男友出軌，我決定送26頂綠帽比佢: 未完待續的禁忌戀（下）

「唔知點解，見親佢，都係落雨既日子。

平安夜前一晚，我番學校交報告，又係落住雨。我無帶遮，唯有濕住身咁跑落長命斜。跑到一半，有架車係後面咇我，真係撞都無咁啱，又係佢。

佢打開車門，叫我上車。

「做咩唔打電話俾我？」佢見我打緊冷震，即刻將暖氣扭到最大。

「咁小事，唔想煩住你。」





「凍親就大件事。」佢指一指後座，「拎我件外套著住先。」

我伸隻手過去，摸到有個快遞盒，望多兩眼，海外寄過來，女仔筆跡，字體幾靚。

「屋企人寄黎？」我隨口一問。

「From my date。」佢若無其事咁話。

我心諗：仆你個街，原來你有女朋友，咁你又走黎撩我...仲要咁理直氣壯？





「想唔想去遊車河呀？」

我搖搖頭。

「咁我送你番屋企啦。」

「xx街xx苑。」

架車轉咗幾個圈，我望住窗外既霓虹燈、街燈、廣告燈逐亮起，無同佢講過一句野。





到站。「唔該。」

我大大力咁砰埋道門。嬲佢，更加嬲自己，點解從來都冇問清楚。」

「佢知唔知你嬲？」

「知掛，我咁明顯。佢之後都有祝我聖誕快樂，但係我無覆佢，佢亦都無再搵我。

再後來，我無意中發現，西方文化既date，指約會對象，而唔係交往對象。」

「下？有咩分別？」我聽到一頭霧水。

「ABC係未確立關係之前，可以同時約會幾個女仔，晚晚傾偈、約出去玩、拖手、kiss甚至上埋床，都可以係nothing。

一旦正式成為情侶，只有道德極其敗壞既人，先會亂搞男女關係，果啲叫cheating.





佢無錯，只係中西文化有差異。

亦即係代表我地仲有機會。」

「你今次真係沉咗船喎。」我同阿瑩識咗六年，未見過佢咁認真。

「今次沉既係鐵達尼號呀。之前沉既最多係天星小輪，無咗一架，仲有第二架等緊我。」阿瑩嘆咗一口氣。

「前幾日，我突然好想見下佢。

所以我番去學校，校工姨姨同我講，疫情嚴重，唔俾人入去。

唔通真係天意？





我企係門口，吹咗兩個鐘冷風，俾咗個timing自己。如果四點前都等唔到，不如就咁算啦？

四點到。我又等多十分鐘、廿分鐘、三十分鐘......

終於見到佢，隔離有幾個男老師，佢地有傾有笑咁行出黎。我係後面跟住，跟到剩番佢一個。

我行過去拍佢，佢見到我，有啲驚訝：「咁啱既。」

唔知係咪太耐冇見，講咗幾句廢話，就dead air咗，佢禁手機，我又扮禁手機，內心其實一路好掙扎。

就咁不了了之，我又唔甘心。試咗，真係無結果，我認命，唔會再沉落去。

「我有野想問。」

佢見我神色凝重，大概估到我想問乜，即刻好緊張咁望黎望去，睇下有無熟人係附近：「我地換個地方再傾。」





我搖一搖頭，劈頭就問：「我淨係想知道，我地算唔算約會緊？」

「你而家仲係我既學生。」

「老師會同學生拖手架咩？」我質問佢。

「我諗你誤會咗。」

「你敢講你無中意過我？」我行近佢。

「你專心考大學，其他既事，以後再算。」

「如果你想同我撇清關係，你應該狠心啲，望住我對眼，同我講：我地永遠無可能，以後唔好煩住我。





但係你無。」

「樂瑩...」

我無聽佢講落去，好瀟灑咁走咗。而家諗番，都覺得自己好l型。」阿瑩一臉得意咁話。

一個米八既大隻男人，畀個嬌小玲瓏既女仔逼埋牆角。果然，真愛來臨之時，女仔會勇敢，男仔會膽怯。

「係型既。」我發自真心咁話。

「愛慕佢既女仔有好多個，但係敢同佢攤牌既女仔，就只得我一個。」

「佢一定對你好印象深刻。」

「就係想佢記得我。」

「你點睇？」阿瑩問。

我諗咗諗，好似做閱讀理解咁，逐字逐句咁拆解：「余Sir話，而家你仲係佢學生。咁等你畢咗業，唔再係佢學生，係咪就可以同佢約會？

同埋，如果佢真係唔中意你，學你話齋，可以直接拒絕你，點解要話以後再算呢？

所以我覺得，佢都對你有啲野。」

阿瑩點點頭：「一直無同你地講，係因為我覺得，中意老師係錯既事。」

「感情無分對定錯啊，只係一種感覺。更何況余Sir都冇女朋友，又無老婆。」

「咁你之後有咩打算？」師生戀呢條路，應該會好漫長。

「只要仲有一絲希望，我就唔會放棄。」阿瑩好堅定咁話。

每次佢講起余Sir，就會兩眼發光。

好事黎既。

「話唔定到時你上大學，就唔會記得佢呢，HKU大把同款ABC啦。」我笑住咁話。

「暫時我心入面只得佢！」

「無我架？」

「事實既野，使乜講出口。」

身邊既男仔或者會來去如流水，但係，我相信，我同阿瑩一定會友誼萬歲到永遠！