男友出軌，我決定送26頂綠帽比佢: I for 校服的自述（5）

Ian：我地6:30係大埔火車站等？

我：好啊，好彩唔使自己搵路，我路痴黎>.<

Ian：跟住我行咪得，我就係你既方向：）

我：我好少出新界

Ian : 我都係 遲下多啲帶你去咯





帶我走，帶我去食好野，帶我去見朋友。唔知點解，我好中意「帶我」呢兩個字，有種我屬於佢，佢會陪住我既感覺。

我：嗯~

Ian：識唔識轉車？

我：梗係識啦，我又唔係三歲細路仔

Ian : 你係十八歲細路仔嘛





我：個路線圖越來越複雜 睇到頭暈

之前屯馬開通真的很興奮，而家又無啦啦多咗個過海既東鐵線。

Ian : 都係同你講清楚先...首先，你要係九龍塘落車，之後穿過大堂，搭扶手電梯上去，記得係往羅湖方向，唔係往紅磡方向

我：喂呀屌，我係路痴啫，唔係弱智呀

Ian：講笑





我：大家慣咗講火車而唔係港鐵

新移民先會叫港鐵，真香港人會叫火車...好似係。

Ian : 有啲記憶根深蒂固，唔係話改就改到

啱呀，唔係話殺哂啲人，或者毀滅哂啲證據，就可以忘記發生過既事。大家只係放在心中，無講到出黎，但係唔代表唔記得。

咁我幾時先可以忘記到丁家岐...

Ian : 好期待你著校服個樣

我：哇~呢句咁似鹹濕佬會講既說話

Ian : （一個苦笑不得的表情）唔係呀，我覺得女仔著白裙幾靚咋





男仔從3歲到80歲，都係咁中意著白裙既純情學生妹，真係好專一而長情。

我： 因為代表純潔？

Ian : 仲有青春呀~擁有既時候要盡情揮霍，第時你老咗回頭望，就一去不復返架啦

我：知唔知道 唔可以話一個女仔老架？

Ian : 係係係，凱婷娘娘你最青春 你永遠都係十八歲

我：梳洗先啦

Ian : k, 等陣見





既然今日既主題係last day，咁就要做戲做全套。手忙腳亂咁爬起身，刷牙洗臉沖涼，對住塊鏡換校服。

我套校服上身係白色恤衫，要扣鈕，中間有條呔，下身係黑色格仔裙，搵埋對白色長襪出黎著。

嗯，襪要拉低，裙要扯高。

當然唔少得仲要紮馬尾，化少少淡妝。

再望下架鐘，仲有十五分鐘，但我而家仲係屋企，仆得街啦，今次實遲大到。

我send咗個msg俾Ian :「而家係彩虹站，好快到。」

Ian : 你慢慢啦，唔使急：）
......





18：52

「唔好意思呀，遲咗。」

「凱婷同學，你係咪蕩失路？」

「我無呀，」又好細聲咁補番句：「有都唔話你知。」

「咁姐係有啦？」Ian笑住咁問我。

「唔知呢，係啦，你啲朋友到未？」

「佢地好似到齊啦，成班係度自high緊。」

「咁準時。」我驚訝，點解唔可以遲啲啊。太準時，會令人好有壓力。





平時番學遲到，要去學校正門櫃台登記，跟住去操場罰企。校長話，因為遲到而俾全校望住哂，係一件好羞辱既事，希望佢地以後唔好再犯。

中意出風頭既人，例如詩韻，聽到呢句話，自然日日遲到，因為可以成為眾人焦點，增加曝光率，簡直係求之不得。

而對於臉皮薄既我，真係會耷低頭，成塊臉紅哂。所以每次遲到，我都會拉埋丁家岐落水，叫佢陪我一齊罰企。

「女仔遲到天經地義，無野喎。」Ian拍拍我個頭。

我地肩並肩咁行。

如果唔係情侶，就無得拖手咁行。

無得拖手，硬係覺得少咗啲咩咁...可能係安全感。好想翹住佢隻手呀，但係又好似太主動。

「我地使唔使買野食上...」

「啊！！！！！！」經過天橋既時候，有個男人突然對住我咆哮一聲，嚇到我叫咗一聲，下意識捉實Ian既手臂。

Ian即刻攬住我膊頭：「唔使驚，有我係度。」

我摸摸自己個心口：「點解香港咁多痴線佬架。」

「壓力大啊，個個都好多負面情緒。」

「咁又點解每次我遇到你，都會遇到呢啲不正常人類？」

Ian對我眨眨眼：「可能係個天幫我製造機會。」

「製造咩機會呀？」我裝傻。

「嗯...英雄救美既機會。」佢又陪我詐懵。

其實係因為以前丁家岐咩都幫我擋哂，有人保護我，先無人敢騷擾我。

我定定咁望住Ian。

丁家岐係淺啡色，Ian係深啡色。

佢地兩個隻眼既顏色唔同。

「做咩咁望住我？」Ian莫名其妙。

閉起雙眼你最掛念誰，眼睛張開身邊竟是誰。

「望下都唔俾呀？」我問。

「可以，繼續望啦。」

我對佢回以一個微笑。