男友出軌，我決定送26頂綠帽比佢: H for Holiday (1)

丁家岐：今日唔過黎啦

上牀之前，又哄我話真心中意我，以後會對我好；完事之後，就變咗另一個人，唔再搵我陪我傾偈。

反差咁大好難接受。

我：但係我唔舒服：（

丁：飲多啲暖水





我心裡不舒服呀...無啦啦飲乜熱水，而家飲暖水可以治百病咩？隔住屏幕，都感覺到佢既敷衍。

我：【輸入中】我想食存記既鮑魚雞粥，齋腸，飲熱檸蜜，不如你買......

丁：你抖下啦，我要溫書先

我將頭先果堆文字刪哂，打咗個「好」字

佢下咗線。





我個腦一片混亂。

以前我病既時候，佢會買藥上黎，陪我直到退燒為止。

而家佢連我邊度唔舒服都無問。

唔通破咗我處，就唔再珍惜我？佢係咪已經唔再愛我...佢有無中意咗第二個...唔通係Nicole ?

我即刻上Nicole既IG望下，見無最新動態，先鬆咗一口氣。





算啦，我唔可以再亂諗野，明明咩都無發生，一切都係我FF出來。

而家做咩好呢？啊，係啦，我都要溫書。

我將手機調校成飛航模式，掟埋一邊。

要專心唔可以分心。

拎份數學past paper出黎做，做哂最淺最簡單既題目，唔識果啲就睇下答案，背一次寫番出黎，當自己識咗。

一口氣做咗兩份，自我感覺良好。

到下一科。

溫中史唔使用腦，背哂就得。





我拎本好靚既筆記本出黎抄抄抄，用熒光筆highlight哂啲重點，畫埋插圖。

「天下儲積，得供五、六十年之用。」
→ 倉庫充足
「以人爲鏡，可以明得失」
→ 任賢納諫（e.g 魏徵 )
戶口從200萬戶增加至380萬戶
→ 人口激增

如果呢個係太平盛世既標準，咁現今既香港應該攞零分。

抄抄下，突然發現筆記後面有幾張紙條。

「聽日要去打籃球




無得陪你去行街
你5好嬲我 >.<
最多我請你飲波霸奶茶補數」

「無聊中 Zzzzzzzzz...
好想快啲落堂
天氣凍
要攬住你呢隻傻豬豬」

「兩日無見啦：（
畫隻熊仔送俾你
佢叫小岐 暫時代我守護你
希望你快啲好番la」

我記得啦，中三果年，我同丁家岐一班，因為要考升班試，佢部電話俾阿媽沒收咗，我地唯有用最傳統既方法溝通。





手寫既溫度，摸得到既筆跡，收到紙仔既即時反應，呢啲都係打字無法取代既。

我即刻打開WhatsApp，send俾丁家岐睇。

我：記唔記得我地以前成日傳紙仔：p

一分鐘、兩分鐘、三分鐘...佢都係冇覆我。

我好似毒癮發作咁，每隔十五分鐘又睇一次，每隔十五分鐘又睇一次。

都係冇。

可能佢真係好專心咁溫緊書。





到咗3點半，手機震咗震。

唔係佢，係呀媽。

「我地幢樓好似要做圍封，你睇下係咪？」

我打開個名單。Oh shit！！！傳咗咁耐，今日真係輪到我地！

「係呀。」

「咁我今晚唔返黎啦，聽朝要番工，我去姨媽度瞓。」

「哦。」

「你做咗快測，確定係陰性先好落去啊，戴好口罩，記得鎖好門，同埋閂煤氣呀。」

「得啦得啦。」真係好長氣。

......

等到無聊，又忍唔住WhatsApp丁家岐。

我：要落樓做圍封：（

就算真係溫緊書，抽幾秒鐘黎覆我，都唔係好難啫。

「1703 ! ! ! 聽到就出黎做強檢！」屌，嚇l死，敲門就敲門啦，使唔使咁大力，好似想拆咗個門咁。

按照指示黎到籃球場。登記姓名、身份證號碼，套上白色手帶。

不知名報社記者做緊直播：「現場有二三十人排緊隊。今次將採用鼻腔及咽喉拭子樣本進行檢測。

禮物包非常之豐富。有家樂牌通心粉、噹噹日式烏冬、珠江橋牌豆鼓鯪魚、金寶忌廉蘑菇湯、肥豬仔午餐肉、維他奶 ......」

嗯，我已經諗好今晚煮咩晚餐。

「果棵咩樹黎架？」

「粉紅色架喎，唔通係櫻花？」

「屋村邊有櫻花架？我估係木棉。」

「總之佢每年一開花，我就知開始潮濕。」

順住班師奶指既方向一望，原諒我錯重點，我見到一個著住灰色西裝、拎住公事包既男仔穿行過籃球場。

陽光照係佢身上，櫻花係佢身後紛飛墜落。

似足日本純愛動漫既畫面。

佢...好似一個人。

我想望真啲，但佢已經漸行漸遠。

認錯人，最多柒一時；但係錯過咗，就可能以後都無機會再遇到。

所以我不管不顧咁大叫：「Holiday哥哥 !」

事隔已多年，唔知佢仲記唔記得我呢？

Holiday呆咗一呆，除低耳機。

佢既聲音仍然係咁溫柔，同當年一樣：「我地係咪識得？」

落花時節又逢君 ──

平時無睇開小說既我，腦裡居然會飄過咁文藝既詩句。