［愛情純愛］我地之間嘅友誼純度絕對等於零！！！: 35. 會是哪種好感？

「聽日係唔係有測驗？」邱旻顥隨口問道

「好似係⋯」李逸彤諗咗一諗後，遲疑地回答道，「好似有三個，地理有小測，數學同英文都有。」

「英文測咩？Listening定Reading？」邱旻顥微微點頭後追問道

「Reading？測一堂半。」李逸彤咬住飲管講道，「番去睇下schedule book先～」

「Okay～」邱旻顥比咗個Okay手勢，微微側着頭望住李逸彤





「咩呀？」李逸彤學邱旻顥一樣微微側着頭，明亮嘅雙眸定睛地望住邱旻顥，「做咩呀？」

邱旻顥望住李逸彤朝自己瞇眼一笑，心臟頓時緊縮一下，佢不禁耷低頭一笑，笑意好似要從心底溢出一樣

「笑咩呀？」李逸彤好奇地問道，用一雙明亮嘅眼睛望住邱旻顥

佢嘅雙眸對邱旻顥嚟講，就好似有着漫天星宿一樣，總會不自覺地將你嘅目光吸引住⋯

「冇⋯」邱旻顥壓抑住內心嘅波動，自然地將視線移開，搖搖頭，「冇咩呀～」





「諗到啲咩好笑嘢呀？我又要聽！」李逸彤嘅手不自覺地提起搭喺邱旻顥嘅前臂，輕輕地捉住佢嘅前臂晃一晃，「開心share嘛！」

「冇好笑嘢呀！」邱旻顥笑着搖搖頭，行嘅時候向李逸彤嘅方向行近一步，「你諗多咗啦！」

「明明就有，講我聽講我聽！」李逸彤捉住邱旻顥嘅前臂邊晃邊笑道

兩人總係會不自覺地湊近，總係好似下意識靠近一樣，或者因為收喺心底嘅感覺，所以期望可以靠近對方多啲⋯

兩人一齊行到番去屋企樓下，一齊行入電梯，離分開嘅時間又近咗一大步





「咚、咚！」電梯到咗25樓，邱旻顥先一步行出去

「拜拜～」李逸彤笑了笑講道，然後飲一啖紅茶

「拜。」邱旻顥微微點頭，同李逸彤揮一揮手後，電梯嘅門閂上

李逸彤番到屋企後換好衫，一下子灘低喺床睇手機

「唔⋯好悶⋯」李逸彤望住手機嘅螢幕不禁細聲地抱怨般道

李逸彤諗起啱啱同邱旻顥喺番嚟嘅路上仲笑得好開心，但宜家番到嚟屋企，只有佢自己一人嘅屋企令佢覺得呢份寂靜同啱啱嘅歡樂形成一個極大嘅反差

「唔⋯」李逸彤踢起腿，借着呢股力一下子坐起身，然後拎起放喺書枱上嘅紅茶飲咗一啖，「搞到好似佢一唔喺我隔離，我就要悶死咁⋯」

李逸彤鼓起兩泡腮，將杯紅茶放番喺枱上，自己又灘番落床然後繼續睇手機





「唉⋯冇嘢好睇呀⋯」李逸彤對手機抱怨道，然後將手機螢幕鎖上後，將手機放到枕頭邊

李逸彤一個翻身後，由平灘喺床變成側瞓喺床上

李逸彤㩒一下手機嘅開鎖制，手機螢幕一亮後，李逸彤又再㩒一下開鎖制將螢幕鎖上

放喺枕頭邊嘅手機忽然一震，李逸彤一個翻身趴喺床上望手機

「嘻⋯」李逸彤不禁一笑，喺見到聯絡人名稱嘅時候，笑意都忍唔住了，「終於約我啦咩～」

邱旻顥share咗一個po比李逸彤，係啲餐廳嘅po嚟

邱旻顥：下次食？





「呢間咪上次同心怡去過嗰間⋯？」李逸彤望住邱旻顥send過嚟嘅po細聲地自言自語道，然後回覆道：之前同心怡去過

邱旻顥：哦，咁算囉～

「去囉～你想試嘅話就去！」李逸彤見邱旻顥打算打消約佢嘅念頭，頓時回覆地，「GoGoGo！！！」

邱旻顥拎住手機，望到新一個message時不禁一笑，然後回覆道：你同沈心怡去過啦嘛，揀第二間

「咁同唔同嘅人去唔一樣㗎嘛～」李逸彤嘅嘴角不禁上揚，然後回覆道，「你想幾時去？」

邱旻顥：星期六定平日？

「都可以啦～睇你啦」李逸彤回覆道

李逸彤望住手機螢幕等待着邱旻顥嘅回覆同時，心裏不禁猜測着邱旻顥嘅心諗緊啲咩





「有時覺得佢對我可能真係有好感，但係屬於朋友嘅好感定係⋯嗰種好感呢⋯？」李逸彤喺心裏自言自語道，「我嘅話⋯我知道自己對佢唔係朋友嗰種好感，雖然都有朋友嘅好感，但更偏重於另一種好感⋯」

李逸彤獨自地猜着邱旻顥嘅想法，佢唔敢肯定對方嘅想法同心意，但佢知道自己對邱旻顥嘅感覺，已經唔喺朋友嘅界線上⋯

邱旻顥：今個星期六？你得唔得閒？

「可以呀！咁就星期六啦～」李逸彤高興地回覆道，「幾點等呀？」

邱旻顥：睇你會唔會想喺附近行一陣，你想嘅話可以早啲




IG Link: https://www.instagram.com/nd_cotttoncandy/?hl=zh-tw