男友出軌，我決定送26頂綠帽比佢: 阿瑩的秘密（下）

阿瑩望住King姐，唔知係思考緊要問咩問題，定係內心受到極大沖擊。

「身份係咪我地唯一既阻滯？」

「唔係。佢自己都有啲野未放得低。暫時黎講呢，佢對你係有好感，可以順其自然，等佢做主動。太過進取既話，你進一步，佢會退三步。」

「我下一步應該點做？」

「抽一張牌。」





「唔好輕舉妄動，一衝動就渣都無。擺正心態，朋友就係朋友，同事就係同事，順其自然，等佢黎推進呢段感情。」

老師就係老師，學生就係學生。

「咁我咪處於被動狀態？」

「係，因為宜家你中意佢，多過佢中意你。仲有冇其他問題？」

「無啦。」阿瑩抽出一張一百蚊。





年紀大過佢，身份帶黎既阻滯。King姐全部講中哂。玩下都無妨啊。

「King姐，我都想抽牌。」

「都係睇感情？」King姐挑一挑眉。

「係，我拍緊拖。」

King姐指一指疊牌：「你知點做架啦。」





我閉上眼睛，腦中浮現丁家岐既樣貌，佢勾起嘴角，露出意氣風發既笑容。

我憑感覺抽咗十張牌出黎。我望一望，前面三張係「艮」、「蠱」同「困」。

單睇圖案，都估到唔係咩好牌。我個心沉咗一沉。

「你兩個拍咗好長時間既拖，一路都行得好順，無咩大風大浪。不過好多野都收收埋埋無講清楚，你以為你就緊佢，佢又以為你想要某樣野。仲有最近應該發生咗一啲事，令你地既關係係原地打轉，停滯不前，但係又糾纏不清，斬唔到䌫。」

係人地口中，聽番自己既事，就好似冇著衫，俾人睇穿哂，感覺奇妙又赤裸。

「係呀，佢出軌。」我既語氣，同講「我上街買條菜」咁依稀平常。

King姐不作評論，靜靜等我講落去。

「係佢心目中，我有咩地位？」





「嗱，我睇得出，呢個男仔既異性緣幾好，身邊有唔少女仔，亦即係所謂桃花運，你地之間，極有可能出現第三者，可以係精神上，亦都可以係肉體上既。」

「姐係我要同人爭？」我見張牌畫咗好多毒蟲，一番激烈既廝殺後，全部死哂，只係剩番最毒既蠍子。

「可以咁講。呢個第三者，係好多方面都比你強，但亦都有地方不如你。試下唔好對佢太上心，被佢牽住鼻子走，諗太多你會好辛苦。」

「呢個佢係講緊個第三者，定係我男朋友？」

「你條仔。」

我沉默咗。

「我下一步應該點樣做？」





「見唔對路就走啦傻妹，人係度個心都唔係你度，有咩意思。」

「多謝你呀，King姐。」我地起身離開。

「唉。」

「唉。」

我同阿瑩企係街邊，吹住冷風，神色十分頹廢。

「點解我地既愛情運都咁差？」

「肯定係因為學校風水不好，除非吾係。」阿瑩好篤定咁話。

「頭先King姐睇到皺哂眉頭。」





「係我都會啦，一個衰過一個。」

「係呢個咁悲壯既一日，要打番張卡留念先。」阿瑩拎咗部手機出黎：「笑下啦！」

呢啲咪叫苦中作樂。

「我眨咗眼呀，再黎過！」

「我左臉好睇過右臉，同你調個位！」

「呢個filter太假啊，呢個自然啲。」

大概影咗三十張相，終於有一張揀得落手。





「我地似唔似一對落難姐妹？」我由心而發咁黎咗一句。

「就算落難，都有你陪吖嘛。」阿瑩一邊打caption，一邊答我：「大不了到時嫁唔出，租間姑婆屋一齊終老...呀，係喎。你有無睇王力宏果單野？」

「有啊，真係睇唔出佢係啲咁既人。」

「呢啲邊有樣睇架，丁家岐夠...」阿瑩講到一半停咗落黎，抬起頭望住我，意識到自己講錯野。

佢即刻轉移話題：「李靚蕾個雷神之錘不知幾有型，你快啲跟人學下野。」

又約砲又叫雞又精神虐待，李靚蕾應該係愛慘了他，先會忍受到咁多年。

當初有幾多愛，反面時就有幾恨，要行到呢一步，做到咁絕，全世界都知道，佢內心應該都好難過好痛苦。

我自問就無咁既決心，可以一刀兩斷。

「係咪個個男人都會出軌？」我問。

林俊傑、羅志祥、 王力宏 ，細過中意過既偶像，通通變咗名副其實既「 毆打對象 」，人人喊打。

「係掛，出軌既男人壞l咗，要揼哂佢地落垃圾桶。」阿瑩好霸氣咁話。

「講完我啦，到你啦。」我一臉八卦：「幾時收埋咗個高富帥？」

「邊有呀。」佢掩住嘴，眼神流露住笑意。

「笑到咁仲話無。」

「都話咗咩都唔係。」

「我以為你唔會同人玩曖昧。」佢一向都係中意就兩個字，唔中意就三個字，無謂嘥時間。

「但係同佢一齊，我覺得好開心。」

同丁家岐一齊，我都覺得好幸福。

原來中意一個人，真係會改變一個人既原則，將底線一退再退，無論係阿瑩定係我。

「做咩唔問我中意邊個？」阿瑩望住我，撥一撥凌亂既頭髮。

「你想講，自然會講俾我知架啦。」

「時機啱既時候，我就會話俾你知。」阿瑩望住天空，雖然一粒星星都無，但係佢既眼神充滿希盼，閃閃發光。

「好，咁我等你好消息。」