男友出軌，我決定送26頂綠帽比佢: G ： G奶擒拿手 (6)

我：寫甜故寫到可以出書，好勁啊你

G奶： 自資出書...有錢個個都可以做到，並唔係咩了不起既事。

我：咁賺得多唔多架？

G奶：我寫文又唔係為賺錢，收番成本價炸

G奶：上一次印實體書，係應讀者要求，佢地話想收藏。一口氣印咗800本，賣完就無，校對、印刷、搬運、送貨都係我自己一手一腳搞掂。





我：你投稿俾出版社咪唔使自己煩。

G奶：我寫既野，男既腳踏三四五船，女既風情萬種搖曳生姿，出軌偷情約炮咩都齊，有人會理解為渣男渣女，同仁義道德背道而馳，出版社唔會中意。

G奶：最受歡迎既網絡小說，一係就危害社會，一係就係啲有毒關係。

我：大人最驚小朋友睇呢啲書，話會學壞，不分是非，不過佢地自己又會睇，好矛盾啊。

G奶：價值觀本身無分好壞...





G奶：正人君子屬少數，無恥之徒何其多，皆因行苟且之事使人快樂。

G奶：使唔使送番本實體書俾你呀？

我：已經有啦，係酒店執既：）

G奶：睇得明嗎？

我：你既文風好獨特，成篇都係口語，平時睇慣書面語，一開始睇唔易入口，不過睇睇下，見字如聞其聲，好似聽緊廣播劇咁，好得意吖。





G奶：你中意就好...高登連登大把人用口語創作，亦有人用廣東話翻譯《小王子》同《動物農莊》等既名著，我唔係第一個...

我：有啲正字我見都未見過。用埋哂啲生僻字，你唔驚嚇走讀者咩？

G故：我寫任何故，都一定有人鍾意，有人唔鍾意...既然點都滿足唔到所有人，加插自己想寫既元素落去。想睇自然會睇，唔想睇咪打交叉走人。

我：其實你既小說有啲似劇本，不過劇本會有好多XX地既形容詞。

G奶：用語氣詞取代形容詞...都係我其中一個追求。例如你扑扑下野，一個吓字，已經可以表達到驚訝既意思。吓？咁短既？吓？你入咗去架啦？吓？咁就完啦？

我：我會記得下次扑野唔講呢個字

我：你篇小說最勁既地方，在於只寫日常對話，但係又會令人好想睇落去。

G奶：就好似同女仔傾計一樣，毒撚傾黎傾去，都係食左飯未？食咩飯？好唔好食？夠唔夠熱？碗飯幾多錢？隻米咩牌子？你聽到會有咩感受？





我：嗯，佢似係對碗飯有興趣多啲

G奶：咁咪錯技巧囉...想追一個女仔，唔係靠尷聊，而係要撩起佢既興趣。寫文一樣，寫讀者鍾意睇嘅嘢，佢地覺得有意思，先會追落去。

我：係呢，你覺得我易唔易追呀？

G奶：係個值得珍惜既好女仔

我：你又知？我地都未見過面

G奶：出黎同我食餐飯，我再答你呢個問題

我：我地先識咗一日，會唔會太快呀？





G奶：覺得同你啱傾，想帶你去食好野啫，唔使諗太多

天下沒有免費既午餐吧。

雖然我同佢幾啱傾，但唔代表我對佢完全冇戒心。可能係我有偏見啦，我始終覺得，所謂既網上情緣，都係呃蝦條。

我：疫情爆得好勁啊，不如遲下先啦？

G奶：我無所謂，你話事

我：仲以為我話唔去，你會即刻唔理我添

G奶：見唔見面都好，妳都係我珍愛既女讀者，訴苦解悶隨時搵我

我：唔使陪女朋友或者情人或者炮友咩？





G奶：都話我冇炮友

G奶：咁佢地都要返工既

我：你會唔會係條街左擁右抱架？

G奶：限聚令收緊至兩個人...抱條毛咩

我：多得疫情，我連Last Day都無埋：（

G奶：你今年畢業？

我：係呀





G奶：今屆畢業生係慘啲既...

我：簽名影相、寫紀念冊、全級集體去飲茶...一件都無做過，咁就各散東西，無得好好道別。

G奶：我當年都係一放學即走

G奶：反正畢業之後都可以再約見面，唔熟無咩兩句既就求其啦：p

我：唯有咁諗啦。


想了解更多G奶既私生活？
同場加映：https://www.shikoto.com/i/bdma
帶你進入甜故作家的世界：）