男友出軌，我決定送26頂綠帽比佢: C : 海盜不能沒有女 (2）

走得太匆忙，完全唔記得要化妝。就算係假既ptgf，都要有職業操守，萬一俾人彈鐘，就不太好玩了。

於是，我做咗N年都無做過既事──去借化妝品黎用。

「歡迎光臨屈臣氏！」

售貨員見我只係一個學生妹，連眼尾都無多望我一眼，就走咗去。

我自然求之不得。





行去化妝品果格，十幾廿萬種顏色，睇到我眼都花埋。

聽講男仔係唇膏架前，係完全色盲既。佢地唔會識分咩叫奶茶色，咩叫啞光系，咩叫裸妝。佢地只會認得出三種顏色：紅色、粉紅色同埋橙色，最中意既顏色係死亡Barbie粉同烈艷紅唇。

咁我就梗係唔會揀Barbie粉啦，仲細個咩宜家，極度浮誇又核突。

我拎起枝紅色唇膏，趁無人無人，飛快搽上嘴唇，大大力抿咗一下。

水潤欲滴，好似啱啱舐完紅色糖果一樣，Perfect。





又聽講男仔對紅唇都有種情意結，無法抗拒。

我估係因為紅唇代表熱情同誘惑，好聽就叫有女人味，俗啲就叫識發姣。

順手噴埋個香水。

又花香又水果味，我試咗幾枝。

好似成日聞到呢隻味。





Nicole都係用呢隻香水。

我望一望個名，係Malone London既「英國梨與小蒼蘭」。

Clay : 你到咗未呀？

我：附近啦：）

Clay ：見唔見有間日本關東煮？

我：有呀

Clay : 我叫咗個外賣，你拎埋上黎工作室，一齊食wwwwww

工作室？Anyways,點都好過上佢屋企。





雖然，唔黎接我，仲要食外賣，真係世界級約會。

佢工作室係八樓，重點係無lift。

一二三四五六七。我一路數，一路爬樓梯，順便問候埋佢祖宗十八代。

無鎖，我直接推開門。

「Clay?」無人應。

工作室都幾整潔，得一部電腦，一個叉電器，旁邊有個櫃，櫃裡全部都係模型，牆上貼滿海報，禰豆子、初音未來、木之本櫻，鏡音鈴......清一色都係蘿莉，全部身嬌腰柔易推倒。

Clay坐係電腦後，圖人相符，無照騙。





唯一唔同既，係佢戴咗副眼鏡之後，多咗一分斯文，少咗一分囂張。

我又叫咗佢一聲，不過佢依然無反應，完全沉醉係自己既世界。

我行埋佢身邊，望一望，原來係寫緊程式。

「哇！你幾時黎架？」Clay嚇咗一大跳，差啲連個滑鼠都飛埋出黎。

「我黎咗幾分鐘啦。」我扁一扁嘴。

「你坐下先。」

佢劈裡啪啦又打咗一大堆野，連鍵盤都唔使望：「有無玩過角色扮演？」






佢連我全名叫咩都未知，連客套說話都慳番，就提出咁重口味既要求。

「無。」

「升級過關打大boss。」

我向來對呢啲動不動就打打殺殺、遍地屍體既遊戲不感興趣。

佢繼續講落去。

「等我同你介紹下。我開發既呢款遊戲，叫做《海盜不能沒有船》。男主角叫凱伊，係講佢點樣從一無所有既孤兒，搖身一變，變成縱橫四海既海盜王。」

「咁女主角呢？」

「無女主角，不過有一眾女配角。」





「咁咪即係收後宮。」

「哈哈，可以咁講啦。」

「咁點解唔叫《海盜不能沒有女》？」

「呢個提議好呀，點解我諗唔到架呢？」

其實我係寸緊佢，但佢完全唔覺。

我隨便望咗下劇情闡述。

【劫船】【偷襲皇家港】【叛變】【海戰】......

總共有95個關卡。每個關卡，都有一個對應既人設，例如：「活潑可愛的蘿莉水手」、「美艷高冷的禦姐船長」、「善解人意的賣花女」、「腹黑優雅的管家夫人」諸如此類。

應有盡有，包羅萬有，絕對能滿足男人既所有願望。

呢啲人物都好正常。

但係！！！點解會有「不穿奶罩的小孤女」、「一夜千二的酒館侍女」、「不入狼群焉得聖女」？

？？？

我臉上寫滿問號。莫非呢個係色情遊戲？

「呢啲係隱藏人物，遊戲用戶要額外俾錢，先可以繼續進行劇情，但係唔影響主線發展。」佢見我望咗勁耐，主動同我解釋。

「你可以揀一個角色黎扮演。」

「我睇下先。」我邊個都唔想演，全部都係花瓶，用來襯托男主既。

「我覺得你幾適合賣花女呢個角色。」

「你中意啦。」總之唔係不穿奶罩的小孤女就得。

Clay係抽屜拎出畫紙同擦膠：「我要將你畫出黎。」

佢仔細打量我一番。

「望住我，唔好亂郁。」佢命令我。

對視間，氣氛變得有啲微妙。

Clay低頭，額前既碎髮，擋住佢既眼睛。佢不時皺一皺眉，好似唔多滿意，擦咗，又再勾勒幾筆。

我屏住氣息，大氣都唔敢透一下，驚會破壞咗個意境。

不得不說，我中意佢畫畫時，果種認真而專注既神情。

時間好似靜止咗。工作室以外既世界，遠離我們十萬八千里，同我地無關。

寥寥幾筆，紙上就出現一個二次元少女。

係佢眼中，我係一個身穿復古白裙、一頭鬈髮垂至腰際、手捧玫瑰既少女。

「既然你英文名叫Anita，咁佢就叫安妮塔啦。」

就係咁，我成為咗賣花女安妮塔。