只係好下意識既反應，就好似肚餓要去食飯，眼瞓要去瞓覺，考試......都係唔想去溫習。

雖然諗番轉頭，個心勁唔舒服，有啲情緒壓抑係裡面，無從驅散，總之就係好憋屈。

「佢逼你？」

睇黎係阿瑩心中，丁家岐已經係一個渣到不能再渣既渣男，評分跌至負分。





「咁又無，不過佢係我男朋友，唔通拆佢台咩。」

拆佢台，丟架既咪又係我。俾人知道咗我地有第三者，班八婆八公肯定係咁唱，唱到通街都知道，唱到我要問埋：不如俾個大喇叭你地，可以再大聲啲。

我臉皮簿，我要面，唔想俾人指指點點。

「唉，鬼叫你中意佢。」阿瑩嘆咗一口氣。

係呀，鬼叫我中意佢。





我都希望我個腦入面有粒制，禁一下，就即刻唔中意佢。

「就算佢係一篤屎，你都覺得屎係香既。」魚蛋貌似對感情好有見解。

但係佢呢個比喻令我好想打佢。

「咦，俾你講到好核突。」

「好彩唔係食緊飯。」阿瑩掩住嘴笑。

「係喎，你地覺唔覺果個Nicole好姣？」魚蛋突然醒起。

「你都覺呀？」阿瑩望一望周圍，確定Nicole唔係附近：「我覺得佢個胸墊咗野，之前都無咁大。」

「仲有佢條裙，短到就快走光。」





「不如索性唔好著啦，仲多人睇呀。」

「佢講野雞仔聲，又尖又難聽。」

「男仔好似幾中意呢種聲。」

佢地既說話，好似種子一樣，係我心中植根發芽。

我回想起丁家岐同Nicole做訪問既情形。

Nicole一見到佢就笑到春心蕩漾，丁家岐諗都唔諗就應得好爽快。佢地一問一答，眉來眼去，默契異常。會唔會其實佢地一早就識，暗地裡有一腿？

我覺得我得咗疑心病。





因為，每一個接近丁家岐既女仔，我都會懷疑，佢地係咪有目的，想黎勾引我男朋友。

識主動又身材好既女仔，大部分男仔都抗拒不了。

一個來者不拒，一個毫無廉恥。唔使諗，都知道會搞出人命。

於是我既心情變得更加沉重。

「問答環節，請同學自由發問。」

根據過去五年既經歷，呢一部分先最有睇頭。提問既人，可以分為兩種：一種係內閣內定既親信，係度互相扯貓尾；另一種係中意攪屎棍既人，專門問到台上人口啞啞。

睇人仆街最開心，大家都好激動。

「既然雲霄咩都由副會長做哂，點解唔索性由丁家岐做會長？」





「多謝你既發問。

澄清一點，我地內閣有12個人，每個人都有自己既分工，可能有人發揮多啲有人少啲，但唔係所有野都係我做哂。不過，我上年選過，有經驗，可以協助成員做得更好。」

或者人真係有氣場高低之分。

丁家岐一企起身講野，其他人就會自動成為布景板，就算只係照稿讀，大家既目光都會聚焦係佢身上。

呢個係屬於佢既舞台。

佢係台上光芒萬丈，我係台下遠遠觀望。

「雲霄係水，水火不容。雲霄同焰王係唔係不和，要同對方死過？」





「首先，雲霄既意思唔係水，而係天際。」丁家岐輕描淡寫咁話。

大家拍哂手哈哈大笑。

「其次，我地並無不和，只係政綱同理念不一樣。不過，由於淨係得一個內閣會贏，我地雲霄既然上得台，就唔會想輸。」

「雲霄！雲霄！響徹雲霄！」有人帶頭叫出雲霄既slogan。

「請大家保持安靜，下一個問題！」

「我亦都係想向丁副會長提問。近日你緋聞纏身，成日係網站見到你個名，至於內容係咩，我就唔多講啦。你連自己都未搞掂，又點搞得掂個內閣？」

全場一片嘩然，睇下邊個發問者咁夠薑。

嗯，一個唔識既無名小卒。

我突然有啲壞心眼。

如果丁家岐就此身敗名裂，受盡唾棄，咁佢係咪就可以留係我身邊，只係屬於我？

當然呢個情況無出現。

「請同學唔好作出毫無根據既人身攻擊。」主持出聲阻止。

「有無搞錯呀？」

「我講事實咋喎。」

「原來學校係無言論自由架！」

又有幾個同學舉手。

「呢個問題，我要問焰王。你地大部分成員今年都F.6，功課多又要溫習。會唔會當選之後，無時間打理學生會？」

「我地想系最後一年，做翻啲貢獻，回報我地學校。我地承諾過既事，一件都唔會少！

希望大家俾個機會我地。」

陳子俊平時串串貢，上到台就收斂下來，相當之謙卑。相較之下，我都係中意丁家岐運籌帷幄、一切盡在掌握中果個樣。

「問答環節結束。依家會派發選票，請同學填妥後對折，然後放入投票箱內。」