男友出軌，我決定送26頂綠帽比佢: K for 女僕cafe的一天（2）

話哂都係第一份兼職。

我提早個半鐘出門口，早到好過遲到，要留個好印象俾店主。

好彩，間野唔難搵，出咗地鐵站，一直沿住彌敦道向前行，係第三條街口轉入去，就到了。

Sweet Home係一家樓上cafe，係11樓。

我推開玻璃門。





「歡迎回家，大小姐！」一個女僕即刻行過黎，笑臉迎人咁話。

撲面而黎既熱情...宅男應該好受呢一套，因為平時無乜人會同佢地交流。

「呃...你好呀，我係黎面試既。」

「你係Anita?」

「係呀。」





女僕瞬間打回原形，一輪嘴咁話：「你係度就好啦，幾驚你唔黎。」

佢見我一面莫名其妙，同我解釋番：「我地有個同事臨時請假，你可唔可以幫幫手，即日返工？」

「下...但係我唔識架喎。」

「你跟住我做就得架啦，好簡單，一路學一邊做。」

「我今日無化到妝呀。」唔係要戴假髮、大眼con、痴假眼睫毛架咩？





「怕乜，啲客其實中意素顏既女仔，佢地會覺得你好可愛。」

女僕見我仲係猶豫，雙手合十 ，一對大眼睛眨呀眨：「求下你啦。」

差啲俾佢電暈，點忍心拒絕佢呢？

「好啦。」

女僕開心到跳起，塞咗套制服俾我，「廁所係果邊，你快啲換衫啦，就黎lunch time，會好多人。」

我著住條黑色蓬蓬裙，束腰低胸，胸前有大大隻蝴蝶結，裙邊衫袖都有蕾絲。

對住鏡左照右照，忍唔住拎部手機出黎，自拍數十張。

平時出街，如果著呢啲奇裝異服，會俾人側目；但係如果係番工制服，就唔同講法。





「記得綁埋條白色圍裙呀。」

係喎，圍裙係女僕裝既靈魂所在。

因為要服服侍客人嘛。

其實女僕服既歷史源遠流長。

話說維多利亞時期、第一次工業革命之後，出現咗一批暴發戶，為咗顯擺自己既社會地位，就模仿上流社會既人，養咗一堆奴僕。

果陣時既女僕裝，純粹就係制服，用來區分雇主同僕人，款式保守，條裙長到落腳，條頸包到實一實，無野好睇。

唔似而家，可能因為太多奇奇怪怪既av，咩俏女僕的淫蕩生活、造人是侍奉的一環、我的私屬女僕...





女僕既形象，就變得唔太正經，同色情啊性啊有關。

大概，男仔對女僕裝情有獨鍾，係因為背後既象徵意義：有個聽教聽話既女僕，叫佢做乜就做乜，滿足到自己既征服欲。

Sweet Home唔算大，可以擺到大概七、八張枱，鵝黃色既牆身，粉紅色既窗簾，充滿少女心既擺設，舒服溫暖，有家的感覺。

唯一美中不足，係呢度通風唔太好，所以廚房既油煙會飄哂出黎。

「我叫Aka。」女僕俾咗一疊小卡我：「有客人入黎，男既要叫主人，女既要叫大小姐。

坐低之後，要同佢地自我介紹，吹下水，問佢地有無認定卡，無就俾張新既佢地，有就蓋個印，唔夠可以去櫃拎。

要特別留意銀卡金卡既會員，佢地係我地既米飯班主，一個月黎十幾廿次，千祈唔好得罪人地。」

我好認真咁聽書。





「要照顧所有客人，每次交談，最好唔好超過三分鐘。因為傾得太耐，乜都知道既話，佢地就會對你無哂興趣。

仲有記得唔好同個客交換contact，唔可以有肢體接觸，更加唔可以發展戀情，一旦發現即時開除。」

原來做女僕都有咁多守則。

「有人黎啦，自己執生！」女僕推一推我，我地各就各位。

未落過戰場，就俾人推咗去前線衝鋒陷陣。

要冷靜，要鎮定！！！

一個眼鏡宅男行入黎，外表騎呢，身上自帶尷尬既氣場。





有錢便是客。Aka好熟練咁招呼佢。

經過我身邊既時間，可能見我生面口，頭耷耷咁偷望我。

我對佢微微一笑。

屌，想望咪光明正大咁望咯，黎得呢度，都係想昅女啫。

我係心裡面默默鄙視佢。

抵佢一世做毒撚。

後面仲有個MK仔，攬住條女上來，又係咩玩法呢？

我不合時宜咁諗到，如果佢地係丁家岐同Nicole，我應該會係佢地既飯菜落毒，或者衝入廚房，拎把菜刀斬死佢地。

Aka見我呆咗，大大聲咳咗一下。

我回過神來。

「主...主人，大小姐，歡迎返到屋企。」第一次講啲咁既說話，好似玩緊羞恥play，極度唔自然，假到連自己都打冷震。

「仲唔快啲斟茶遞水？」佢條女充滿敵意咁望住我。

「......」

明知係假係做戲，但係又會全程投入，我係你既女僕，對你千依百順；你係我既主人，對我任意使喚...

大概呢啲就係角色扮演既樂趣。