［愛情純愛］我地之間嘅友誼純度絕對等於零！！！: 11. 約會

「哎呀！」李逸彤雙手捉住邱旻顥嘅手腕

邱旻顥鬆開手後，仲要輕輕地搣咗李逸彤嘅臉頰一下，然後先再移開視線

李逸彤見邱旻顥鬆咗手，提手摸摸自己嘅臉頰，感覺臉頰熱熱的，可能仲有啲面紅，所以李逸彤默默地耷低頭

兩人沿路行番屋企，行到同一幢屋苑大樓，喺升降機大堂一同等升降機落嚟

「叮！」電梯到咗25樓，叮一聲後電梯門緩緩打開





「拜拜。」邱旻顥對李逸彤講咗一聲後行出電梯

「拜拜⋯」李逸彤講道，伸手㩒住開門制，「聽日2點樓下見～」

「嗯，知啦！」邱旻顥朝李逸彤一笑，「拜拜。」

李逸彤鬆開㩒住開門制嘅手，電梯門緩緩閂上

諗到聽日可以去睇戲⋯同邱旻顥兩個人一齊睇戲⋯





其實兩人都唔係第一次單獨出街，之前有單獨出過去兩、三次，但多數都係食個飯就算，今次係第一次睇戲

李逸彤一番到屋企就諗聽日著咩衫好，明明都已經唔係第一次同邱旻顥出街，但今次卻緊張好多，一番到屋企就諗定著咩衫好

「著裙好唔好呢？」李逸彤拉開放裙嘅膠櫃桶，「但會唔會凍⋯？」

李逸彤閂上櫃桶、打開衣櫃，襯下衫又襯下褲，左襯右襯，但就係諗唔到要著咩先好

諗咗一個鐘，最後決定著一件長袖冷衫，下身著裙就好啦，畢竟同自己中意嘅人出街，想留個好印象比佢





李逸彤將襯好嘅衫用衣架掛好喺衣櫃門上，期待着聽日嘅到來⋯

⋯

星期六

李逸彤孭起袋，著好鞋就出門口

「唔知佢出咗門口未⋯」李逸彤提手望一望手錶，「陣間落到25樓會唔會見到佢？」

淨係咁樣空想一下，李逸彤都忍唔住笑意，電梯會唔會去到25樓停低然後開門，門一打開就見到邱旻顥？

李逸彤帶着少許期待行入電梯，一直望住顯示樓層嘅電子板，但電梯去到25樓嘅時候冇停落嚟，電梯直落到地面

李逸彤行出大堂，企喺大門外等邱旻顥，佢提手望一望手機，然後將手機解鎖





「你人出門口未？」李逸彤打咗一個message，正準備send出去之際，邱旻顥推門從大堂行出嚟

邱旻顥攝手攝腳地行到李逸彤嘅身後，背住大門企嘅李逸彤完全冇察覺到邱旻顥已經到咗

「嘩！」邱旻顥嘅雙手一下子捉住李逸彤嘅膊頭，李逸彤比邱旻顥嚇到成個人震咗一下

「嘖⋯邱旻顥！」李逸彤輕嘖一聲，然後一臉不滿地回頭

「你咁易嚇嘅～」邱旻顥笑道，「拍一拍你都驚～」

「我細膽唔得呀？」李逸彤稍微鼓起兩泡腮，不滿地捏咗邱旻顥嘅手臂一下，「唔得咩？」

「得得得～你話咩都得啦～」邱旻顥沒好氣地笑道，「行未呀？係唔係去食嘢呀？再唔行就咩都唔洗食啦⋯」





兩人搭車去到太古，去附近嘅food court食嘢

「你食咩？」邱旻顥喺李逸彤坐低之後問道，「你出去買先。」

「嗯。」李逸彤又起番身行出去，買完嘢食先番嚟

邱旻顥膽李逸彤都揀咗食拉麵，食飯嘅話又會太飽，所以食個麵就剛好

「有啦。」李逸彤聽到叫餐嘅聲音，佢望一望自己手試嘅單number，的確係佢個餐有啦

「我都有。」邱旻顥起身，朝取餐處行嘅時候順手拎埋李逸彤張單

本來已經起咗少少身嘅李逸彤見邱旻顥拎埋自己張單走，嘴角微微上揚後便默默地坐番低

邱旻顥先拎住李逸彤嘅餐番嚟，將膠托盤小心翼翼地放到李逸彤嘅面前，李逸彤回頭望向又行出去嘅邱旻顥





「等埋佢番嚟先食啦～」李逸彤喺心裏道

待邱旻顥番嚟之後，邱旻顥拎起木筷子準備食嘢

「等等⋯」李逸彤叫住咗邱旻顥，邱旻顥嘅動作定住了，望住李逸彤將放喺叉燒面嘅蔥都夾到邱旻顥嘅碗中，「又唔記得走蔥⋯」

邱旻顥無言地望住李逸彤將蔥夾到自己碗中，等李逸彤夾晒之後先再食

邱旻顥食咗一啖拉麵後抬眼望向李逸彤，記起兩人第一次單獨出去嘅時候，都係食呢度food court嘅拉麵，第一次單獨出街嘅時候，感覺又緊張又尷尬

但喺嗰一日嘅「約會」結束後，又忍唔住期待下次再單獨出嚟見面








IG Link: https://www.instagram.com/nd_cotttoncandy/?hl=zh-tw