男友出軌，我決定送26頂綠帽比佢: 十八歲生日 （上）

時針指住十二點，今日係我既生日。

十八歲有咩意思？代表我唔再係少女，長大成人了。之前法律上唔容許既事，而家可以做。

要有番少少儀式感先得。

上網search「十八歲生日要做的事」。

飲酒落bar？真掃興，通通關門大吉。去Donki買情趣用品？我怕羞。扑野食煙飮酒？全部做過哂。





我諗啊諗，諗到丁家岐來電。

我第一個反應係驚喜，佢仲記得我既生日。

同埋係我地分手之後，第一次傾電話。

「喂？」

「十八歲啦，生日快樂。」





「多謝。」

好一段時間的沉默。

我而家先明白，咩叫最熟悉的陌生人：曾經無話不談，如今無話可說。

我講笑咁話：「做咩呀，無見兩日，就掛住我啦？」

「唔係。」





「......」屌。

我感覺被打了一巴掌，就好似係奧斯卡頒獎典禮上，Will Smith打了Chris Rock一樣，來得突然而侮辱。

咁就唔好打電話黎啦，多此一舉。

「你仲有野留咗係我屋企。」丁家岐頓咗一頓，「幾時黎拎番？」

佢聲音有種刻意既冷漠，可能唔想我誤會佢對我仲有感覺掛。

「有啲咩呀？」我扮到若無其事，同樣地唔想顯得太激動。

「外套啊、坐墊、杯啊咁咯。仲有條手鏈，上一次漏低咗。」

如果我想，我可以趁呢次機會同佢見面。





「你聽日得唔得閒？」佢問。

「聽日我要出去慶祝生日。」我答。

「咁咪啱囉，順便過黎拎。」

我唔中意佢咁肯定既語氣。好似佢叫到，我就一定要隨傳隨到。

「唔順路。」我突然想玩下野：「一係你順豐速遞畀我？有得貨到付款，運費我自己畀，唔使你出錢。」

丁家岐無應承我：「你之後唔得閒咩？」

「應該會開始忙。」





運氣好既話，同阿瑩佢地去畢業旅行；運氣唔好，就返part time打工賺錢。

「你琴日同邊個出街？」

佢見到我post Holiday既相。

「你個話題轉得咁快。」

「關心下你啫。」

「一個朋友，你唔識既。」我同邊個出街關你撚事。

「咁快就識到新歡？」丁家岐問。

「唔及你快。」





佢輕輕咁咳咗一聲：「我幾時有新歡，唔好亂講。」

「點知你。」

「我唔識整順豐，你過黎拎，或者我過去都得。」

銅牆鐵壁，僵持不下。

「唔使咁麻煩，一係啲野我唔要，你幫我掉哂佢啦。」

再見面其實都無意義。

「凱婷，你真係咁唔想見到我咩？」丁家岐有啲受傷咁話。





佢叫我個名既時候，我的確心軟咗兩秒。

不過我諗起佢頭先話無掛住我：「唔想。」

丁家岐嘆咗口氣，語帶失望：「點解我地會搞成咁。」

呢個問題令我發笑：「當初講分手既係你。」

「分咗手都可以做朋友啫，唔一定要斷絕所有來往。」佢同我解釋。

Bullshit.

「下，我又唔係冇朋友。」

我中意你，但你唔中意我，咁我就放棄你，點解仲要做朋友。

「咁我無野好講。」丁家岐話。

「唔好講囉。」

「你啲野我會幫你掉哂。」

「隨便你。」

「你之後唔好後悔。」

「唔會，唔係值錢野，掉咗都唔可惜。」

我地一來一回，好似兩個幼稚既小學雞，唔肯收聲，邊個講最後果句邊個贏。

「喂？」

佢已經收咗線。

DKLM!

算啦，今日我生日，唔好畀佢影響到心情。

頭先好似有野做緊，我繼續睇「十八歲生日要做的事」。

買六合彩？可以考慮。登記做選民？投咗票都係會畀人DQ。紋身...

每個紋身背後都有一個刻骨銘心既故事。

用紋身黎紀念失戀，好似都唔錯。

主意已定，我花咗少少時間，搵到一個叫Kiko既女紋身師。

我：How much ?

Kiko : 英文字 $600（5cm內），$800（10cm內），全粗/全幼線，字款到工作室時選擇：）」

價錢唔算太貴，可以接受。六百蚊，當買個教訓，提醒自己以後唔好太愛一個人，否則又會傷多一次。

我：聽日可以過來嗎？

Kiko ：約你下午兩點？

我：可以

我：會唔會痛？

聽講紋身好痛。

Kiko : 放心，小圖案&句子係最易接受，我所有客人都冇叫又冇嗌，個個都話冇諗甘痛，係第一次唔知咩feel緊張姐

凡事總有第一次。

第一次失戀。第一次紋身。希望痛過之後，就會識得放手。

我：好

Kiko ：麻煩你先交訂金$30

我：已過數

紋身需要一點衝動。交咗訂金，就無得改變主意。

Kiko ：紋身前準備
1：要有充足睡眠，痛感會較輕
2：當日/前一日勿飲酒吃辣，減少出血狀況
3：避免空腹，以免血糖過低而噁心頭暈
4：穿深色衣物，以免弄髒

*疫情關係，只允許一位友人陪同。

我突然又唔想一個人過，想有人陪下。

我打電話畀阿瑩。

「你聽日可唔可以陪我去一個地方？」