［愛情純愛］我地之間嘅友誼純度絕對等於零！！！: 32. 捉弄

佢同潘景諭由小學開始就識，上到嚟中學一直都係同班同學，潘景諭多女仔中意，除咗因為外表之外，沈心怡都諗唔到其他原因

同潘景諭真係稱得上熟嘅女仔，應該只有沈心怡同李逸彤，最熟嘅當然係識咗好耐嘅沈心怡

「埋得阿諭身，想溝佢嘅，十個有九個都應該係睇中阿諭個樣⋯」沈心怡喺心裏講道，佢好清楚中意潘景諭嘅女仔中，外貌協會佔多數，「不過，又唔可以話個個都係外協而中意阿諭嘅⋯總有人中意佢真實嘅一面⋯」

喺去到地鐵站準備入閘之際，沈心怡冇拎八達通出嚟

「我要去拎嘢，你地番去先啦～」沈心怡講道





「吓？你一個人拎唔拎到呀？」李逸彤輕皺起眉頭，有啲擔心咁講道，「咁突然嘅？」

「Okay啦～我拎到！」沈心怡比咗個Okay手勢，「你地番去先啦～我拎完嘢仲有少少嘢買，就唔同你地一齊走啦～」

「咁⋯」李逸彤有啲放心不下地望住沈心怡

「我Okay啦～」沈心怡笑一笑，然後拉一拉李逸彤，喺李逸彤嘅耳邊細聲地講道：「比你地單獨相處下嘛～」

「咩呀！？」李逸彤伸手輕拍一下沈心怡嘅手





邱旻顥冇太大反應，畢竟佢都唔介意同李逸彤兩個人單獨相處

「聽日見～」沈心怡笑了笑後講道

喺邱旻顥同李逸彤拍卡入閘後，沈心怡轉身朝商場行去

「你同我一齊去拎嘢呀？」沈心怡望向行喺佢身旁嘅潘景諭，微微一笑問道

「嗯，明顯啦。」潘景諭點一點頭，然後伸手摸一摸沈心怡嘅頭頂，成個動作就好似下意識舉動一樣，「唔洗覺得我好好人。」





「可唔可以唔好咁樣讚自己⋯？」沈心怡頓時一臉無奈，什至有啲無言以對

另一邊廂，邱旻顥同李逸彤行到去月台，兩人企喺玻璃幕門前等待列車到來

李逸彤行到邱旻顥嘅身旁，望住邱旻顥嘅手機螢幕，睇緊邱旻顥嘅IG

邱旻顥眼睛嘅餘光見到李逸彤正盯着自己嘅手機螢幕睇，佢緩緩地望向李逸彤，手冇繼續滑螢幕

「嗯⋯？」李逸彤見邱旻顥停止咗滑螢幕，便抬頭望向邱旻顥

「我個IG好睇啲咩？」邱旻顥自然地笑了笑問道

「幾啦～又真係幾好睇～」李逸彤吐吐舌頭，直接地講道，「嘻⋯」

李逸彤抬起頭，目光從邱旻顥嘅手機螢幕移開





「咩呀？」邱旻顥輕輕挑起眉，輕掂着螢幕嘅指尖偷偷地向右滑，打開咗相機

「喂，你偷偷地喺度做咩？」李逸彤眼睛嘅餘光感覺到螢幕忽然比啱啱暗咗，一望就發現邱旻顥偷影佢，「喂呀！影到我好醜呀！」

「Save低佢先～」邱旻顥即刻㩒咗下載，將張相save咗喺手機相簿

「喂呀！」李逸彤伸手打咗邱旻顥嘅手一下，「啱啱嗰張太醜啦！快啲刪咗佢呀！」

李逸彤伸手想將邱旻顥嘅手機搶過嚟，但無奈嘅係邱旻顥比佢高，邱旻顥嘅手只要提起，李逸彤就已經掂唔到

「手機⋯！比我⋯！我一定要⋯！刪咗張相佢⋯！」李逸彤嘅手舉着一直跳呀跳，邱旻顥卻一臉輕鬆地舉着右手，「邱旻顥⋯！」

「乖啦，你放棄啦。」邱旻顥笑一笑，左手輕輕地喺李逸彤嘅額頭上拍一下，然後將手機螢幕鎖上放入褲袋，「你拎唔到㗎啦。」





「哼⋯」李逸彤輕哼一聲，微微鼓起兩泡腮

列車駛入月台，車門打開後，李逸彤先一步邁步行入車廂；邱旻顥望到李逸彤啱啱嘅小表情，不禁微微一笑，李逸彤果然係佢嘅小太陽

「乖啦。」邱旻顥冇察覺到自己嘅語氣中夾雜着少許嘅寵溺意味，行喺李逸彤身後嘅佢，下意識就伸手摸一摸李逸彤嘅頭

李逸彤行列車廂中，同平日一樣企喺車門旁邊，邱旻顥企喺佢面前，右手捉住座位旁嘅扶手；李逸彤無所事事，調皮地伸出拳頭輕輕地喺邱旻顥嘅胸口上打咗一下

「做咩打我？」邱旻顥滿頭問號，手輕蓋喺啱啱李逸彤打嘅位置

「就係突然想打你。」李逸彤笑一笑，聳聳肩講道，「呀嘶⋯！」

邱旻顥聽到李逸彤嘅話後點點頭，然後自然地提手，捏住李逸彤嘅臉頰

「放手呀！」李逸彤雙手捉住邱旻顥嘅手腕搖咗兩下，但邱旻顥就係唔放手，「喂呀⋯！放手呀⋯！做咩摵我呀⋯！」





「就係突然想摵你呀。」邱旻顥笑了笑，然後將李逸彤啱啱講過嘅嘢，好似copy and paste一樣講番比佢聽

「做咩學我講嘢呀⋯！」李逸彤輕拍着邱旻顥嘅手，邱旻顥緩緩地將手鬆開，「嘶⋯」




IG Link: https://www.instagram.com/nd_cotttoncandy/?hl=zh-tw