男友出軌，我決定送26頂綠帽比佢: H for Holiday (4)

相戀四年，1461日，35064小時，2,103,840分鐘，126,230,400秒。

最後以八分鐘既電話，三聲道歉，兩句英文，一句中文，結束了。

連最後一面都無見到。

最後一面...講到佢死咗咁，其實都差不多，佢從此係我既生活中煙消雲散。

所有感情同付出一鋪清袋。





我有種深深既無力感。

好似有舊鉛球，拉住我往下墜，懸崖下面係個無底深湖，不斷下沉再下沉，漆黑包圍住我，湖水灌滿我個口。

我喊唔出聲，見唔到一絲曙光。

唔知呆坐咗幾耐，手機狠狠咁震咗一下，將我震出無底深湖。

Holiday : 食tea ?





我急切地想逃離呢個唔到三百尺既空間，呢度有太多我同丁家岐既回憶，隨便一個都會將我淹沒。

我：好

Holiday：你樓下等？

我：十五分鐘後見

Holiday : 先到先等





我：See u

啱先喊完，隻眼仲係好腫。去廁所洗個臉，求其換條裙。

呢個時候無咩心情打扮，頹就頹啦。

升降機緊急維修，真係衰開有條路，我屌出聲，渾渾噩噩咁行落十七層樓梯。

Holiday已經等緊我。佢今次無著西裝，著番休閒裝。

都係呢個look順眼，襯佢多啲，有鄰家男孩既親切感。

「你跑過黎架？咁快既。」佢行過黎應該要七八分鐘，有乜理由仲快過我。

「我腳長過你。」





「又串我矮。」

「唔高啫。」佢摸摸我個頭：「帶你出旺角食野好無？」

「下？我無帶八達通喎。」我以為落樓下大排檔，食個沙嗲牛肉麵炸。

「我幫你出咪得。」

「好啊。」

正想過馬路，有架車飛擦而過，Holiday拉住我：「喂你瞓醒未架，紅燈呀。」

我如夢初醒咁哦咗一聲。





我坐係靠窗位置。

「你真係應該買番份保險。」佢講笑咁話，順手搭住我膊頭。

「畀個機會你說服我。」

「做人一唔小心，好容易就死咗~」

佢湊近我，特登拖長個尾音黎講。

「提一提你，我地而家坐緊既呢架亡命小巴，時速最高可達110公里，隨時有車毀人亡既可能。」

未炒車都畀佢嚇死先。

我苦笑：「正經啲啦，邊有人好似你咁樣sell保險架。」





Holiday咳咗一聲：「有人死於意外，有人死於疾病...」

有人死於心碎嗎？成顆心裂開咗果隻。

「我地有一系列既保險，提供最合適既保障，全方位為你著想...」

如果失戀有保險買，我一定會投保。人無咗，至少仲有金錢上既補償。

「你自己有無買？」我問。

「就算無都話有啦，更何況我真係有。」

「買咗咩？」





「醫療意外重疾都買齊。」

「唔悶親你啦。」佢揮揮手，「講番啲開心野。拎咗消費券未？」

「無啊。過多兩日先夠十八歲。」我扁嘴。

「啱啦，今日當係生日飯。」

「咁你係第一個同我慶祝既人。」

「正日有咩節目？」

「無啦，個個都要溫書。」我搖搖頭。就算阿瑩佢地叫我出去，我都未必會出。

想自己一個。

要我嘻嘻哈哈扮無野，我做唔到。

「男朋友唔陪你？」

「啱啱分咗手。」所謂既啱啱，其實係一個鐘之前。

Holiday拍拍我膊頭， 乜都無講。

我懶係灑脫咁話：「其實都無乜野，舊既唔去新既唔黎，你話係咪呀？」

佢笑一笑：「凱婷妹妹咁得意，實大把人追啦。」

上天安排我同Holiday係呢個時候重遇，唔知係咪有咩暗示。

「咁你有女朋...」

「司機，有落！」佢揚一揚手，同我疊聲。

每位乘客10蚊一程，Holiday畀咗張廿蚊佢。

「你頭先問我乜話？」

「唔記得啦。」我突然無咗探究既興趣。

「一出旺角就覺得自己young咗。」

無論朝早定夜晚，有無疫情，旺角街頭永遠都咁多人，永遠都咁熱鬧。

「你平時唔多黎呢頭咩？」我問。香港既娛樂，幾乎都集中係旺角一帶。

「少咗。」

「咁去邊多啊？」

「睇下個客住邊囉，多數係港島果頭。」

Holiday拎個打火機出黎：「介唔介意陪我食枝煙先？」

「畀枝我食咪唔介意。」內心空虛，莫名其妙地想食枝煙。

而家單身，無人再管住哂，做咩都得，最適合放飛自我。

「乜你食煙架咩？」佢好出奇咁問。

「食。」

Holiday半信半疑咁望住我。

我用食指同中指夾住枝煙，表情有點心虛，動作帶點笨拙。

聽人講，唔好輕易食第一啖煙。一旦愛上，就會煙不離手好難戒，唔愛就呢一世都唔會再掂。

我拎起枝煙，嗒達一聲，佢幫我點火。

我大大力吸咗一啖 ──

咳，咳，咳到甩肺，好苦好臭好撚難食。

Holiday搶走我枝煙，幫我拍背順氣。

只見佢手勢純熟咁將枝煙擺埋嘴邊，輕輕一吸，仰頭吐出煙霧：「食糖啱你多啲。」