男友出軌，我決定送26頂綠帽比佢: J for 無腳既雀仔（1）

沖完涼，洗走一身酒氣同疲憊，我打開Story Saver。

呢個app可以偷睇人地既IG限時動態，唔會留底任何瀏覽記錄，仲可以download落黎，最適合講人是非既八婆，打飛機既毒撚...

以及想知道前任做緊乜既人，例如我。

丁家岐第一個限時動態，係Nicole望住日出既背影。

佢兩個係咪已經一齊咗？





係幾時既事？

同我分手之前，定分手之後？

咁快就放得低我，其實有無真心中意過我...

第二個限時動態，係一段文字 ：「第一次在大東山看日出，很喜歡這種感覺。

曾經在我心上的人，卻又在我生命中突然消失。有些人，終究只是匆匆過客。





這段時間有點難捱，慶幸身邊有人一直陪著我。我不是擅於表達的人，但我的感受你都能明白。

不敢相信永恆，不敢相信愛情，但我希望今後繼續有你在我身邊，陪我看日出日落。」

我既思緒一片凌亂，嘗試整理中。

「你」係Nicole，「過客」係我。

突然消失果個明明係丁家岐，做咩係度扮可憐。





的確，丁家岐好少同我講心事，所以好多時候，我都唔知佢諗緊咩。

佢一直好想同我睇日出，不過我無理到佢。而家佢已經搵到一個肯陪佢去睇日出既女仔。

大概呢個就係我地關係既死因。

我再睇埋Nicole既限時動態。

對的人，對的景色，對的感覺。

佢仲係心口tag咗丁家岐個名：春夏秋冬，從此你便是我的心上人。

Nicole有少少肉地，骨子裡透著一份性感，同埋佢身材真係好好，應該有既地方都有哂，尤其是胸，擠到波濤洶湧。

【Ian給你傳來了一條新訊息。】





Ian : 番到屋企未？

Sorry但我完全忘記咗佢既存在。佢只不過係一個替代品，食之無味，棄之不可惜。

我：番到

Ian : 咁就好：）

Ian : 今晚多謝你照顧我

我對佢發脾氣，佢仲多謝我？

有時候，人真係好犯賤，中意對自己衰既人，無視對自己好既人。





我又係，Ian都係，兩個都有自虐傾向。

我：講呢啲？

Ian : 下次再一齊出去玩？

我：之後再約（一個ok的手勢）

Ian : 你想去九龍、新界定香港島？

我：瞓先

我退出WhatsApp頁面，由「在線上」變為已下線。

呢個狀態既我，根本唔適合發展新戀情。





與其浪費大家時間，不如唔好再見面。

熱鬧過後，內心更加寂寞空虛。

我又得番自己一個。

一切都好似幻影，捉不住已飛逝。

我將耳機較到最大聲，任由隨機播放既搖滾音樂刺痛我既耳膜。

半個鐘之後，我先發現詩韻既msg.

詩韻：hihi





詩韻：聽日得唔得閒？

我：做乜？

詩韻一向玩即興，無聊就搵人攝時間。

詩韻：好耐冇見你 想見下你

我：好啊

詩韻：去唱K好無？

我：得我地兩個？

詩韻：仲有幾個男仔 都幾靚仔

我：咁不如下次再約過？

詩韻：點解呀 你唔得閒咩？

物以類聚，佢既圈子全部都係player或者mk仔。每次同佢地一齊，總係覺得自己亂入，氣場唔多夾。

詩韻：係咪仲掛住丁家岐？

我：好難放低：（

詩韻：識多幾個男仔 就會慢慢掉淡

詩韻：有個男仔我覺得你會中意 佢之前睇過你相話你靚

我：邊個呀？

詩韻：黎到你咪知

我：有冇女朋友？

詩韻：痴線啦 有女我點會推俾你

其實無女都唔代表啲乜，因為仲有sp關係、一夜情對象、Dating App網友...

我：咁好啦

我：你咁識溝仔 過幾招黎啦

詩韻：下 我做番自己咋喎

溝仔絕對唔係一件容易既事。

要著乜衫、幾時要有身體接觸而唔會俾人覺得好隨便、點樣令對方浮想聯翩，點樣keep到佢對你既好奇心同新鮮感...

沒練習太耐，感覺都追不回來。

詩韻：Erm...我諗下

詩韻：要抱住玩玩下既心態 認真你就輸

一句講哂，感情世界，其實就係一場心理博弈。邊個先沉船，邊個先動情，就會輸。

所以我輸得一塌糊塗。

只有唔認真，先至可以立於不敗之地。

我：所以令到佢中意我既方法，就係永遠唔好中意佢？

詩韻：Exactly