［愛情純愛］我地之間嘅友誼純度絕對等於零！！！: 17. 好感與喜歡

佢同邱旻顥之間都保持咗呢種狀態一段時間，應該都有兩、三個月

當初因為李逸彤嘅嫲嫲而間接拉近咗邱旻顥同李逸彤之間嘅關係，喺相處咗一段時間之後，李逸彤同邱旻顥慢慢熟起嚟，好感就慢慢咁產生

邱旻顥本來就同潘景諭係好朋友，潘景諭又同沈心怡好熟，而沈心怡同李逸彤又係好朋友，最後形成宜家呢個四人小隊，都係靠最後連李逸彤同邱旻顥都熟絡起嚟

大家慢慢開始變得成日一齊，慢慢開始一齊食lunch，慢慢地就變成宜家咁樣

邱旻顥同李逸彤愈熟，感覺就慢慢地變成咗「朋友以上」嘅感覺





但有時呢種「朋友以上，戀人未滿」嘅感覺都會令人有啲不安⋯但李逸彤心入面的確唔焦急，佢亦唔介意宜家同邱旻顥之間嘅狀態

「你唔會想表白咩？」沈心怡拎起甜品叉，食一啖蛋糕，「可以光明正大咁同佢一齊。」

「我覺得我對佢未到嗰種好想一齊嘅感覺⋯」李逸彤飲一啖水果茶，然後又澄清一般解釋，「唔係話我唔中意佢，我都中意佢啦～但未到好想一齊嘅地步，所以先話再培養下感情。」

李逸彤知道自己對邱旻顥嘅感覺，佢對邱旻顥係中意，佢承認，但又未去到非要一齊不可嘅地步嘅中意

「所以我先同你講，話我對佢係好感。」李逸彤垂眼望住浮喺茶面嘅冰粒，「感覺⋯好似講咗「中意」嘅話，就好似我一定要同佢一齊、非佢不可一樣；但「好感」嘅話，就唔一樣，聽起嚟唔會令人有太大壓力，對佢定對我都好⋯當然，佢唔知我中意佢啦～」





李逸彤對感情嘅看法，或者同普通嘅女仔真係唔一樣⋯佢唔會覺得中意一個人，就一定要以「同嗰個人一齊」作為目標，因為會令自己同對方都好大壓力

「你呢？」李逸彤微微一笑，抬頭望住沈心怡，「你係唔係有中意嘅人？」

沈心怡微微耷低頭，輕輕抿唇，輕輕咬着甜品叉

「唔係呀～」沈心怡笑一笑，搖一搖頭，「未遇到呀～邊似你～」

「仲以為你有中意嘅人添～」李逸彤微微一笑





「未有啦～冇咩拍拖嘅想法～」沈心怡輕輕頭，「我覺得宜家都okay呀～而且拍拖呢啲事，對我嚟講好難。」

李逸彤聽到沈心怡咁講，即刻就明白點解

因為佢知道沈心怡係一個冇咩安全感嘅女仔，唔好睇沈心怡好似好開朗可愛咁，其實佢實際上就係個冇咩安全感嘅人

「咁心怡你有冇在意嘅人？」李逸彤追問道

「有呀～你啦，邱旻顥啦，阿諭啦～我都在意呀～」沈心怡笑一笑，然後食咗一喺蛋糕

「我唔係講朋友呢種在意呀⋯」李逸彤一臉無奈地反白眼，「我講緊嘅係會心動嗰種在意⋯！」

「唔⋯未有呀～」沈心怡諗咗一諗，臉上掛着甜美嘅笑容講道

「好啦～有嘅話同我講，我一定支持你！」李逸彤講完後食咗一啖朱古力蛋糕





沈心怡微微一笑，喺耷低頭後卻若有所思地飲咗一啖花茶

⋯

李逸彤同沈心怡一齊搭車番屋企，兩人因為喺唔同嘅地鐵站出口番去而喺站內分別

「聽日見啦～」沈心怡笑着對李逸彤揮揮手

「嗯嗯！拜拜～」李逸彤朝住另一邊行去

李逸彤啱啱踏出地鐵站，路過一間超級市場，腦海中忽然記起自己嘅零食都已經食晒

「唔⋯順便買埋先番屋企啦～」李逸彤望一望手機螢幕上顯示嘅時間





李逸彤一個轉身就朝超級市場行去，行入超級市場，拎咗個灰色嘅購物籃後直接行咗去放零食嘅位置

「唔⋯食呢個啦⋯」李逸彤拎咗三包卡樂B嘅薯片放到購物籃中，然後行過兩步，拎起放喺一排朱古力放到籃中，「食唔食蝦片好⋯？」

李逸彤雙手拎住購物籃，微微耷低頭望住印尼蝦片，猶疑緊買唔買番屋企食好

「好似好大包，我會唔會食唔晒⋯？」李逸彤喺心裏自言自語起嚟，「但好耐都冇食，薯圈都食咗一排，今次可以唔買，但食唔食蝦片好⋯？」

同樣喺超級市場揀緊嘢飲嘅邱旻顥，手上攬住一pack六包嘅維他奶同蘋果綠茶正準備行去比錢之際，眼睛嘅餘光見到揀緊零食嘅李逸彤

「李逸彤⋯？」邱旻顥企喺原地停咗一秒，然後先朝李逸彤邁步行去，「咁啱呀？」

邱旻顥行到去李逸彤嘅身旁，李逸彤一下子就認出邱旻顥嘅聲音，望向邱旻顥嘅目光中帶着一絲愕然

「你喺度嘅？」李逸彤笑了一笑問道，然後就望到佢手上攬住嘅嘢飲，「出嚟買嘢飲？」





「嗯⋯」邱旻顥無奈地點點頭，但心裏卻忍唔住開心，畢竟佢特登出嚟買嘢飲卻可以撞到李逸彤

李逸彤將邱旻顥上下打量一番，邱旻顥身上著住便服，佢係番咗屋企之後再出嚟

「佢著便服都好好睇～」李逸彤喺心裏偷樂道，「雖然佢平時著校服都好睇，但便服又點同校服？」

邱旻顥瞄到李逸彤一個人望住薯片偷笑，嘴角都不禁跟着李逸彤一同上揚




IG Link: https://www.instagram.com/nd_cotttoncandy/?hl=zh-tw